اس کا ڈسپلےتو قدرے چھوٹا ۶ء۳؍انچ ہے لیکن پروسیسر، ریم اور اسٹوریج اور سافٹ ویئر عمدہ ہے، ساتھ ہی بیٹری بھی بہترین دی گئی ہے۔

پریمیم سیگمنٹ میں خریدار اپنے اسمارٹ فون سے کسی قسم کا سمجھوتہ نہیں کرتے۔ وہ بہترین ڈسپلے، شاندار کیمرے اور زبردست بیٹری لائف کی توقع رکھتے ہیں۔ لیکن۲۰۲۵ءآتے آتے ایک نیا رجحان ابھرا یعنی کمپیکٹ فلیگ شپ فونز کا دوبارہ ظہور ہوا۔ ایسے فونز جو ’پرو‘ درجے کےہارڈویئر کے ساتھ چھوٹے سائز میں پیش کیے گئے، مگر نسبتاً کم قیمت کے ساتھ۔ ایک وقت تھا جب اس میدان میں سیمسنگ گیلکسی ایس سیریزکا غلبہ تھا، مگر اب ویوو، اوپو اور شائومی جیسے برانڈز بھی اس دوڑ میں شامل ہو چکے ہیں۔ 
 قیمت
۲۰۲۶ءمیں بھی یہی رجحان جاری ہے۔ ریم کی قلت کے باعث بڑھتی قیمتوں نےکمپنیوں کو مزید آپشنز متعارف کرانے پر مجبور کیاہے، جیسے ویوو وی سیریزجس کی شروعات تقریباً ۵۱؍ہزار ۹۹۹؍ روپےسےہوتی ہے۔ ایسے میں یہ بات کچھ عجیب محسوس ہوتی ہے کہ شائومی نے اپنے نئے کمپیکٹ فلیگ شپ شائومی ۱۷؍کی قیمت بڑھا کر ۸۹؍ہزار ۹۹۹؍روپے کر دی ہے، جبکہ اس کے حریف تقریباً ۷۵؍ہزارروپے کے آس پاس دستیاب ہیں۔ 
 ڈیزائن
شائومی ۱۷؍کاڈیزائن سادہ مگر پُرکشش ہے، خاص طور پر وینچر گرین رنگ میں یہ کافی پریمیم محسوس ہوتا ہے۔ فرنٹ ڈیزائن میں کوئی خاص انفرادیت نہیں۔ فون کا ایلومینیم فریم گول کناروں اور فلیٹ سائیڈزکے ساتھ آتا ہے، جبکہ فرنٹ اوربیک دونوں جانب نرم کنارے اسے ہاتھ میں آرام دہ بناتے ہیں۔ پچھلے حصے کا میٹ گلاس فنش نہ صرف ہموار ہے بلکہ اس پر انگلیوں کے نشان بھی نہیں پکڑتا۔ بٹن صرف دائیں جانب موجود ہیں اور ان کا رسپانس اچھا ہے۔ 
ڈسپلے
ڈسپلے وہ پہلو ہے جو شائومی ۱۷؍کی قیمت کو کسی حد تک جواز فراہم کرتا ہے۔ ۱۲؍بٹ فلیٹ پینل نہایت شوخ اور درست رنگ پیش کرتا ہے۔ ڈی سی اورپی ڈبلیو ایم ڈمنگ کے درمیان سوئچ کرنے کی سہولت اسے مختلف روشنی کے حالات میں بھی آرام دہ بناتی ہے۔ یہ ایچ ڈی آر ۱۰؍پلس اورڈالبی ویژن کو بھی سپورٹ کرتا ہے، جس سے ویڈیو کنٹینٹ نہایت روشن اور کنٹراسٹ سے بھرپور نظر آتا ہے۔ 
ہارڈ ویئر
طاقتور چپ سیٹ، ایل ٹی پی اوپینل اور بہتر یوزر ایکسپیرینس کےباعث شائومی ۱۷؍کا سافٹ ویئر نہایت ہموار محسوس ہوتا ہے۔ البتہ ۸۰؍ہزار سے زائد قیمت کے باوجود کچھ غیر ضروری ایپس موجود ہیں، جنہیں ہٹایا جا سکتا ہے۔ خوش آئند بات یہ ہے کہ استعمال کے دوران کوئی غیر ضروری نوٹیفکیشن نظر نہیں آیا۔ 

یہ بھی پڑھئے: ٹیکنواسپارک گو ۳: مناسب خصوصیات کے ساتھ سستا فون

کیمرہ
شائومی اور لیکاکی شراکت داری اس فون کی فوٹوگرافی میں نمایاں نظر آتی ہے۔ ڈیفالٹ طور پر لیکا وائبرینٹ اسٹائل فعال ہوتا ہے، جس میں تصاویر شوخ رنگوں اور بہتر ڈائنامک رینج کے ساتھ آتی ہیں جو عام صارفین کو پسند آتی ہیں۔ دوسری جانب لیکا آتھینٹک موڈ زیادہ قدرتی رنگ، بہتر کنٹراسٹ اور ہلکی وگنیٹنگ کے ساتھ ایک پروفیشنل ٹچ دیتا ہے۔ یہ موڈ خاص طور پر فوٹوگرافی کے شوقین افراد کو پسند آئے گا۔ 
بیٹری
اس کی بیٹری کی کارکردگی متاثر کن ہے۔ بھرپور استعمال میں یہ ۱۹؍گھنٹے تک چل سکتی ہے۔ عام استعمال میں یہ فون ڈیڑھ دن تک چل سکتا ہے، بشرطیکہ زیادہ۴؍ کے ویڈیو یا ہیوی گیمنگ نہ کی جائے۔ 
چند اعداد وشمار
اسکرین
۶ء۳؍انچ امولیڈ، ۱ء۵؍کے
اینڈرائڈ ورژن
۱۶؍(۵؍سال او ایس اپ ڈیٹ)
سافٹ ویئر
ہائپر او ایس ۳
پروسیسر
کوالکوم اسنیپ ڈریگون ۸؍ایلائٹ 
ریم
۱۲؍ جی بی
اسٹوریج
۲۵۶/۵۱۲؍ جی بی
مین کیمرہ
۵۰؍میگا پکسل
ٹیلی فوٹو
۵۰؍میگا پکسل
الٹرا وائڈ کیمرہ
۵۰؍میگا پکسل
سیلفی کیمرہ
۵۰؍میگا پکسل
بیٹری
۶؍ہزار ۳۳۰؍ ایم اے ایچ