۲۰۲۵ء میں ہندوستانی موسیقی نے زبان، صنف اور ثقافت کی تمام حدیں عبور کرتے ہوئے شائقین کے دل جیت لئے۔ فلمی اور غیر فلمی نغموں نے سوشل میڈیا، یوٹیوب اور اسٹریمنگ پلیٹ فارمز پر غیر معمولی مقبولیت حاصل کی۔ رومانوی دھنوں سے لے کر لوک اور علاقائی موسیقی تک، ہر انداز کے گیت ٹرینڈ کرتے رہے۔ اس سال فلم ’’سیارہ‘‘ کا ٹائٹل ٹریک سب سے زیادہ سنا گیا جبکہ تیلگو، مراٹھی اور ہریانوی گانوں نے بھی قومی سطح پر زبردست پذیرائی حاصل کی۔ یہ نغمے ۲۰۲۵ء میں عوامی ذوق اور موسیقی کے بدلتے رجحانات کی عکاسی کرتے ہیں۔

سیارہ
فلم ’’سیارہ‘‘ کا ٹائٹل ٹریک سال ۲۰۲۵ء کا سب سے زیادہ ٹرینڈ کرنے والا نغمہ رہا۔ ارشاد کامل کے بول اور فہیم عبداللہ کی روح کو چھو لینے والی آواز نے اس گیت کو بے مثال مقبولیت دلائی، جس کے یوٹیوب پر ۵۷؍ کروڑ سے زائد ویوز ریکارڈ ہوئے۔

رانو بمبئی کی رنو
تیلگو زبان کا یہ مقبول گانا اپنی منفرد دھن اور جذباتی پیشکش کے باعث خاصا مقبول ہوا۔ پربھا کی آواز اور کلیان کیز و رامو راٹھور کی موسیقی نے اس نغمے کو علاقائی حدوں سے نکال کر پورے ملک میں ٹرینڈ بنا دیا۔

شیکی
مراٹھی زبان کے گیت شیکی نے ۲۰۲۵ء میں ریکارڈ توڑ مقبولیت حاصل کی۔ سنجو راٹھور کی آواز اور بول نے نوجوانوں کو خاص طور پر متاثر کیا، جبکہ یوٹیوب پر ۵۰؍ کروڑ سے زائد ویوز نے اسے سال کے ہٹ گانوں میں شامل کر دیا۔

رانجھن
فلم ’’دو پتی‘‘ کا گانا رانجھن رومانوی موسیقی کے شائقین میں بے حد مقبول رہا۔ پرمپرا ٹھاکر کی سریلی آواز اور کوثر منیر کے دل کو چھو لینے والے بول نے اسے یوٹیوب پر ۴۰؍ کروڑ سے زائد ویوز دلائے۔

رام جھول بولے گی
ہریانوی گانا رام جھول بولے گی اپنی لوک دھن اور توانائی سے بھرپور انداز کی وجہ سے ٹرینڈ میں رہا۔ معصوم شرما اور شینم کیتھولک کی آوازوں کے ساتھ مکیش ججی کے بولوں نے اسے یوٹیوب پر ۴۰؍ کروڑ سے زائد ویوز تک پہنچایا۔