ٹائیگر شروف مبینہ طور پر وجے کرشنا اچاریہ کی اگلی فلم میں نظر آئیں گے، جو ایک بڑے پیمانے کی ایکشن فلم ہوگی۔ پروجیکٹ کے اگست میں شروع ہونے اور ۲۰۲۷ء میں ریلیز ہونے کی توقع ہے۔

بالی ووڈ اداکار ٹائیگر شروف ایک بار پھر بڑے پردے پر ہائی اوکٹین ایکشن کے ساتھ واپسی کی تیاری کر رہے ہیں۔ رپورٹس کے مطابق وہ معروف فلمساز وجے کرشنا اچاریہ، جو ’’دھوم ۳‘‘ کے لیے جانے جاتے ہیں،کی اگلی فلم میں مرکزی کردار ادا کریں گے۔ اگرچہ اس پروجیکٹ کا باضابطہ اعلان ابھی باقی ہے، تاہم انڈسٹری ذرائع کے مطابق یہ فلم ایک بڑے پیمانے کی ایکشن انٹرٹینر ہوگی، جس کی شوٹنگ اس سال اگست میں شروع ہونے کی توقع ہے۔ فلم کو ونود بھانوشالی اور ٹونی ڈیسوزا پروڈیوس کریں گے جبکہ اس کی ریلیز ۲۰۲۷ء میں متوقع ہے۔

یہ بھی پڑھئے: سنیما کون ۲۶ء: نمِت ملہوترا نےرامائن، ڈُون، اوڈیسی میں مماثلت بتائی، ٹرول

ذرائع کے مطابق ’’ٹائیگر اس وقت ایک زبردست مرحلے میں ہیں اور مختلف انواع کی کئی فلمیں سائن کر رہے ہیں۔ وجے کرشنا اچاریہ کے ساتھ یہ تعاون ان کی لائن اپ کا سب سے دلچسپ پروجیکٹ ہے۔ یہ مکمل طور پر ایکشن سے بھرپور فلم ہوگی، جس کا اسکیل اور ڈیزائن اس سے پہلے ہندوستانی سنیما میں نہیں دیکھا گیا۔‘‘ ذرائع نے مزید کہا کہ ’’اس فلم کے ذریعے ٹائیگر ایکشن کے ایک نئے دائرے میں قدم رکھیں گے۔ مقصد یہ ہے کہ ان کی اسکرین امیج کو نئے انداز میں پیش کیا جائے اور ان کی جسمانی صلاحیتوں کو ایک بالکل نئے لیول تک لے جایا جائے۔‘‘ اس کے ساتھ ٹائیگر شروف اس وقت مراد کھیتانی کے پروجیکٹ پر بھی کام کر رہے ہیں، جس کی ہدایتکاری سچن روی کر رہے ہیں۔

اداکار کی آنے والی فلم ’’لگ جا گلے‘‘ بھی خبروں میں ہے، جس میں وہ لکشیا اور جھانوی کپور کے ساتھ نظر آئیں گے۔ رپورٹس کے مطابق یہ فلم ایک انتقامی کہانی پر مبنی ہوگی، جس میں شدید ایکشن سیکوئنسز شامل ہوں گے اور ٹائیگر اور لکشیا کے درمیان ٹکراؤ اس کی نمایاں جھلک ہوگا، جبکہ جانہوی کا کردار جذباتی گہرائی فراہم کرے گا۔ مزید اطلاعات کے مطابق، ٹائیگر شروف ایک اور ایکشن پروجیکٹ میں ودیوت جموال کے ساتھ بھی نظر آ سکتے ہیں، جس کی ہدایت کاری ممکنہ طور پر ملاپ زویری کریں گے۔

یہ بھی پڑھئے: اکشے کمار کا اسرانی کو خراج عقیدت، ’’بھوت بنگلہ‘‘ میرے لئے فلم نہیں، ایک یاد ہے

اسی دوران ایک اور رپورٹ میں یہ بھی سامنے آیا ہے کہ سنیل شیٹی بھی ٹائیگر شروف کی ایک آنے والی فلم کی کاسٹ میں شامل ہو گئے ہیں، جس کی شوٹنگ اپریل میں شروع ہو کر جولائی تک مکمل ہونے کی توقع ہے، تاہم اس حوالے سے باضابطہ تصدیق ابھی باقی ہے۔ ٹائیگر شروف کی مسلسل ایکشن فلموں میں موجودگی اور مختلف پروجیکٹس میں شمولیت اس بات کی نشاندہی کرتی ہے کہ وہ اپنی اسکرین امیج کو مزید وسعت دینے اور نئے تجربات کرنے کیلئے تیار ہیں۔