سیریز کی دوسری فلم سے کہانی کو آگے بڑھایا گیا ہے لیکن اس کی کہانی موہن لال کی اصل ملیالم فلم سے مختلف بنائی گئی ہے، اداکاری بہت عمدہ ہے۔

فلم کی کہانی

کہانی۲۰۲۲ءمیںریلیز ہونے والی ’دریشیم۲؍‘ کے واقعات کوآگےبڑھاتی ہے۔اس لیے ’دریشیم۳؍‘دیکھنے سے پہلے پہلی دونوںفلمیں دیکھنا ضروری ہے، ورنہ کہانی کے کئی حصے سمجھنا مشکل ہوسکتا ہے۔فلم کا آغاز سابق آئی جی میرا دیشمکھ (تبو) سے ہوتا ہے، جو اپنے بیٹے سمیر کو کھونے کے بعد شدید مایوسی کا شکار ہوکر خودکشی کی کوشش کرتی ہے۔ اپنی بیوی کو اس حالت میں دیکھ کر اس کے شوہر مہیش دیشمکھ (رجت کپور) کیس دوبارہ کھولنے کی درخواست کرتے ہیں۔اس کے بعدکرائم برانچ کے ایس پی راج ویر سنگھ تومر (جے دیپ اہلاوت) کی کہانی میں انٹری ہوتی ہے۔ خود کو ’شنی‘ کہنے والا راج ویر وجے سلگاؤںکر (اجے دیوگن) اور اس کے خاندان پر اپنی نظریں گاڑ دیتا ہے۔ایک بار پھر وجے اور اس کا خاندان پولیس، مقدمے اور عدالت کے چکر میں پھنس جاتے ہیں۔ اس مرتبہ پولیس کے پاس وجے کے جھوٹ کو بے نقاب کرنے کے لیے نئے ثبوت بھی ہیں، گواہ بھی ہیں اور ایسا وکیل بھی ہے جس نے آج تک کوئی مقدمہ نہیں ہارا۔ اس وکیل کا نام اندر جیت شیٹی ہے، جس کا کردار پرکاش راج نے ادا کیا ہے۔پہلی دونوں فلموں میں سوال تھا کہ ’۲؍اکتوبر کو کیا ہواتھا؟‘ لیکن اب سوال بدل گیا ہے۔ اس مرتبہ سوال ہے کہ ’۲۳؍ جولائی کو کیا ہوا تھا؟‘ اور اس سوال کا جواب جاننے کیلئے آپ کو فلم دیکھنا ہوگی۔

ہدایت کاری

سنیما کے شائقین جانتے ہیں کہ ’دریشیم‘ فرنچائز دراصل موہن لال کی اداکاری سے سجی ملیالم فلم سیریز کا ہندی ری میک ہے، لیکن اس مرتبہ ہندی فلم کی کہانی کو اصل فلم سےمختلف رکھا گیا ہے۔ شریک مصنف اور ہدایت کار ابھیشیک پاٹھک نے کہانی کو نئے سرے سے تحریر کیا ہے۔فلم میں مقدمے کو مضبوط بنانے میں خاصا وقت لگایا گیا ہے۔ایک مرحلے پر اسکرین پلے ایک ہی انداز میں آگے بڑھتا محسوس ہوتا ہے۔ ایسے میں انسپکٹر گائےتونڈے (کملیش ساونت) کی مزاحیہ اداکاری اور امیل کیتن خان کے کچھ برجستہ مکالمے فلم کی رفتار کو برقرار رکھتے ہیں۔اس کےباوجود ’اب کیا ہوگا؟‘ والا تجسس مسلسل قائم رہتا ہے۔ تاہم اصل سنسنی انٹروَل کے بعد شروع ہوتی ہے، جب کہانی عدالت میں پہنچتی ہے اور کورٹ روم ڈراما شروع ہوتا ہے۔ خود وجے کے الفاظ میں، ’فلم سچی ہونی ضروری نہیں، سچی لگنی چاہیے۔‘ لیکن یہاں مقدمہ جس آسانی سے وجے کے حق میں جاتا دکھائی دیتا ہے، اسے مکمل طور پر قابلِ یقین ماننا مشکل ہوتا ہے۔

یہ بھی پڑھئے:سپریم ریسٹورنٹ: ساکی ناکہ میٹرو کے نیچےمنفرد ڈشیز کا اسٹیشن

اداکاری

اداکاری کی بات کی جائے تو اجے دیوگن نے ہمیشہ کی طرح اس فلم میں بھی زیادہ مکالموں کے بجائے اپنے سنجیدہ انداز اور آنکھوں کے تاثرات سے زبردست اداکاری کی ہے۔ انہوں نے وجے سلگاؤنکر کے کردار کو ایسی شناخت دے دی ہے جو اب ’دریشیم‘ فرنچائزکا لازمی حصہ بن چکی ہے۔جے دیپ اہلاوت نے ایس پی راج ویر کے کردار میں اپنی موجودگی کا بھرپور احساس دلایا ہے، جبکہ پرکاش راج بھی وکیل اندر جیت شیٹی کے کردار میں اپنا اثر چھوڑتے ہیں۔وجے کی بیوی نندنی کے کردار میں شریا سرن کے حصے میں ایک مضبوط منظر آیا ہے، جسے انہوں نے اچھی طرح نبھایا ہے۔ تبو اور رجت کپور بھی اپنے کرداروں میں مناسب نظر آتے ہیں۔

کیوں دیکھیں؟

اگر آپ ’دریشیم‘ فرنچائز کے مداح ہیں تو اجے دیوگن کی مضبوط اداکاری اور وجے سلگاؤنکر کے ایک بار پھر پولیس کے سامنے بچھائے گئے شطرنج کے کھیل کیلئے فلم ایک مرتبہ ضرور دیکھی جاسکتی ہے۔