غزہ کے ۹؍ فلسطینی زندہ بچ جانے والوں کی کہانی پر مبنی دستاویزی فلم ’وِی اِز اسٹِل الائیو‘ کو ۹۹؍ویں اکیڈمی ایوارڈز میں بہترین بین الاقوامی فلم کے زمرے کے لیے سوئزرلینڈ کی سرکاری انٹری منتخب کیا گیا ہے۔ دلچسپ تضاد یہ ہے کہ فلم کی شوٹنگ پہلے سوئزرلینڈ میں ہونی تھی، لیکن فلم کے مرکزی کرداروں کو ویزا نہ ملنے کے باعث اسے جنوبی افریقہ منتقل کرنا پڑا۔

سوئس فلم ساز نکولا وادیموف کی ہدایت کاری میں بننے والی اس دستاویزی فلم کا اصل نام ’کی ویو اَنکور‘ ہے، جس کا انگریزی عنوان ’وِی اِز اسٹِل الائیو‘ ہے۔ فلم میں غزہ سے نکلنے والے ۹؍ فلسطینی پناہ گزین اپنی جنگ سے پہلے کی زندگی، بمباری، اپنے عزیزوں کی ہلاکت، بے گھری اور مستقبل کے بارے میں اپنے احساسات بیان کرتے ہیں۔ یہ محض جنگی واقعات کی روداد نہیں، بلکہ ان لوگوں کی ذاتی یادوں اور شناخت کی کہانی ہے جن کی زندگیوں کو جنگ نے یکسر بدل دیا۔ ہدایت کار کا ابتدائی منصوبہ تھا کہ فلم کی شوٹنگ سوئزرلینڈ کے شہر لوزان میں کی جائے۔ اس مقصد کے لیے شرکاء کے قیام، بچوں کی دیکھ بھال اور نفسیاتی معاونت کا انتظام بھی زیر غور تھا، لیکن جب فلسطینی شرکاء کو قاہرہ میں سوئس سفارت خانے سے ویزے نہیں ملے تو یہ منصوبہ تقریباً ختم ہونے کے قریب پہنچ گیا۔ بعد ازاں جنوبی افریقہ میں شوٹنگ کا انتظام کیا گیا، جہاں تیاری کے لیے ٹیم کو صرف ۱۰؍دن ملے۔ سوئزرلینڈ کے مقابلے میں جنوبی افریقہ کا انتخاب اس لیے ممکن ہوا کہ غزہ کے فلسطینیوں کے لیے وہاں داخلے کی شرائط نسبتاً آسان تھیں۔ 

یہ بھی پڑھئے:سولر سیلز کے معاملے میں واری انرجیز نے امریکہ میں غلطی تسلیم کرلی

فلم کی پیشکش بھی روایتی دستاویزی فلموں سے مختلف ہے۔ اس میں غزہ کی ایک سادہ خاکہ نما تصویر فرش پر بنائی گئی ہے، جس کے اندر شرکاء اپنے اپنے گھروں اور محلوں کی جگہیں نشان زد کرتے ہیں اور اپنی زندگی کے واقعات سناتے ہیں۔ ان کے سامنے کسی بڑے سیٹ یا جنگی مناظر کی نمائش نہیں، بلکہ ان کی اپنی آوازیں، یادیں اور خاموشیاں ہیں۔ فلم ساز نے ہر شخص کو اپنی کہانی بیان کرنے کے لیے وقت دیا۔ بعض مواقع پر شرکاء گفتگو کرتے ہوئے رک جاتے، روتے یا خود کو سنبھالنے کے لیے وقفہ لیتے، پھر دوبارہ بولنا شروع کرتے۔ فلم میں شامل افراد کی زندگیوں کے مختلف پہلو بھی سامنے آتے ہیں۔ ۱۴؍ سالہ غادہ العبادلہ غزہ کی گلیوں میں سائیکل چلانے کی آزادی کو یاد کرتی ہے۔ موسیقار فراس الشرفی ایک ایسے لمحے کا ذکر کرتے ہیں جب وہ قانون نامی روایتی ساز بجا رہے تھے اور قریب ہی عمارت پر بمباری ہوئی۔ وہ فلم میں دوبارہ وہی دھن بجاتے ہیں اور عین اس مقام پر رک جاتے ہیں جہاں دھماکے نے ان کی موسیقی کا سلسلہ توڑ دیا تھا۔ فلم میں شامل مصور عادل الطویل جنگ شروع ہونے کے وقت مصر میں تھے، لیکن اپنے اہل خانہ کو محاصرے میں تنہا نہ چھوڑنے کے لیے واپس غزہ پہنچ گئے۔ وہ بتاتے ہیں کہ بموں کی آواز سن کر اپنی بہن کو تسلی دیتے تھے کہ اگر دھماکہ سنائی دے رہا ہے تو اس کا مطلب ہے کہ وہ ان کے گھر پر نہیں گرا۔ لیکن ایک مرتبہ ایسا دھماکہ ہوا جس کی آواز انہیں سنائی نہیں دی۔ وہ اسپتال میں ہوش میں آئے تو معلوم ہوا کہ انہیں ملبے سے نکالا گیا تھا اور ان کے دو رشتہ دار ہلاک ہوچکے تھے۔ بعد میں وہ اپنے گھر کے ملبے پر واپس گئے تو وہاں اپنے پیاروں کی موت کی تصدیق ہوئی۔ 

یہ بھی پڑھئے:’’مرزا پور: دی مووی‘‘ کی شاندار کامیابی کے بعد شویتا ترپاٹھی کی تھیٹر میں واپسی

ہدایت کار وادیموف کے مطابق فلم میں شامل فلسطینیوں کے خیالات اور مستقبل کے بارے میں ان کی آرا ایک جیسی نہیں ہیں۔ بعض کو امید ہے کہ وہ دوبارہ غزہ لوٹ سکیں گے، جبکہ کچھ کے لیے اپنے اہل خانہ سے دوبارہ ملنے کا تصور بھی تکلیف دہ ہے۔ فلم میں امید، شناخت، گھر سے محرومی اور نئی نسل کے مستقبل جیسے موضوعات بھی زیر بحث آتے ہیں۔ ’وِی اِز اسٹِل الائیو‘ کا عالمی پریمیئر  ۲۰۲۵ء میں وینس فلم فیسٹیول کے دوران ہوا، جہاں اسے سنیما اینڈ آرٹ ایوارڈ سے نوازا گیا۔ ۲۰۲۶ء کے آغاز میں اس نے سولوتھورن فلم فیسٹیول کا ’پرکس ڈی سولوتھورن‘ ایوارڈ بھی حاصل کیا اور سوئس فلم ایوارڈز میں بہترین دستاویزی فلم کے لیے نامزد ہوئی۔ اس کی تیاری میں سوئزرلینڈ، فرانس، فلسطین اور برطانیہ سے وابستہ اداروں نے حصہ لیا۔ سوئزرلینڈ کے وفاقی دفتر برائے ثقافت نے ۱۳؍ اگست  ۲۰۲۶ء کو اسے ۹۹؍ویں اکیڈمی ایوارڈز میں بہترین بین الاقوامی فلم کے زمرے کے لیے ملک کی سرکاری انٹری قرار دیا تھا۔ تاہم سرکاری انٹری منتخب ہونے کا مطلب آسکر نامزدگی حاصل کرنا نہیں ہے۔ اکیڈمی کی جانب سے ۱۵؍فلموں کی شارٹ لسٹ  ۱۵؍دسمبر ۲۰۲۶ء کو جاری ہوگی، جبکہ حتمی پانچ نامزد فلموں کا اعلان  ۲۱؍جنوری ۲۰۲۷ء کو کیا جائے گا۔ آسکر تقریب ۱۴؍ مارچ ۲۰۲۷ء کو لاس اینجلس میں منعقد ہوگی۔ ہدایت کار کے لیے اس فلم کی آسکر مہم کا ایک اہم مقصد ان فلسطینیوں کی آوازیں عالمی ناظرین تک پہنچانا ہے جن کی کہانیاں اکثر جنگی اعداد و شمار اور خبروں کے شور میں دب جاتی ہیں۔ ان کے بقول فلم میں بڑے اداکار یا معروف ستارے نہیں، بلکہ عام لوگ ہیں جو اپنی زندگی کے تجربات بیان کر رہے ہیں۔ سوئزرلینڈ کی سرکاری انٹری بننے کے بعد یہی 9 فلسطینی زندہ بچ جانے والے اب ایک ایسے عالمی فلمی مقابلے کے سفر کا حصہ ہیں جس کے لیے ان کی اپنی کہانیوں نے سرحدوں سے آگے راستہ بنایا ہے۔