کھیتوں میں چھپے پراسرار راز اور کسی ان دیکھی طاقت کے زیرِ اثر زندگی گزارنے والے گاؤں کی کہانی، پہلی بار زراعت کو نفسیاتی اور مافوق الفطرت خوف کی بنیاد بنایا گیا، نیہا سرگم اور ویریندر سکسینہ بھی اہم کرداروں میں نظر آئیں گے۔

کھیتوں میں فصلیں اگتی ہیں، لیکن کیا یہی کھیت کسی دن خوف کی وجہ بھی بن سکتے ہیں؟ اداکار جیکی شروف اور شرد کیلکر کی نئی ہارر فلم ’کالی کھیتی‘ کا ٹریلر جاری کردیا گیا ہے، جو ناظرین کو ایک ایسے گاؤں کی پراسرار دنیا میں لے جاتا ہے جہاں کھیتی باڑی محض روزگار یا فصل اگانے کا ذریعہ نہیں رہتی، بلکہ ایک خوفناک قوت کا روپ اختیار کرتی دکھائی دیتی ہے۔ فلم کی کہانی کھیتوں اور ان کی زمین میں دفن پرانے رازوں کے گرد گھومتی ہے۔ بلیک کینوس اسٹوڈیو کے بینر تلے بننے والی یہ فلم ۲۰؍ نومبر ۲۰۲۶ء کو سنیما گھروں میں ریلیز ہوگی۔ ٹریلر میں ایک ایسے گاؤں کی جھلک دکھائی گئی ہے جہاں کے باشندے کسی ان دیکھی اور پراسرار طاقت کے خوف میں زندگی گزارنے پر مجبور ہیں۔ اس خوف کا تعلق گاؤں کی زمین اور کھیتوں سے ہے، جن کے ماضی میں کئی ایسے راز پوشیدہ ہیں جو اب لوگوں کی زندگیوں پر اثر انداز ہوتے دکھائی دیتے ہیں۔ فلم کا ماحول ابتدا ہی سے سنسنی اور پراسراریت سے بھرا نظر آتا ہے، جہاں ہر نئی جھلک کسی انجانے خطرے کا احساس دلاتی ہے۔

A sinister secret lies beneath the soil, waiting to unfold! Jackie Shroff and Sharad Kelkar take centre stage in #KaaliKheti, a gripping tale of psychological rural horror that promises a chilling cinematic experience. Trailer out now! https://t.co/cuL8uOC2NL

— Tellychakkar.com (@tellychakkar) November 12, 2026

’کالی کھیتی‘ کی خاص بات اس کا منفرد موضوع ہے۔ عموماً ہارر فلموں میں آسیب زدہ حویلیوں، بھوتوں، پراسرار گھروں یا کسی مافوق الفطرت مخلوق کو خوف کی بنیاد بنایا جاتا ہے، لیکن اس فلم میں زراعت اور کھیتی باڑی کو ہی دہشت کی کہانی کا مرکزی حوالہ بنایا گیا ہے۔ یہاں زمین محض فصل اگانے کی جگہ نہیں بلکہ ایک زندہ اور پراسرار قوت کی طرح محسوس ہوتی ہے، جس کے اثر سے پورا گاؤں باہر نکلنے سے قاصر ہے۔ فلم کا ٹریلر اس خیال کو نفسیاتی خوف اور دیہی پس منظر کے ساتھ پیش کرتا ہے۔ فلم میں جیکی شروف ایک اہم کردار میں نظر آئیں گے۔ وہ اپنے مخصوص انداز اور تجربہ کار اداکاری کے ذریعے کہانی کے پراسرار ماحول کو مزید گہرا کرتے دکھائی دیتے ہیں۔ شرد کیلکر بھی اپنے سنجیدہ اور پُراثر انداز میں اہم کردار ادا کررہے ہیں۔ دونوں اداکاروں کی موجودگی فلم کے خوفناک ماحول کو مزید مؤثر بنانے میں اہم کردار ادا کرسکتی ہے۔

یہ بھی پڑھئے: شاہ رخ خان کے محل نما گھر ’منت‘ میں کرائیوتھراپی کی سہولت اور ذاتی سنیما ہال بھی موجود

فلم کی کہانی اور ہدایت کاری کی ذمہ داری حارث امتیاز خان نے سنبھالی ہے، جبکہ ثنا خان اس کی پروڈیوسر ہیں۔ نیہا سرگم، ویریندر سکسینہ اور شاجی چودھری بھی فلم میں اہم کرداروں میں دکھائی دیں گے۔ بلیک کینوس اسٹوڈیو کے بینر تلے تیار ہونے والی اس فلم کی ریلیز کی تاریخ ۲۰؍ نومبر ۲۰۲۶ء مقرر کی گئی ہے۔ ٹریلر میں اگرچہ گاؤں، اس کے کھیتوں اور وہاں بسنے والے لوگوں پر چھائے خوف کی جھلک دکھائی گئی ہے، لیکن کہانی کے کئی اہم پہلو ابھی پردے میں رکھے گئے ہیں۔ زمین کے ماضی میں ایسا کیا پوشیدہ ہے جس نے پورے گاؤں کو خوفزدہ کررکھا ہے؟ کھیتوں سے جڑی پراسرار طاقت کی حقیقت کیا ہے؟ اور کیا گاؤں کے لوگ اس خوف سے نجات حاصل کرپائیں گے؟ فلم ان سوالات کے جواب بڑے پردے پر دے گی۔ ’کالی کھیتی‘ کا موضوع اسے عام ہارر فلموں سے الگ بناتا ہے۔ زراعت اور دیہی زندگی سے وابستہ ایک مانوس ماحول کو خوف اور پراسراریت میں تبدیل کرنے کی یہ کوشش ناظرین کے لیے ایک مختلف تجربہ ثابت ہوسکتی ہے۔ اب دیکھنا یہ ہے کہ جیکی شروف اور شرد کیلکر کی یہ فلم 20 نومبر کو سنیما گھروں میں کس قدر دہشت پھیلانے میں کامیاب ہوتی ہے۔