باسمہ تعالیٰ۔ ھوالموفق :معتدہ طلاق اور معتدہ وفات دونوں کی عدت میں فرق ہے۔ عورت حمل سے ہو تو عدت طلاق ہو یا عدت وفات دونوں کی عدت وضع حمل یعنی بچے کی پیدایش تک ہے۔ حمل سے نہ ہو تو طلاق کی عدت تین حیض (اور عندالشوافع تین طہر) ہے جبکہ عدت وفات چار ماہ دس دن ہے۔ عدت وفات کا شمار شوہر کی وفات کے دن سے ہوتا ہے اس لئے عدت کب پوری ہورہی ہے اس کا جانناآسان ہے اور عموماً ہر ایک کو اس کا علم ہوتا ہے۔ چونکہ عدت کے بعد کے احکام الگ ہیں مثلاً معتدہ کی شادی اور گھر سے باہر آنے جانے کی اجازت وغیرہ اس لئے اس حدتک تو گنجائش ہوگی کہ قریبی لوگوں کو اطلاع کر دی جائے لیکن شریعت میں اس موقع پر کسی خاص تقریب اور دعوت وغیرہ کا تذکرہ نہیں۔ رشتے داروں کو بلانے کی بھی بظاہر کوئی ضرورت نہیں اور کتب شریعت میں تو اس کا ذکر بھی نہیں۔ اس طرح کی رسوم خودساختہ ہیں البتہ قریبی رشتہ دار تالیف قلب کی غرض سے خود آ جائیں تو گنجائش ہونی چاہئے مگر کسی دعوت وغیرہ کا اہتمام نہ ہو نا چاہئے جبکہ اکثر ایسی دعوتیں خرابیوں سے خالی بھی نہیں ہوتیں۔ واللہ اعلم وعلمہ اتم