بالی ووڈ اداکار سیف علی خان کی بہنیں سوہا اور صبا علی خان نے پہلی بار انکشاف کیا ہے کہ انہیں اپنے بھائی کی امریتا سنگھ سے شادی کی اطلاع گھر سے نہیں بلکہ اسکول میں ملی تھی۔ دونوں بہنوں نے بتایا کہ وہ اس وقت اسکول میں زیرِ تعلیم تھیں اور پرنسپل کے دفتر سے انہیں بلا کر کہا گیا کہ میڈیا میں چلنے والی خبروں کے بارے میں کسی سے کوئی بات نہ کریں، کیونکہ اس وقت تک خبر کی تصدیق نہیں ہوئی تھی۔

بالی ووڈ اداکار سیف علی خان کی بہنیں سوہا علی خان اور صبا علی خان نے اپنے خاندان کی ایک کم معروف یاد تازہ کرتے ہوئے بتایا ہے کہ انہیں اپنے بڑے بھائی کی امریتا سنگھ سے شادی کے بارے میں اس وقت معلوم ہوا جب وہ دونوں اسکول میں تھیں۔ یہ انکشاف انہوں نے نیہا دھوپیا اور انگد بیدی کے شو ’’Double Date‘‘ میں گفتگو کے دوران کیا۔ گفتگو کے دوران صبا علی خان نے کہا کہ ’’وہ اس وقت شادی کر چکے تھے جب ہم اسکول میں تھے۔‘‘ اس پر سوہا علی خان نے بھی اس بات کی تصدیق کرتے ہوئے کہا کہ ’’جی ہاں، میں بھی اسکول میں تھی جب ان کی شادی ہوئی۔‘‘ 

یہ بھی پڑھئے:جوس بٹلر ٹی۲۰؍ کرکٹ میں سب سے زیادہ رن بنانے والے بلے باز بن گئے

صبا علی خان نے بتایا کہ شادی کی خبر سامنے آنے کے بعد اسکول انتظامیہ نے فوری طور پر دونوں بہنوں کو پرنسپل کے دفتر بلایا۔ انہوں نے کہا کہ ’’ہمیں پرنسپل کے دفتر سے بلایا گیا اور کہا گیا، آپ لوگ کسی کو کچھ نہیں بتائیں گے، کیونکہ ہمیں خود نہیں معلوم کہ یہ خبر کتنی درست ہے، لیکن یہ نیوز میں آ چکی ہے۔‘‘ ان کے مطابق اسی وقت پہلی مرتبہ انہیں اندازہ ہوا کہ ان کے بھائی کی شادی کی خبر میڈیا میں گردش کر رہی ہے۔ جب شو کی میزبان نیہا دھوپیا نے پوچھا کہ کیا وہ شادی کی تقریب میں شریک نہیں ہوئیں، تو سوہا علی خان نے جواب دیا: ’’یہ سب بہت اچانک ہوا تھا۔ ہم اسکول میں تھے اور شادی بھی بہت آخری لمحوں میں طے ہوئی، اسی لیے ہم اس میں شامل نہیں ہو سکے۔‘‘
واضح رہے کہ سیف علی خان اور امریتا سنگھ نے ۱۹۹۱ء میں شادی کی تھی۔ اس وقت سیف اپنے فلمی کریئر کے آغاز پر تھے، جبکہ امریتا سنگھ بالی ووڈ کی معروف اداکارہ سمجھی جاتی تھیں۔ دونوں کی شادی اس وقت خاصی موضوعِ بحث بنی تھی، کیونکہ امریتا سنگھ عمر میں سیف علی خان سے بڑی تھیں۔ اس شادی سے ان کے ہاں دو بچوں، سارہ اور ابراہیم کی پیدائش ہوئی۔ بعد ازاں ۲۰۰۴ء میں دونوں نے باہمی طور پر علیحدگی اختیار کر لی۔ اس کے بعد ۲۰۱۲ء میں سیف علی خان نے اداکارہ کرینہ کپور سے دوسری شادی کی۔ 

یہ بھی پڑھئے:ورلڈ ٹیسٹ چیمپئن شپ پوائنٹس ٹیبل: پاکستان کی فتح سے ایک درجے کی ترقی

سوہا اور صبا علی خان کی یہ گفتگو سوشل میڈیا پر بھی توجہ کا مرکز بنی ہوئی ہے، کیونکہ اس سے پہلی بار یہ معلوم ہوا کہ پٹودی خاندان کی دونوں بہنیں بھی اپنے بھائی کی شادی سے قبل اس فیصلے سے پوری طرح آگاہ نہیں تھیں اور انہیں بھی اس خبر کا علم عام لوگوں کی طرح میڈیا کے ذریعے ہوا۔