دنیا بھر میں ٹیلر سوئفٹ اور ٹریوس کیلسی کی متوقع شادی موضوعِ بحث بنی ہوئی ہے، جبکہ تقریب سے متعلق نئی تفصیلات بھی سامنے آ رہی ہیں۔ رپورٹس کے مطابق، جوڑے نے شادی کی معلومات خفیہ رکھنے کیلئے غیرمعمولی سیکیورٹی انتظامات کئے ہیں۔

ٹیلر سوئفٹ اور ٹریوس کیلسی کی شادی کے حوالے سے جاری قیاس آرائیوں کے درمیان نئی تفصیلات سامنے آئی ہیں، جن سے معلوم ہوتا ہے کہ اس جوڑے نے معلومات کے افشا ہونے سے روکنے کیلئے سخت حفاظتی اقدامات کئے ہیں۔ ٹی ایم زیڈ (TMZ) کی ایک رپورٹ کے مطابق، مہمانوں کو بھیجے گئے شادی کے دعوت ناموں میں خفیہ واٹر مارکس شامل کئے گئے ہیں، جن پر ہر مہمان کا پہلا اور آخری نام درج ہے۔ اس اقدام کا مقصد یہ معلوم کرنا ہے کہ اگر کسی دعوت نامے کی تصویر یا معلومات آن لائن لیک ہو جائیں تو اس کے ذمہ دار شخص کی شناخت کی جا سکے۔

یہ بھی پڑھئے: ٹیلر سوئفٹ کرہ ارض کی امیر ترین خاتون موسیقار بن گئیں

ذاتی نوعیت کے دعوت نامے
ٹی ایم زیڈ کے مطابق، دعوت نامے موسمِ بہار کے آغاز میں تقسیم کئےگئے تھے، اور بہت سے مہمانوں کو یہ اپریل کے دوران موصول ہوئے۔ ایک ذریعے نے بتایا:’’ہر دعوت نامے پر متعلقہ مہمان کا پہلا اور آخری نام بار بار واٹر مارک کی صورت میں درج کیا گیا ہے۔ یہ ایک حفاظتی اقدام ہے تاکہ اگر کوئی دعوت نامہ آن لائن لیک کرے تو اس کی شناخت آسانی سے کی جا سکے۔ ‘‘
شادی کی تقریب کا مقام اب بھی خفیہ
رپورٹس کے مطابق دعوت ناموں میں شادی کی تاریخ۳؍ جولائی درج ہے، لیکن تقریب کے مقام کا مکمل پتہ نہیں دیا گیا۔ ٹی ایم زیڈ کے مطابق:’’دعوت نامے میں صرف نیویارک سٹی کو مقام اور۳؍ جولائی کو تاریخ کے طور پر درج کیا گیا ہے۔ ‘‘تاہم، حالیہ ہفتوں میں میڈیسن اسکوائر گارڈن کا نام اس تقریب کے ممکنہ مقام کے طور پر سامنے آ رہا ہے۔

یہ بھی پڑھئے: ٹیلر سوئفٹ نے iHeartRadio ایوارڈز میں ۷؍اعزاز جیتے

کیا میڈیسن اسکوائر گارڈن ہی اصل مقام ہے؟
رپورٹس کے مطابق، اس ہفتے میڈیسن اسکوائر گارڈن کے باہر بڑے ٹرک روشنیوں کا سامان اور پروڈکشن کے آلات اتارتے ہوئے دیکھے گئے۔ فاکس نیوز ڈجیٹل کی حاصل کردہ تصاویر میں یہ سامان مبینہ تقریب سے چند روز قبل پہنچایا جاتا دکھایا گیا۔ ٹی ایم زیڈ نے اس سے قبل رپورٹ کیا تھا کہ اس تقریب میں تقریباً۱۱۰۰؍ سے۱۲۰۰؍ مہمان شریک ہو سکتے ہیں جس کی وجہ سے اسے حالیہ برسوں کی سب سے بڑی مشہور شخصیات کی شادیوں میں شمار کیا جا رہا ہے۔ تاہم، تقریب کے مقام کے بارے میں اب تک کوئی سرکاری تصدیق نہیں کی گئی۔

یہ بھی پڑھئے: ٹیلر سوئفٹ، اسکارلیٹ جوہانسن کے، صارفین کے ساتھ فلرٹ کرنے والے چیٹ بوٹس بنانے پر میٹا پر سخت تنقید

ٹیلر سوئفٹ اور ٹریوس کیلسی کے تعلقات
جوڑے نے اگست۲۰۲۵ء میں ایک مشترکہ سوشل میڈیا پوسٹ کے ذریعے اپنی منگنی کا باضابطہ اعلان کیا تھا۔ اس موقع پر ٹیلر سوئفٹ نے لکھا:’’تمہارے انگلش کے استاد اور تمہارے جم کے استاد شادی کرنے جا رہے ہیں۔ ‘‘ ٹیلر سوئفٹ اور ٹریوس کیلسی کے درمیان تعلقات کی افواہیں پہلی بار۲۰۲۳ءمیں سامنے آئیں جس کے بعد دونوں نے عوامی طور پر اپنے رشتے کی تصدیق کر دی۔