سچترا سین ایک نامور ہندستانی فلم اداکارہ تھیں، جن کا شمار بنگالی سنیما کی عظیم ترین اداکاراؤں میں ہوتا ہے۔ سچترا سین نے ہندستان کے علاوہ بین الاقوامی سطح پر بھی اپنی شناخت قائم کی تھی۔

سچترا سین ایک نامور ہندستانی فلم اداکارہ تھیں، جن کا شمار بنگالی سنیما کی عظیم ترین اداکاراؤں میں ہوتا ہے۔ سچترا سین نے ہندستان کے علاوہ بین الاقوامی سطح پر بھی اپنی شناخت قائم کی تھی۔ ان کو بنگالی سنیما میں ایک باوقار اور بااثر اداکارہ کے طور پر جانا جاتا ہے۔ وہ واحد ہندستانی اداکارہ تھیں جنہوں نےستیہ جیت رے کے ساتھ کام نہیں کیا، حالانکہ وہ ان کی پسندیدہ اداکارہ تھیں۔ جبکہ انہوں نےعظیم اداکار اتم کمار کے ساتھ کئی یادگار فلمیں کیں، جن کی جوڑی کو بنگالی سنیما میں کلاسک حیثیت حاصل ہے۔ 
سچتراسین کا اصل نام روماداس گپتا تھا۔ ان کی پیدائش ۶؍ اپریل ۱۹۳۱ءکو بنگلہ دیش میں ہوئی تھی۔ ان کے والد کرونوم داس گپتا ایک ہیڈ ماسٹر تھے۔ سچتراسین نے ابتدائی تعلیم پونے سے حاصل کی تھی۔ ۱۹۴۷ءمیں ان کی شادی بنگال کے مشہور صنعت کار آدی ناتھ سین کے بیٹے دیبا ناتھ سین سے ہوئی۔ ۱۹۵۲ءمیں سچترا سین نے اداکارہ بننے کے لئے فلم انڈسٹری میں قدم رکھا اور بنگلہ فلم ’شیش کوتھا‘ میں کام کیا۔ حالانکہ فلم ریلیز نہیں ہوسکی۔ 

یہ بھی پڑھئے: نئے پروجیکٹ میں سیامی کھیر اور گلشن دیویا ایک ساتھ نظرآئیں گے

۱۹۵۲ءمیں ریلیز بنگلہ فلم ’سارے چتر‘بطور اداکارہ ان کی پہلی فلم تھی۔ اس فلم میں انہوں نے اتم کمارکےساتھ پہلی بار کام کیا۔ نرمل ڈے کی ہدایت میں بنی یہ فلم مکمل طورپر مزاحیہ عنصر لئے ہوئے تھی۔ بہترین اداکاری اور اچھی مزاحیہ اسکرپٹ پر مبنی یہ فلم سپرہٹ ثابت ہوئی۔ اس کے بعد اس جوڑی نے کئی فلموں میں ایک ساتھ کام کیا۔ ان میں ہرانو سر اور سپتوپدی قابل ذکرفلمیں ہیں۔ ۱۹۵۷ءمیں اجے کار کی ہدایت میں بنی فلم ہرانو سر ۱۹۴۲ءمیں ریلیز انگریزی فلم رینڈم ہارویسٹ کی کہانی پر مبنی تھی۔ 
۱۹۵۵ءمیں سچترا سین نے ہندی فلم انڈسٹری میں بھی قدم رکھا۔ انہیں شرت چندر کے مشہور بنگلہ ناول ’دیوداس‘ پر مبنی فلم میں کام کرنے کا موقع ملا۔ بمل رائے کی ہدایت میں بنی اس فلم میں انہیں اداکار شہنشاہ جذبات دلیپ کمار کے ساتھ کام کرنے کا موقع ملا۔ فلم میں انہوں نے ’پارو‘ کے اپنے کردار سے شائقین کا دل جیت لیا۔ ۱۹۵۷ءمیں سچترا سین کو۲؍ اور ہندی فلموں `مسافراور چمپاکلی میں کام کرنے کا موقع ملا۔ ر شی کیش مکھرجی کی ہدایت میں بنی فلم مسافر میں انہیں دوسری باردلیپ کمار کے ساتھ کام کرنے کا موقع ملا جبکہ فلم چمپاکلی میں انہوں نے بھارت بھوشن کے ساتھ کام کیا لیکن دونوں ہی فلمیں باکس آفس پر ناکام ثابت ہوئیں۔ 
۱۹۷۲ءمیں انہیں پدم شری ایوارڈسے نوازا گیا۔ سچترا سین برصغیر کی ممتاز اور باوقار اداکاراؤں میں شمار ہوتی ہیں، جنہوں نے خاص طور پر بنگالی سنیما کو نئی شناخت دی اور اپنی منفرد اداکاری سے ایک عہد پر راج کیا۔ بنگالی سنیما کی ملکۂ اداکاری کے لقب سے سرفراز سچترا سین، باوقار نسوانی کرداروں کی علامت، نئی نسل کی اداکاراؤں کیلئے مشعلِ راہ سمجھی جاتی ہیں۔ اگرچہ سچترا سین نے زیادہ تر بنگالی فلموں میں کام کیا، مگر ہندی سنیما میں بھی ان کی موجودگی یادگار رہی۔ سنجیو کمار کے ساتھ فلم آندھی جو ۱۹۷۵ءمیں ریلیز ہوئی تھی، ان کی سب سے مشہور ہندی فلم سمجھی جاتی ہے۔ ان کی اداکاری میں وقار، گہرائی اور نسوانی طاقت نمایاں جھلکتی تھی۔ وہ اپنے نجی مزاج کے سبب میڈیاسےدور رہتی تھیں۔ بین الاقوامی شہرت کے باوجود انہوں نے ہالی ووڈ میں کام کرنے کی پیشکش ٹھکرا دی۔ سچترا سین نے کریئرکے عروج پر ہی فلمی دنیا سے کنارہ کشی اختیار کر لی۔ اپنی اداکاری سے شائقین کے درمیان خاص شناخت بنانے والی سچترا سین کولکاتا میں طویل علالت کے بعد ۱۷؍ جنوری۲۰۱۴ءکو انتقال کر گئیں۔