حضرت فضیل بن عیاضؒ بڑے پائے کے بزرگ گزرے ہیں۔ پہلے قطاع الطریق اور ڈاکوؤں کے سردار تھے، اور علاقہ سرخس میں دن دہاڑے ڈاکے ڈالا کرتے تھے چنانچہ اُن کا یہ بھی دستور تھا کہ جس قافلہ کو لوٹتے، اُس کا نام، پتہ، تاریخ وغیرہ کے ساتھ لکھ لیتے اور یہ بھی عادت تھی کہ جس قافلہ میں عورت یا لڑکا ہوتا اُس کو نہیں لوٹتے تھے۔

اُن کے تائب ہونے کا یہ واقعہ ہے کہ ایک رات اپنے گھر کو جارہے تھے کہ ایک گلی سے گزر ہوا۔ کانوں میں آواز آئی کہ کوئی شخص اپنے بالا خانے پر یہ آیت شریفہ تلاوت کررہا ہے : (ترجمہ)  ’’کیا ایمان والوں کے لئے (ابھی) وہ وقت نہیں آیا کہ اُن کے دل اللہ کی یاد کے لئے رِقّت کے ساتھ جھک جائیں ۔‘‘ (سورہ الحدید:۱۶)

اُنہوں نے آیت شریفہ کی تلاوت سنی تو جواباً کہا ’’ہاں ، البتہ وہ وقت آگیا ہے‘‘ اور  وہیں سے اُن پر ایک  حال طاری ہوا اور ڈاکہ زنی کے پیشہ سے سچے دل سے توبہ کی۔

تائب ہونے کے بعد وہ فہرست نکال کر دیکھی جس کا اوپر  ذکر آچکا ہے۔ لو‘ٹ کا سامان جو کچھ موجود تھا اُن کو اُن کے مالکوں کے گھر لے جا کر دیا، قصور کی معافی چاہی اور جو مال صرف ہوچکا تھا اُس کے بارے میں عذر کرکے بخشوایا اور یہ کہہ کر راضی کیا کہ میں فضیل (بن عیاض) ہوں ، وہ مال میرے پاس سے صرف ہوگیا ہے، اب میں نے لوٹ مار سے توبہ کی ہے، آئندہ ایسا کام نہ کروں گا ، تم اپنے حقوق پر راضی ہوکر بخش دو تاکہ بارگاہ ایزدی میں ہماری دعا قبول ہو۔

اس صدق دلی سے عذر و معذرت پر بعض لوگ تو اپنا مال طلب کرتے اور بعض کہتے کہ ہم نے بخش دیا، یہاں تک کہ یہ سلسلہ ایک یہودی تک پہنچا جس کی کچھ اشرفیاں لُوٹ میں جاتی رہی تھیں۔ یہ اُس کے پاس بھی آئے اور کہا:مجھے تو جانتا ہے کہ کون ہوں؟

یہودی: نہیں، میں تم کو نہیں جانتا۔

حضرت فضیلؒ: میرا نام فضیل ہے جو ڈاکہ زنی کے سبب سے مشہور ہے۔ اب میں اپنے کام سے شرمندہ ہوں اور توبہ کی ہے۔ ہمارے دین میں یہ بات ہے کہ توبہ اس وقت تک قبول نہیں ہوتی جب تک کہ مدعی راضی نہ ہو۔ میں نے تیری کچھ اشرفیاں لوٹ میں لی تھیں وہ خرچ ہوگئی ہیں، کما کر تجھ کو دوں گا۔ یہ بجائے قرض میرے ذمہ ہونگی مگر اس وقت راضی ہو، تاکہ توبہ قبول ہو۔