فلم ’’سیارہ‘‘ سے شہرت حاصل کرنے والی اداکارہ انیت پڈا اب ایک سنجیدہ اور طاقتور کردار کے ساتھ ویب سیریز ’’ہنکار: دی رور‘‘ میں نظر آنے والی ہیں۔ سیریز کا ٹریلر جاری کردیا گیا ہے، جس میں انیت پڈا اور فاطمہ ثنا شیخ ایک بااثر مذہبی شخصیت ’باپ جی‘ کے خلاف انصاف کی جنگ لڑتی دکھائی دے رہی ہیں۔

فلم  ’’سیارہ‘‘ سے شہرت حاصل کرنے والی اداکارہ  انیت پڈا اب ایک سنجیدہ اور طاقتور کردار کے ساتھ ویب سیریز ’’ہنکار: دی رور‘‘ میں نظر آنے والی ہیں۔ سیریز کا ٹریلر جاری کردیا گیا ہے، جس میں انیت پڈا اور  فاطمہ ثنا شیخ  ایک بااثر مذہبی شخصیت ’باپ جی‘ کے خلاف انصاف کی جنگ لڑتی دکھائی دے رہی ہیں۔ یہ سیریز طاقت، اثر و رسوخ، قانون اور سچ کی تلاش کے گرد گھومتی ہے۔ 

ٹریلر میں انیت پڈا ۱۷؍ سالہ مینو راوت  کا کردار ادا کر رہی ہیں، جو ایک اسکول کی طالبہ ہے۔ مینو ایک بااثر اور عقیدت مندوں کی بڑی تعداد رکھنے والے شخص  سنیل چکوسی عرف ’باپ جی‘  کے خلاف پولیس اسٹیشن پہنچ کر شکایت درج کرانے کی کوشش کرتی ہے۔ الزام کے بعد معاملہ محض ایک شخص تک محدود نہیں رہتا بلکہ پولیس، عدالت اور میڈیا سمیت پورا نظام اس کیس کی زد میں آجاتا ہے۔ 

یہ بھی پڑھئے:اے آر رحمان نے نیٹ فلکس کی ’ ’بیسٹ آف دی بیسٹ‘‘کیلئے گانا کمپوز کیا

ٹریلر میں دکھایا گیا ہے کہ ’باپ جی‘ کا اثر و رسوخ اتنا زیادہ ہے کہ پولیس بھی ابتدا میں شکایت درج کرنے سے ہچکچاتی ہے۔ تاہم مینو ہمت نہیں ہارتی اور صاف مؤقف اختیار کرتی ہے کہ جب تک اس کی شکایت باضابطہ طور پر درج نہیں کی جاتی، وہ پولیس اسٹیشن سے نہیں جائے گی۔ اس طرح اس کا کردار خاموشی سے ظلم برداشت کرنے کے بجائے سچ اور انصاف کے لیے آواز اٹھانے والی نوجوان لڑکی کے طور پر سامنے آتا ہے۔ 
 فاطمہ ثنا شیخ  سیریز میں ایک پولیس افسر  اے سی پی جسلین سنگھ سونی  کا کردار ادا کر رہی ہیں، جو مینو کے کیس کی تحقیقات کی ذمہ داری سنبھالتی ہیں۔ کہانی آگے بڑھنے کے ساتھ پولیس تفتیش، قانونی جنگ اور عوامی رائے ایک دوسرے سے جڑتے نظر آتے ہیں، جبکہ یہ سوال بھی اٹھتا ہے کہ طاقتور شخصیت کے خلاف لگائے گئے الزام کے بعد سچ تک پہنچنا کتنا مشکل ہوسکتا ہے۔ 
سیریز میں  محمد ذیشان ایوب، ارجن ماتھر، رگھوبیر یادو، رام کپور اور زویا حسین  بھی اہم کرداروں میں شامل ہیں۔ محمد ذیشان ایوب اور رام کپور کہانی کے عدالتی پہلو میں اہم کردار ادا کرتے دکھائی دیتے ہیں  جبکہ میڈیا اور عدالت کے ذریعے کیس کے مختلف پہلو سامنے آتے ہیں۔ 
’’ہنکار: دی رور‘‘ کی ہدایت کاری  کرن ڈی کپاڈیا، نتیا مہرا اور ہیرَز مرفتیہ  نے کی ہے۔ سیریز کو  برلا اسٹوڈیوز  اور  اپلاؤز انٹرٹینمنٹ  نے پرینکا چوپڑا کے پرپل پیبل پکچرز  اور دیگر شراکت داروں کے ساتھ تیار کیا ہے۔ اس کی کہانی طاقتور نظام کے سامنے سچ، انصاف اور مزاحمت کے موضوعات کو نمایاں کرتی ہے۔ 

یہ بھی پڑھئے:ایشان کشن کی قیادت میں ایسٹ زون نے۱۳؍ سال بعد دلیپ ٹرافی جیتی

انیت پڈا نے بتایا کہ انہوں نے ’’سیارہ‘‘ سے پہلے ’’ہنکار‘‘ کی شوٹنگ کی تھی اور یہ پروجیکٹ کافی عرصے سے ان کے سفر کا حصہ رہا ہے۔ ’’سیارہ‘‘ کی کامیابی کے بعد اب ناظرین انہیں ایک بالکل مختلف اور سنجیدہ کردار میں دیکھیں گے، جس سے اس سیریز کو لے کر شائقین کی دلچسپی مزید بڑھ گئی ہے۔  ’’ہنکار: دی رور‘‘ ۲۵؍ ستمبر ۲۰۲۶ء سے  جیو ہاٹ اسٹار پر اسٹریمنگ کے لیے دستیاب ہوگی۔  سیریز کا مرکزی سوال یہی ہے کہ جب ایک نوجوان لڑکی کسی طاقتور شخصیت کے خلاف آواز اٹھاتی ہے تو کیا قانون، عدالت اور معاشرہ اس کا ساتھ دیتے ہیں یا طاقت اور اثر و رسوخ سچ کی آواز کو دبا دیتے ہیں؟