آج ریان پراگ کی قیادت میں رائلز اور اکشر پٹیل کی کپتانی والی کیپیٹلز کی ٹیمیں آمنے سامنے ہوںگی،مچل اسٹار کی شمولیت سے گیندبازی کے شعبہ میں دہلی کو راحت ملنے کی امید۔

دہلی کیپیٹلز کے پاس گزشتہ چند میچوں کے مایوس کن نتائج پر غور کرنے کے لئےزیادہ وقت نہیں ہے کیونکہ ٹیم کو جمعہ کو یہاں انڈین پریمیر لیگ کے میچ میں خود اعتمادی سے بھرپور راجستھان رائلز کا سامنا کرنا ہے۔ اکشر پٹیل کی قیادت والی دہلی کی ٹیم کیلئے یہ سیزن کافی مشکلات بھرا رہا ہے۔ گزشتہ ۲؍ میچوں میں ٹیم کی کارکردگی میں کافی اتار چڑھاؤ دیکھنے کو ملا۔ ایک طرف انہوں نے ۲۵۰؍سے زائد کا اسکور بنایا لیکن مخالف ٹیم نے عالمی ریکارڈ بناتے ہوئے وہ ہدف حاصل کر لیا، وہیں دوسری طرف وہ رائل چیلنجرز بنگلور کے خلاف صرف ۷۵؍رنوں پر ڈھیر ہو گئے۔اس کے علاوہ اس ماہ کے آغاز میں گجرات ٹائٹنز کے خلاف ملنے والی ایک رن کی شکست نے دہلی کو جذباتی طور پر کافی گہرا زخم دیا ہے۔

یہ بھی پڑھئے: بنگلہ دیش کی خاتون ٹیم کو شکست دے کر سری لنکا کا سیریز پر قبضہ

دہلی ۳؍ فتوحات اور ۴؍ شکستوں کے ساتھ وہ پوائنٹس ٹیبل میں ساتویں نمبر پر ہے اور انہیں جلد ہی اپنی کارکردگی میں بہتری لانے کی ضرورت ہے۔دہلی کے لئے سب سے بڑی تشویش ان کی بلے بازی میں تسلسل کی کمی رہی ہے۔ کے ایل  راہل، ڈیوڈ ملر، ٹرسٹن اسٹبس اور سمیر رضوی جیسے کھلاڑیوں نے وقفے وقفے سے اچھا  تعاون دیا ہے لیکن پوری ٹیم مل کر ایک ساتھ شاندار کارکردگی دکھانے میں ناکام رہی ہے۔گزشتہ میچ میں ابھیشیک پوریل نے امپیکٹ پلیئر کے طور پر  بلے بازی کرتے ہوئے ٹیم کو شرمناک اسکور پر آل آؤٹ ہونے سے بچایا تھا۔ یہ اس میچ کے چند مثبت پہلوؤں میں سے ایک تھا۔ ایسے میں ٹیم مینجمنٹ انہیں پلیئنگ الیون میں موقع دینے کے بارے میں سوچ سکتی ہے۔

گیندبازی کے محاذ پر کچھ اچھی خبریں بھی ہیں۔  تیز گیندباز مچل اسٹارک یکم مئی سے کھیلنے کے لئے کرکٹ آسٹریلیا سے منظوری ملنے کے بعد ٹیم میں واپسی کے لئے تیار ہیں۔ لونگی اینگیڈی کی عدم دستیابی کے باعث اسٹارک کا ٹیم میں شامل ہونا دہلی کے لئے ایک انتہائی ضروری اور صحیح وقت پر ملنے والا سہارا ثابت ہو سکتا ہے۔ امید ہے کہ وہ کائل جیمیسن یا دشمنتھا چمیرا میں سے کسی ایک کی جگہ لیں گے۔

گزشتہ میچ میں ۷۵؍ رنوں کے معمولی ہدف کا دفاع کرنے کی کوشش میں  دہلی کیپیٹلز کے  گیندباز کچھ خاص کمال نہیں دکھا سکے تھے، لیکن اب انہیں راجستھان رائلز کے مضبوط بیٹنگ آرڈر کے خلاف مزید درست  بولنگ کرنی ہوگی۔ راجستھان کا ٹاپ آرڈر کافی جارحانہ رہا ہے۔ نوجوان بلے باز ویبھو سوریہ ونشی نے بغیر کسی خوف کے جسپریت بمراہ، جوش ہیزل ووڈ اور پیٹ کمنز جیسے عالمی معیار کے گیندبازوں کا شروع سے ہی ڈٹ کر سامنا کیا ہے، تو وہیں یشسوی جیسوال بھی بہترین فارم میں نظر آ رہے ہیں۔

یہ بھی پڑھئے: جونٹی روڈز، فاف ڈو پلیسس اور ہینرک کلاسین نئی روٹرڈیم فرنچائز کے مالک بنے

پوائنٹس ٹیبل میں چوتھے نمبر پر براجمان راجستھان رائلز کی ٹیم مکمل اعتماد کے ساتھ اس میچ میں اتر رہی ہے۔ حال ہی میں انہوں نے پنجاب کنگز کو اس سیزن کی پہلی شکست کا مزہ چکھایا تھا۔ یہ ۹؍ میچوں میں ٹیم کی چھٹی فتح تھی۔راجستھان کے لئے ایک اور مثبت بات یہ ہے کہ سست آغاز کے بعد اب ان کا مڈل آرڈر بھی فارم میں لوٹ آیا ہے۔ اس سے انہیں مزید توازن ملتا ہے اور پوری اننگز میں انہیں روکنا مشکل ہو جاتا ہے۔دباؤ کا شکار دہلی کے اٹیک کے خلاف راجستھان کی ٹیم ایک بار پھر عمدہ کارکردگی دکھانا چاہے گی۔ دہلی کے لئے چیزیں واضح ہیں۔ بلے بازوں کو انفرادی کوششوں پر انحصار کرنے کے بجائے مجموعی کارکردگی دکھانے کی ضرورت ہے۔ اسٹارک کی واپسی کے ساتھ گیندبازوں کو رن ریٹ پر قابو پانے کے طریقے ڈھونڈنے ہوں گے خاص طور پر جارحانہ ٹاپ آرڈر کے خلاف۔شائقین ایک دلچسپ میچ کی امید کر سکتے ہیں۔