چھتیس گڑھ کے شہر بھلائی میں حالانکہ اسٹیل پلانٹ دلچسپی کا سب سے بڑا مرکز ہے لیکن میتری باغ، خوشبو پارک، درگ کاقلعہ، سیوک سینٹر بھی ہے۔

چھتیس گڑھ کا صنعتی دل، بھلائی، بظاہر ایک فولادی شہر کے طور پر جانا جاتا ہے، جہاں کا سب سے بڑا تعارف ہندوستان کا مشہور ’’بھلائی اسٹیل پلانٹ‘‘ہے۔ لیکن اگر آپ اس شہر کے صرف صنعتی پہلو پر نگاہ ڈالیں گے تو یہ ایک بڑی ناانصافی ہو گی، کیونکہ بھلائی محض فیکٹریوں، مشینوں اور دھوئیں کا شہر نہیں، بلکہ یہ ایک ایسا مقام ہے جہاں قدرتی خوبصورتی، تہذیبی ورثہ اور جدیدیت کا حسین امتزاج ملتا ہے۔ یہاں اور اس کے آس پاس قدرتی خوبصورتی، روحانی مقامات، اور تاریخی اہمیت کے مقامات موجود ہیں جو سیاحوں کو اپنی جانب کھینچتے ہیں۔ 
بھلائی کی تاریخ 
 بھلائی کا نام دراصل ایک چھوٹے سے گاؤں سے منسوب ہے، جویہاں اسٹیل پلانٹ قائم ہونے سے قبل موجود تھا۔ آزادی کے بعد صنعتی ترقی کی ایک بڑی علامت کے طورپر ۱۹۵۵ءمیں سوویت یونین کے تعاون سے یہاں اسٹیل پلانٹ کی بنیاد رکھی گئی۔ یہ قدم نہ صرف شہربلکہ پورے ہندوستان کی صنعتی سمت کا تعین کرنے والا ثابت ہوا۔ بھلائی رفتہ رفتہ مزدوروں، انجینئرز، ڈاکٹروں، تعلیم یافتہ افراد اور دیگر شعبہ ہائے زندگی کے ماہرین کا مرکز بن گیا۔ اگرچہ بھلائی کو روایتی سیاحتی شہروں کی فہرست میں کم ہی شامل کیا جاتا ہے، لیکن یہ شہر کئی ایسے گوشے رکھتا ہے جو دیکھنے والوں کو حیران کر دیتے ہیں۔ 
خوشبو پارک
 یہ ایک چھوٹا مگر خوبصورت باغ ہے جو مقامی لوگوں کے لیے سیر و تفریح کی جگہ ہے۔ خاص طور پرمعمرشہری یہاں صبح کی سیر کے لیے آتے ہیں۔ یہ پارک پھولوں کی خوشبو سے مہکتا ہے اور شام کے وقت بچوں اور خاندانوں کی پسندیدہ جگہ بن جاتا ہے۔ یہاں پائی جانے والی خوشبو کی وجہ سے ہی اسے خوشبو پارک کہا جاتا ہے۔ 
دُرگ ضلع کا قلعہ
 بھلائی سے ملحقہ دُرگ ضلع میں واقع یہ قلعہ تاریخی لحاظ سے اہمیت رکھتاہے۔ حالانکہ اب قلعے کی حالت کچھ خاص نہیں بچی، مگر اس کے آثارِ قدیمہ تاریخ کے شوقین افراد کو ضرور لبھاتے ہیں۔ 
میتری باغ
 میتری باغ بھلائی اسٹیل پلانٹ کی جانب سے قائم کردہ ایک خوبصورت چڑیاگھر اور باغیچہ ہے۔ یہ نہ صرف ایک تفریحی مقام ہےبلکہ یہاں کے شہریوں کے لیے سکون اور فطرت کے قریب وقت گزارنے کی بہترین جگہ ہے۔ یہاں چڑیا گھر میں شیر، چیتا، ریچھ، بندر، اور مختلف قسم کے پرندے دیکھنے کو ملتے ہیں۔ میتری باغ کے اندر ایک خوبصورت جھیل بھی ہے، جہاں کشتی رانی کی سہولت دستیاب ہے۔ یہاں کی موسیقی کے ساتھ رنگ برنگے فوارے (Musical Fountain) شام کو دیکھنے کے قابل ہوتے ہیں۔ یہ جگہ خاص طور پر بچوں اور فیملی پکنک کے لیے مثالی ہے۔ 
سیوِک سینٹر
 یہ علاقہ بھلائی کا تجارتی اور ثقافتی مرکز ہے۔ یہاں مالز، کپڑوں کی دکانیں، ریسٹورنٹس، اور ہینڈلوم شاپس موجود ہیں۔ شام کے وقت یہاں چہل قدمی کرنے، خریداری کرنے اور مقامی اسٹریٹ فوڈ سے لطف اندوز ہونے کے لیے رش لگا رہتا ہے۔ یہاں اکثر ثقافتی تقریبات اور نمائشیں بھی منعقد کی جاتی ہیں۔ 
 تندو لا ڈیم 
 یہ مقام بھلائی سے تھوڑے فاصلے پر ہے، مگر قدرتی مناظر اور پانی کےخوبصورت نظارے کے لیے مشہور ہے۔ مچھلی پکڑنے، فوٹوگرافی، اور پرسکون شام گزارنے کے لیے بہترین جگہ۔ مانسون کے دوران یہاں کی خوبصورتی اور بڑھ جاتی ہے۔ 
 ٹاؤن شپ کا ڈھانچہ
 اگرچہ بھلائی اسٹیل پلانٹ ایک صنعتی ادارہ ہے، مگر اس کی ٹاؤن شپ، جو باقاعدہ منصوبہ بندی کے ساتھ تعمیر کی گئی ہے، خود میں ایک نمونۂ شہری ترقی ہے۔ شہر کی سڑکیں، سادگی، درختوں کی قطاریں، اور کھلے میدان ایک الگ ہی نظارہ پیش کرتے ہیں۔ 
اُتائی
 بھلائی کے مضافات میں واقع اُتائی ایک تاریخی اور روحانی مقام ہے۔ یہاں پر اُتائی شیو مندر اور اُتائی ڈیم دونوں مشہور مقامات ہیں۔ قدرتی حسن، خاموشی اور سادگی کے متلاشی لوگوں کے لیے یہ ایک پُرامن مقام ہے۔