باسمہ تعالیٰ۔ھوالموفق:  دعا کا ایک طریقہ تو یہ ہے کہ بغیر ہاتھ اٹھائے مسنون اور معمول دعا پڑھی جائے۔ ایسی ایک یا زائد دعاؤں کے وقت ہاتھ اٹھانے کا معمول نہیں ہے اس لئے دعا کے بعد چہرے پر ہاتھ بھی نہ پھیرا جائےگا۔ علامہ طیبی نے اس کی صراحت بھی کردی ہے لیکن حضورﷺ دورانِ دعا جب ہا تھ اٹھائے ہوتے اس کے متعلق حضرت عباس ؓ، حضرت عمرؓ  اور بعض دیگر حضرات سے مروی ہے کہ آپؐ  دعا کے بعد چہرے پر ہاتھ پھر لیتے تھے۔ واللہ اعلم وعلمہ اتم

باسمہ تعالیٰ۔ھوالموفق: کپڑوں کے موزے اگر اتنے دبیز ہیں کہ اوپر سے پانی ڈالا جائے تو پنڈلی تک نہ پہنچے ،وہ اتنے موٹے اور دبیز ہوں کہ تین میل تک چلنا ممکن ہو اور وہ خود اتنے ٹھوس ہوں کہ کسی چیز سے باندھے نہ گئے  ہوں تو ان پر مسح کی گنجائش ہے ؛  لہٰذا جن موزوں پر اوپر سے پانی ڈالنے سے پنڈلیوں تک پانی پہنچے یا تین میل تک چلنا ممکن نہ ہو یا چلتے وقت انھیں باندھ کر رکھنا پڑے تو ایسے موزوں پر مسح جائز نہیں۔ ہمارے یہاں رائج سوتی اور نائیلون وغیرہ کے موزوں میں مذکورہ شرائط نہیں  پائی جاتیں  اس لئے ان پر مسح جائز نہیں۔ واللہ اعلم وعلمہ اتم

 باسمہ تعالیٰ۔ھوالموفق:  ایک کی رقم دوسرے کی محنت اسے عقد مضاربت کہتے ہیں۔ شریعت اسلامیہ نے اسے جائز قرار دیاہے لیکن شرط یہ ہے کہ ہر ایک کے لئے منافع کا تناسب فیصد کے حساب سے طے ہو (کسی فریق کے لئے کوئی متعین رقم طے نہ ہو) نیز نفع نقصان دونوں میں شرکت طے ہو۔ صورت مسئولہ میں یہاں تک تو درست اور شریعت کے مطابق ہے کہ نفع نقصان میں شرکت رہےگی اور نفع کاتناسب  فیصد کے اعتبار سے رکھاجائے گا لیکن اس کے ساتھ ضمانت والی بات ناقابل فہم ہے۔ مضاربت کے جواز کی بنیادی شرط ہی یہ ہے کہ نفع نقصان دونوں میں شرکت ہو ،یہ بھی ظاہر ہے کہ کاروبار میں نفع نقصان دونوں کا احتمال رہتاہے  اس صورت میں یہ ضمانت بے معنی ہے البتہ یہ ممکن ہے کہ اس ضمانت سے وہ اپنا  یہ تجربہ بتانا چاہتاہو کہ نقصان کا امکان نہیں ہوگا اس کے باوجود نقصان ہواتو اس کی بھرپائی  حاصل شدہ نفع اور سرمائے  ہی سے کی جائےگی اس لئے یہ طے کرلیا گیا ہو تب بھی نقصان سرمائے  ہی کی طرف راجع ہوگا۔ واللہ اعلم وعلمہ اتم

باسمہ تعالیٰ۔ھوالموفق: جس عورت نے خلع لے لیا تھا وہ اگر زندہ بھی ہو تب بھی وارث نہ ہوگی لیکن اس سے جو لڑکیاں ہیں وہ اپنے باپ کی وارث ہوںگی۔ دوسری بیوی زندہ ہےیا  وہ بھی فوت ہوچکی ہے، اگر اس کا شوہر کی زندگی ہی میں انتقال ہوچکا ہو تو اس کابھی وراثت میں حصہ نہ ہوگا۔ صورت مسئولہ  میں نانا کے وارث ان کی چاروں بچیاں ہیں۔ ان کو ترکہ میں سے دو تہائی ملےگا۔ ایک بھائی  توپہلے ہی  لاولد فوت ہوچکا تھا دوسرے کے متعلق کوئی  ذکر نہیں کہ زندہ ہے یا فوت ہوچکا ہے، زندہ ہے تو ایک تہائی  عصبہ ہونے کی بنا پر خود اسے ملےگا، اگر اس کابھی  انتقال ہوچکا ہے تو کب ہوا ہے، بھائی  سے پہلے یابعد میں؟  بھائی  کے بعد ہواتھا تو ایک تہائی  میں اس کے لڑکے لڑکیاں سب کا حصہ ہوگا لہٰذا چوبیس لاکھ میں سے سولہ لاکھ چاروں بیٹیوں میں برابر تقسیم ہوگا اور آٹھ لاکھ بھائی کی اولاد کو ملےگا۔ واللہ اعلم وعلمہ اتم