ہمارے معاشرے میں جب کوئی لڑکی ۳۰؍سال کی ہو جاتی ہے تو ہر کوئی پھر چاہے وہ خاندان کا فرد ہو بلکہ گائوں والے، محلے والے اور دور و نزدیک کے رشتہ دار ایک ہی فکر میں مبتلا ہوجاتے ہیں کہ اب اس سے کون شادی کرے گا۔یہ ایک ایسا موضوع ہے جس سے تقریباً ہر فرد متاثر ہوتا ہے،جس پر یہ فلم’سنگل سلمیٰ‘ مرکوزہے۔ اس فلم میں ہما قریشی نے اہم کردار ادا کیا ہے۔یہ فلم اس کے علاوہ لڑکیوں سےمتعلق دیگرکئی موضوعات پر بھی روشنی ڈالتی ہے۔

آمنہ خان کی تحریر کردہ، یہ کہانی لکھنؤ کے ایک سابق نواب (کنولجیت سنگھ) کی بیٹی سلمیٰ رضوی (ہما قریشی) کے بارے میں ہے۔ نواب کی شاہی مدت ختم ہو چکی ہے لیکن وہ اس سے غافل ہے۔ اس لیے سلمیٰ، جو اربن ڈیولپمنٹ ڈپارٹمنٹ میں کام کرتی ہے، نے گھرکی ساری ذمہ داری اپنے کاندھوں پر اٹھا رکھی ہے۔پھر چاہے رہن رکھی ہوئی حویلی پر سود ادا کرنا ہو، بہنوں کے گھر کوآباد کرنا ہو یا اپنے بھائی کے کرکٹر بننے کے خواب کو زندہ رکھنا ہو وہ ان سب کے تعلق سےفکرمند رہتی ہے لیکن ایسے میںاس کے اپنے خواب جیسے کہیںکھو گئےہیں۔یہاں تک کہ شادی کی عمر (جیسا کہ معاشرے نےمقرر کیا ہے) گزر چکی ہے۔ ۳۳؍سال کی’سنگل سلمیٰ‘گلی کے موالیچھیڑنےسے بھی باز نہیں آتے۔پھر، ایک دن، اپنی ماں کے اصرار پر، سلمیٰ شادی کے لیے راضی ہوجاتی ہے، اور تقریباً ایک درجن نمونوں کے ذریعہ دیکھے جانےکےبعد،سکندر (شریاس تلپڑے) اس کی زندگی میں داخل ہوتا ہے۔

اپنے ہاتھ سے اپنی تقدیر لکھنے والا سکندر جوسوٹنگ شرٹنگ کی دکان چالاتا ہےپہلی ہی نظرمیں سلمیٰ کی خوبصورتی پر فدا ہوجاتا ہے۔ سلمیٰ اس کی ایمانداری سے متاثرہے۔ ان کی شادی طے پا گئی ہے لیکن ان کی منگنی کے دن سلمیٰ کو اپنی ٹیم کے ساتھ سرکاری تربیت کے لیے لندن جانا ہے۔ لندن میں قیام کے۲؍مہینوں میں،سلمیٰ نہ صرف خودآگہی حاصل کرتی ہےبلکہ اسے خود سےملوانے والےمیت (سنی سنگھ)سے پیار کرنے لگتی ہے۔اب سوال یہ پیدا ہوتا ہے کہ اس کی ڈولی لکھنؤ سےسکندر کے گھر جاتی ہے یا لندن والے میت کے یہاں یہ آپ کو فلم دیکھنے کے بعد ہی پتہ چلے گا۔

نچیکیت سامنت کی یہ فلم صرف محبت کے تکون ڈرامے تک ہی محدود نہیں ہے، بلکہ پیدائش سے لے کر ملازمت تک ہر سطح پر لڑکیوں کودرپیش امتیازی سلوک اور لباس سے لے کر کردار تک ہر چیز پر مبنی فیصلے پر بھی سوالیہ نشان ہے۔ جہاں یہ لڑکیوں کے تئیں معاشرے کے تنگ نظر رویوں کو بے نقاب کرتی ہے، وہیں یہ انہیں خود سے محبت اور خود کو اولین ترجیح دینا بھی سکھاتی ہے۔ تاہم سب کچھ ایک ساتھ دکھانے کی یہ کوشش بھی فلم کی کمزوری ہے۔

یہ فلم بیٹی کو بیٹے سے کمتر ماننے،کپڑوں سے لڑکیوں کے کردارکا اندازہ لگانے،خاندان کی خاطر شادی کرنے، لڑکیوںکواپنی مرضی کے مطابق جینے کی آزادی نہ ہونے جیسےمتعددمسائل پیش کرنے کے چکر میںیہ فلم کچھ کھنچی ہوئی محسوس ہوتی ہے۔یہ فلم بعض اوقات حد سے زیادہ ڈرامائی محسوس ہوتی ہے، خاص طور پر کلائمکس کی بیان بازی۔ مدثر عزیز کے مکالمے دلکش اور طنز آمیز ہیں۔ فلم کی موسیقی ایک بڑی کمزوری ہے۔ ایک بھی گانا یادگار نہیں ہے، اور اس کے بجائے، یہ کہانی کی رفتار کو کم کر دیتا ہے۔

اداکاروں کی اداکاری بہترین ہے۔ ہما قریشی سلمیٰ کے طور پر متاثرکن ہیں۔ شریاس تلپڑے نے بھی معصوم سکندرکے طور پر دل جیت لیے۔ فلم دیکھتے ہوئےناظرین اس کی جیت کیلئےدعائیں کرتے ہیں۔سنی سنگھ بھی اپنے کردار میں ٹھوس ہیں۔ مزید برآں، ندھی سنگھ، سلمیٰ کی دوست، نونی پریہار، اس کی دفتری ساتھی مسز سریواستو، اور آصف خان جوراجیو کاکردار ادا کر رہے ہیں، بھی فلم کو مضبوط کرتے ہیں۔

لڑکیوں کے تعلق سے سوچ بدلنے کی کوشش کے طور پر بنائی گئی یہ فلم ایک مرتبہ تو دیکھی ہی جاسکتی ہے۔