آسام کی سرزمین پر ایک ایسا شہر آباد ہے جسے دیکھ کر محسوس ہوتا ہے کہ فطرت نے یہاں اپنے سب رنگوں کو بڑے پیار سے سمیٹ دیا ہے۔دریائے برہم پتر کے کنارے بسا ہوا تیزپور شمالی آسام کا وہ تاریخی اور ثقافتی شہر ہے جو اپنی قدیم داستانوں، روحانی مقامات اور سرسبز وادیوں کے لیے مشہور ہے۔یہ شہر گویا آسام کے دل کی دھڑکن ہے،جہاں ماضی کی عظمت، فطرت کی لطافت اور جدید زمانے کی سادگی ایک ساتھ سانس لیتی ہے۔تیزپور ایک ایسا شہر ہے جو تاریخ، فطرت، اور ثقافت کا حسین امتزاج ہے۔تیزپور وہ جگہ ہے جہاں وقت ٹھہر جاتا ہے اور زندگی اپنی اصل صورت میں نظر آتی ہے۔

تاریخ میں تیزپور سونیت پور کے نام سے مشہور تھا، جو قدیم آسام کی ایک اہم ریاست تھی۔یہاں کے آثارِ قدیمہ، مندر، اور مجسمے اس بات کا ثبوت ہیں کہ تیزپور آسام کی پال، سالستھمبھا، اور کامروپ سلطنتوں کا مرکز رہا ہے۔

تیزپور برہم پتر ندی کے شمالی کنارے پر واقع ہے۔یہاں کا موسم خوشگوار، فضائیں خنک،اور فضا میں چائے کی پتّیوں کی مہک بسی رہتی ہے۔سرسبز و شاداب وادیاں، پہاڑی درخت، ندی کے کنارے کے نظارے، سب کچھ ایسا لگتا ہے جیسے فطرت نے خود اس شہر کو آراستہ کیا ہو۔یہ شہر آسام کی چائے کی وادیوں، پہاڑی راستوں، جھیلوں اور تاریخی یادگاروں کا سنگم ہے، جہاں ہر منظر میں ایک کہانی چھپی ہے۔

تیزپور کی سب سے مشہور پہچان اگنی گڑھ پہاڑی ہے، جو شہر کے وسط میں دریائے برہم پتر کے کنارے واقع ہے۔کہا جاتا ہے کہ بادشاہ بانسورا نے اپنی بیٹی اُشا کو اسی پہاڑی پر قید رکھا تھا تاکہ وہ اپنے محبوب انیرُدھ سے نہ مل سکے۔بعد میں ان دونوں کی محبت اور کرشن کی فوج کے ساتھ ہونے والی جنگ نے اس زمین کو تاریخی بنا دیا۔اگنی گڑھ سے تیزپور شہر اور برہم پتر ندی کا نظارہ دل موہ لینے والا ہوتا ہے، اور شام کے وقت یہاں کا غروبِ آفتاب دیکھنے کے لیے سیاح بڑی تعداد میں آتے ہیں۔

یہ عظیم الشان پُل دریائے برہم پتر پر بنا ہے جو تیزپور کو جنوبی آسام سے جوڑتا ہے۔یہ انجینئرنگ کا شاہکار نہ صرف آمد و رفت کا ذریعہ ہے بلکہ برہم پتر ندی کے اوپر سے گزرتے وقت فطرت کے حسن کا ایک نایاب نظارہ بھی پیش کرتا ہے۔یہ پُل شام کے وقت روشنیوں میں نہایا ہوا ایک جادوئی منظر تخلیق کرتا ہے۔

شہر کے دل میں واقع یہ باغ تیزپور کا سب سے خوبصورت عوامی مقام ہے۔یہاں مصنوعی جھیل، کشتی رانی، فوڈ کارنر، بچوں کے لیے کھیل کے میدان، اور شاندار مجسمے موجود ہیں۔یہ پارک قدیم داستانِ اوشا-انیردھ کی یاد میں تعمیر کیا گیا ہے۔شام کے وقت اس کی فضا میں خوشی، روشنی اور موسیقی کا ملاپ سیاحوں کو مسحور کر دیتا ہے۔

یہ پرسکون جھیل شہر سے کچھ فاصلے پر ہے۔اس کے اردگرد کے بانس کے جھنڈ، پرندوں کی چہکار، اور خاموش پانی پر تیرتی کشتیوں کا منظر دل کو راحت بخشتا ہے۔

یہ مقام تیزپور کی قدیم آرکیالوجیکل سائٹ کے طور پر جانا جاتا ہے۔یہاں پتھر پر کندہ کیے گئے قدیم مجسمے اور ستون پال دور کی یاد دلاتےہیں۔ان کھنڈرات میں آج بھی آسام کے سنہرے ماضی کی بازگشت سنائی دیتی ہے۔

یہ جھیل بھی ایک قدیم روایت سے جڑی ہے۔کہا جاتا ہے کہ ایک راجکماری نے یہاں کے پانی میں اپنی جان دی تھی، جس کے بعد یہ جھیل مقدس مانی جانے لگی۔آج یہ مقام پکنک اور فوٹوگرافی کے لیے مشہور ہے۔

تیزپورکےگرد چائے کے باغات پھیلے ہوئے ہیں۔یہاں کی چائے خوشبودار اور ہلکے ذائقے والی ہوتی ہے۔ سیاح یہاں کی چائے فیکٹریوں کا دورہ کر کے چائے کی تیاری کا پورا عمل دیکھ سکتے ہیں۔