باسمہ تعالیٰ۔ ھوالموفق: جو قبرستان عام مسلمانوں کیلئے  وقف ہیں وہ کسی کی مِلک نہیں ہوتے،  واقف نے دیکھ ریکھ کیلئے  جن کو نامزد کیا ہو  وہ صرف دیکھ بھال کرینگے خرید وفروخت کا انہیں اختیار نہیں ہوگا۔ کو ئی ایسا قبرستان جو کسی خاص قبیلے یا خاندان کیلئے  خاص کیا گیا وہ اگر چہ سب کیلئے  عام نہیں لیکن جس قوم کے لئے خاص ہے اس سے تعلق رکھنے والی میت کی وہاں تدفین ہوسکتی ہے، خرید وفروخت کی اجازت وہاں بھی نہیں البتہ خاندان اپنے خاندانی قبرستان میں کسی کو بھی تدفین کی اجازت دے سکتا ہے مگر بیچ نہیں سکتا۔ واللہ اعلم

باسمہ تعالیٰ۔ ھوالموفق: آپ کا مسئلہ  بڑا اہم اور توجہ طلب ہے اور بہت ممکن ہے یہ صرف آپ کا مسئلہ  نہ ہو اور بھی کئی  لوگ اس سے متاثر ہوں۔ بنیادی امر ہے وہ معاہدہ اور وہ شرائط جن کے پیش  نظر ملازمت ملی ہے۔ اصولاً کسی بھی وقت کوئی یکطرفہ فیصلہ مسلط نہیں کیا جاسکتا، مزدور کی اجرت کے متعلق جو اسلامی ہدایات ہیں وہ انتہائی  معقول اور عادلانہ ہیں۔ کچھ امور  یوں بھی طے شدہ ہوتے ہیں مثلاً اتوار اور چھٹی کے ایام کی تنخواہ، اگر وہ نہ ملے تو دیکھنا ہوگا کہ کن شرائط کی وجہ سے یہ صورت حال پیدا ہوئی، پھر سرکاری منظور شدہ قوانین اس بابت کیا کہتے ہیں، یہ تحقیق مکمل ہونے کے  بعد ہی  صحیح جواب ممکن ہوگا۔ واللہ اعلم وعلمہ اتم

باسمہ تعالیٰ۔ ھوالموفق: اس ایک سوال میں کئی سوال موجود ہیں۔ اگر درمیان میں نماز کھڑی ہونے کی بناء پر طواف رکا ہے تو لازمی امر ہے دوسروں کی طرح یہ طواف کرنے والا بھی اسی حالت میں سب کے ساتھ شریک جماعت ہوگا اور یہ بھی ظاہر ہے کہ قبلہ رو ہوکر ہی نماز ادا کرے گا اور جس حالت میں ہے اسی حالت کو بر قرار رکھےگا، بعد جس جگہ طواف رکا تھا دوبارہ وہیں سے شروع کرے گا حجر اسود جاکر از سر نو شروع کرنے کی  حاجت نہیں ۔ واللہ اعلم وعلمہ اتم

  باسمہ تعالیٰ۔ھوالموفق: اس میں شک نہیں کہ دوسرے مقامات یا  جگہوں کے بالمقابل حرم کی نیکیوں کا اجر وثواب بھی زیادہ ہے۔نیکی میں تمام نیکیاں شامل ہیں جن میں غرباء کا تعاون وغیرہ بھی شامل ہے لیکن جن کا تعاون کیا جائے  واقعی وہ مساکین اور تعاون کے مستحق بھی ہوں۔ ایک زمانہ تھا جب وہاں غربت عام تھی مگر اب وہ صورتحال باقی نہیں رہی اس لئے محض خانہ پری ہو یہ کافی نہیں۔جو تعاون کے محتاج ہیں اگر ان کا تعاون کیاجائے تو حرم کی نیکی کا ثواب یقینی ہے۔  واللہ اعلم وعلمہ اتم

 باسمہ تعالیٰ۔ ھوالموفق: استقبال قبلہ نماز کی شرائط میں سے ہے۔ یہ حکم معذور غیر معذور سب کے لئے  ہے لیکن جو مرد و عورت خود معذور ہیں  ان کے اہل خانہ کی ذمے داری ہے کہ صحیح طریقے سے نماز کی ادائیگی کا انتظام کریں۔ گھر والے صاحب حیثیت ہیں تو کوئی  ملازم وغیرہ کو رکھ کر بھی یہ ذمے داری پوری کرسکتے ہیں۔ جس کا کوئی  نہ ہو اور وہ مفلس ہونے کے علاوہ مجبور محض بھی ہو،  وہ معذور کے حکم میں شامل ہو سکتا ہے۔ اس سلسلے میں مقامی علماء سے رجوع کریں جو صورت حال کو بہتر طور پر سمجھ کر رہنمائی کرینگے۔ واللہ اعلم وعلمہ اتم