فلسطینیوں کے تحفظ کا مطالبہ،فرانس، برطانیہ، جرمنی اور اٹلی کے وزرائے خارجہ کے مطابق یہ حملے بند ہونے چاہئیں۔خبر دار کیاکہ یہ تشدد شہریوںمیں خوف پیدا کررہا ہے۔

 فرانس، برطانیہ، جرمنی اور اٹلی نے مقبوضہ مغربی کنارے میں اسرائیلی آبادکاروں کے ہاتھوں فلسطینی شہریوں کے خلاف بڑھتے ہوئے تشدد کی سخت مذمت کرتے ہوئے اسے خطے میں عدم استحکام کا باعث اور سلامتی کی کوششوں کیلئے خطرہ قرار دیا ہے۔ چاروں ممالک کے وزرائے خارجہ نے اپنے مشترکہ بیان میں اقوام متحدہ کے اعداد و شمار کا حوالہ دیتے ہوئے بتایا کہ حالیہ ہفتوں میں آبادکاروں کے حملوں میں نمایاں اضافہ ہوا ہے۔ اقوام متحدہ کے دفتر برائے ہم آہنگیِ انسانی امور (او سی ایچ اے) کے مطابق صرف اکتوبر میں ۲۶۴؍ آبادکار حملے ریکارڈ کئے گئے جو ۲۰۰۶ء میں مانیٹرنگ کے آغاز کے بعد سے ایک ماہ میں سب سے زیادہ تعداد ہے۔ 
چاروں ممالک کے وزرائے خارجہ نے کہا کہ یہ حملے بند ہونے چاہئیں اور خبردار کیا کہ یہ تشدد نہ صرف شہریوں میں خوف پیدا کررہا ہے بلکہ امن کی کوششوں اور خود اسرائیل کی طویل المدت سلامتی کیلئے بھی خطرات پیدا کر رہا ہے۔ انہوں نے اسرائیلی حکومت پر زور دیا کہ وہ بین الاقوامی قانون کے تحت اپنی ذمہ داریاں پوری کرے اور مقبوضہ علاقوں میں فلسطینیوں کے تحفظ کو یقینی بنائے۔ بیان میں کہا گیا کہ اسرائیلی قیادت کی جانب سے کی جانے والی مذمتوں کو عملی اقدامات میں تبدیل کرنا ضروری ہے۔ 

یہ بھی پڑھئے:نیویارک: نومنتخب میئر ظہران ممدانی کیلئے تنخواہ میں ۱۶؍ فیصد اضافہ کا بل زیر غور

چاروںممالک نے اسرائیل سے مطالبہ کیا کہ وہ حملہ آوروں کے خلاف احتساب کو یقینی بنائے اور تشدد کے بنیادی اسباب کا خاتمہ کرے۔ وزرائے خارجہ نے کسی بھی قسم کے الحاق  جزوی یا مکمل کی مخالفت کا اعادہ کرتے ہوئے اسرائیلی توسیعِ آبادی کی پالیسیوں کو بین الاقوامی قانون کی خلاف ورزی قرار دیا۔ 

یہ بھی پڑھئے:اسرائیل ہندوستان کے قبیلہ منسی کے ہزاروں یہودیوں کو شہریت دے گا

انہوں نے خبردار کیا کہ فلسطینی اتھاریٹی کی مزید کمزوری غزہ میں مستقبل کی حکمرانی کے امکانات کو نقصان پہنچائے گی۔ وزرائے خارجہ نے اپنے بیان میں مذاکرات کے ذریعے دو ریاستی حل کی حمایت بھی دہرائی۔  واضح رہےکہ مغربی کنارے میںیہودی آباد کاروں کی جانب سے مسلسل فلسطینیوں پر حملے کئے جارہےہیں۔ یہاں تک کہ ان کی زیتوں کی فصلوں کو بھی نقصان پہنچا یاجا رہا ہے۔اسی طرح مغربی کنارےمیں اسرائیلی فوج کے جانب سے بھی چھاپے مارے جاتےہیں ۔ چھاپے کی کارروائی کے دوران فلسطینیوں کی املاک کو بھی نشانہ بنایا جا تا ہے۔