یہ جگہ سرسبز پہاڑی سلسلوں، زرعی زمینوں اور ندی نالوں کے باعث فطرت سے محبت رکھنے والوں کیلئے خاص اہمیت کی حامل ہے۔

جب انسان شہری ہنگاموں سے اکتا جائے اور روح کو ایک تازگی بخش لمحہ درکار ہو، تب وہ پہاڑوں، جھیلوں اور آبشاروں کی آغوش میں پناہ لیتا ہے۔ مہاراشٹر کی سرزمین، جو تاریخی قلعوں، عقیدت بھری خانقاہوں اور جدید شہروں کی آمیزش رکھتی ہے، فطری نظاروں سےبھی مالا مال ہے۔ انہی نظاروں میں سے ایک خاموش، پرُفطرت اور نسبتاً کم معروف مقامکمبھے آبشار ہے۔ 
کہاں واقع ہے
 کمبھے آبشاررتناگری ضلع میں واقع ہے۔ یہ جگہ ضلع کے کوکن خطے میں آتی ہے، جو اپنے سرسبزپہاڑی سلسلوں، زرعی زمینوں اور ندی نالوں کے باعث فطرت سے محبت رکھنے والوں کے لیے جنت کا درجہ رکھتی ہے۔ کمبھے گاؤں کے قریب واقع یہ آبشار زیادہ تر مقامی سیاحوں میں مشہور ہے، مگر اب دھیرے دھیرے باہر سے آنے والوں میں بھی اس کا چرچا بڑھ رہا ہے۔ 
فطرت کا نظارہ
 کمبھے آبشار کی سب سے خاص بات اس کا قدرتی، غیر مصنوعی اورپرسکون ماحول ہے۔ آس پاس ہریالی کی گہری چادر، پتھریلی زمین، اور پرندوں کی آوازیں یہ سب مل کر ایک ایسے گوشے میں لے جاتےہیں جہاں وقت تھم سا جاتا ہے۔ پانی ایک بلند چٹان سے نیچے گرتاہے اورنیچے ایک چھوٹا سا قدرتی تالاب بناتا ہے، جہاں مقامی لوگ اور سیاح نہانے، آرام کرنے اور تصاویر کھینچنے آتے ہیں۔ 
دیکھنے کابہترین وقت 
 کمبھے آبشار کو دیکھنے کا بہترین وقت برسات کے بعد کا مانسون سیزن ہے، یعنی جولائی سے ستمبر تک۔ اس موسم میں آبشار پوری روانی سےبہتا ہے اور ہریالی اپنے جوبن پر ہوتی ہے۔ تاہم، بارش کے دنوں میں راستہ کچھ پھسلن بھرا ہو سکتا ہے، اس لیے محتاط رہنا ضروری ہے۔ 
احتیاطی تدابیر
 چونکہ یہ مقام ابھی مکمل طورپر سیاحتی مرکز میں تبدیل نہیں ہوا، اس لیے وہاں سہولیات محدود ہیں۔ کوئی باقاعدہ ریسٹورنٹ یا ہوٹل موجود نہیں، اس لیے پانی، کھانے پینے کی اشیاء اور ضروری دوائیں ساتھ رکھنا دانشمندی ہوگی۔ 
شاندار نظارہ
 کمبھے آبشار ان لوگوں کیلئےبہترین مقام ہےجو ہجوم سے دور، خاموشی میں فطرت سے ہم کلام ہونا چاہتے ہیں۔ نہ یہاں کوئی شور، نہ بازاروں کی ہلچل، نہ مصنوعی سجاوٹ صرف سبزہ، پانی، پتھر اور فطرت کی موسیقی۔ یہ آپ کے ذہن اور دل پر وہ نقش چھوڑے گا جو کسی شاندار یادگار سے کم نہ ہوگا۔ 
 یہاں کیسے جائیں ؟
ٹرین سے:ممبئی سےرتناگری کے لیے روزانہ کئی ٹرینیں دستیاب ہیں، جیسے کونکن ریلوے کی ’مانڈوی ایکسپریس‘ یا ’نیترا ایکسپریس‘۔ یہ ٹرینیں ممبئی کے مختلف اسٹیشنوں (مثلاً دادر یا لوک مانیہ تلک ٹرمنس) سے روانہ ہوتی ہیں۔ 
بس کے ذریعہ : ممبئی سے ایم ایس آر ٹی سی کی بسیں یا پرائیویٹ ٹریول سروسزکے ذریعے رتناگری پہنچا جا سکتا ہے۔ ذاتی گاڑی یا بائیک سے جانا زیادہ آسان اور پُرلطف ثابت ہوتا ہے۔ 
مقامی سطح پر : رتناگری شہر سے کمبھے گاؤں تقریباً۳۵؍ تا ۴۰؍ کلومیٹر دورہے۔ اس فاصلے کو طے کرنے کے لیے لوکل جیپ، آٹو رکشہ یا ذاتی گاڑی کا استعمال کیا جا سکتا ہے۔ راستہ کچھ حصوں میں پکا ہے لیکن جیسے جیسے آپ گاؤں کی طرف بڑھتے ہیں، راستہ کچا اور جنگلاتی ہوتا جاتا ہے۔ 
آخری مرحلہ پیدل سفر: کمبھے گاؤں کے بعد آبشار تک تقریباًایک تا۲؍کلومیٹر پیدل چلنا پڑتا ہے۔ یہ حصہ گھنے سبزہ زاروں اور پتھریلے راستوں سے گزرتا ہے، جو ایک ہلکی پھلکی ٹریکنگ جیسا تجربہ فراہم کرتا ہے۔ بہتر ہے کہ ہلکے اور آرام دہ جوتے پہنے جائیں، اور موسم برسات میں محتاط رہیں کیونکہ راستہ پھسلن بھرا ہو سکتا ہے۔