مہاراشٹر کی زمین قلعوں کی سرزمین کہی جاتی ہے۔یہاں واقع متعدد قلوںمیںالنگ قلعہ بھی ایک قلعہ رہا ہے۔یہ ضلع ناسک میں واقع ایک تاریخی و قدرتی اہمیت کا حامل قلعہ ہے، جو اپنے شاندار محل وقوع، مہم جوئی کے مواقع، اور ماضی کی نشانیوں کے باعث ٹریکنگ کے شوقین سیاحوں میں خاصا مشہور ہے۔اسےاکثر ’النگ-مدن-کلنگ‘ (اے ایم کے) ٹریکنگ روٹ کے حصے کے طور پر بھی جانا جاتا ہے۔یہ تینوں قلعے یعنی النگ،مدن اور کلنگ مل کر ایک دفاعی مثلث بناتےتھے، جن کامقصد مغربی گھاٹوں کے راستے سے آنے والے حملہ آوروں پر نظر رکھنا تھا۔ وقت کے ساتھ یہ قلعہ برطانوی عہد میں ویران پڑ گیا، مگر اس کی دیواریں اب بھی ماضی کی جنگی حکمتِ عملیوں کی داستان سناتی ہیں۔

النگ قلعہ مغربی گھاٹ کے کلسوبائی پہاڑی سلسلے پر سطح سمندر سےتقریباً۴؍ہزار ۵۰۰؍فٹ کی بلندی پر واقع ہے۔ یہاں تک پہنچنے کا سفر آسان نہیں۔راستہ گھنے جنگل، کھڑی چٹانوں، اور بعض مقامات پر سیدھے پتھریلے حصوں سے گزرتا ہے۔ یہی وجہ ہے کہ النگ کو مہاراشٹر کے سب سے مشکل ٹریکنگ مقامات میں شمار کیا جاتا ہے۔ قلعےکے اوپر پہنچنے پر ایک وسیع پتھریلا میدان، پانی کے قدیم ٹینک، اور کچھ غار نماکمرے دیکھنے کو ملتے ہیں جنہیں کبھی سپاہیوں نے رہائش یا اسلحہ رکھنے کے لیے استعمال کیا ہوگا۔

یہاں سے پورے سہیادری سلسلے کا دلکش منظر دکھائی دیتا ہے۔ بادلوں میں چھپا ہوا مدن گڑھ، نیچے بہتی ندیوں کا شور، اور دور افق پر سورج کا ابھرتا ہوا رنگ۔

النگ قلعے کی اصل تعمیر کے بارے میں مستند معلومات کم ہیں۔ کہا جاتا ہے کہ اسے مقامی قبائل نے تعمیر کیا اور بعد میں یہ قلعہ مراٹھا، مغل اور بالآخر انگریزوں کے قبضے میں آیا۔قبائلی و انقلابی دور میں یہ پناہ گاہ رہا، اور برطانوی دور میں باغیوں کو روکنے کے لیے اس کے سیڑھیوں کو تباہ کر دیا گیا۔ قلعے پر قد یم دور،مغل اور مراٹھاسلطنتوں کے اثرات دیکھنے کو ملتے ہیں۔

النگ قلعہ اپنےدشوار راستوں کے باعث پیشہ ور ٹریکرز کے لیے ایک خواب کی حیثیت رکھتاہے۔عام سیاحوں کے لیے یہاں جانا آسان نہیں، کیوں کہ چڑھائی خطرناک ہے اور کئی جگہ اوپر چڑھنے کیلئےرسی کی ضرورت پڑتی ہے۔ اکثر ٹریکرز النگ، مدن، اور کلنگ تینوںقلعوں کو ایک ہی مہم میں دیکھنے کی کوشش کرتے ہیں،جسے اے ایم کے ٹریک کہا جاتا ہے۔یہ مہم دو سے تین دن میں مکمل کی جاتی ہے،اور اس کے لیے جسمانی طور پر فٹ ہونا اور تجربہ کار گائیڈ کے ساتھ جانا ضروری ہے۔نکسل ندی کے کنارے واقع چھوٹے گاؤں گہن، امبیواڑی اور کالہ رادھا سے قلعے تک پہنچنے کا راستہ نکلتا ہے۔ 

قلعے کے اندر رات گزارنے کے لیے غاروں کا انتظام ہے۔ یہاں سےوادیوں و پہاڑی سلسلوں کے حسین مناظر دیکھنے کو ملتے ہیں۔ فوٹوگرافی، قلعوںاور تاریخی کھنڈروں کی سیر کی جاسکتی ہے۔

ریل کے ذریعے:النگ قلعہ کا سب سے قریبی اسٹیشن اگت پوری ریلوے اسٹیشن ہےجو کہ ریلوے سے اچھی طرح جڑا ہوا ہے۔اگت پوری سے آپ پرائیویٹ گاڑی یا آٹو کی خدمات حاصل کرسکتے ہیں یا بس سے سفر کرسکتے ہیں۔یہ آپ کو امبیواڑی تک پہنچا دیں گے جو کہ النگ قلعہ کا نقطہ آغاز ہے۔

سڑک کے ذریعے:النگ قلعہ تک جانے کیلئے ممبئی یا تھانے سے آپ کو کسارا یا اگت پوری جانا ہوگا۔ اس کے بعد آپ کو امبیواڑی کی جانب سفر کرنا ہوگا۔ آپ گھوٹی سے امبیواڑی کیلئے بس کی خدمات بھی حاصل کرسکتے ہیں۔امبیواڑی سے آپ کو النگ قلعہ کیلئے ٹریکنگ شروع کرنا ہوگی۔