علم کے بغیر عمل کرنے والا ایسا ہے جیسے غلط راستے پر چلنے والا۔ جو شخص علم کے بغیر عمل کرتاہے وہ اصلاح سے زیادہ فساد کرتا ہے۔

شرعی طور پر اہم ترین ترجیح میں سے ایک یہ ہے کہ علم عمل پر مقدم ہے، کیوں کہ علم پہلے ہوتا ہے اور عمل بعد میں۔ علم عمل کا رہنمااورمرشد ہوتاہے۔ معاذؓ بن جبل سے روایت ہے: 
’’علم امام ہے اور عمل اس کا مقتدی۔ ‘‘
یہی وجہ ہے کہ امام بخاریؒ  نے اپنی صحیح کی کتاب العلم میں ایک باب کا عنوان اَلْعِلْمُ قَبْلَ الْقَوْلِ وَالْعَمَلِ(علم قول او رعمل پرمقدم ہے) رکھاہے۔ بخاری کے شارحین کہتے ہیں کہ اس سے امام بخاریؒ  کا مطلب یہ ہے کہ قول اور عمل کی صحت کے لئے علم شرط ہے۔ یہ دونوں اس کے بغیر معتبر نہیں ہیں۔ اس لئے یہ ان پر مقدم ہے۔ یہاں تک کہ یہ اس نیت کی بھی تصحیح کرتاہے جو عمل کی صحت کے لئے  ضروری ہے۔ بخاری کے شارحین کہتے ہیں کہ امام بخاریؒ  نے اسی کی طرف لوگوں کو متوجہ کیاہے، تاکہ جب یہ کہاجاتاہے کہ عمل کے بغیر علم کا کوئی فائدہ نہیں تو اس سے کسی کے ذہن میں یہ شبہ پیدا نہ ہو کہ علم کی کوئی اہمیت نہیں ہے اس لئے  اس کی طلب کی بھی ضرورت نہیں۔ 
امام بخاریؒ نے اپنی بات کی دلیل کے طور پر متعدد آیات اور احادیث ذکر کی ہیں، جو ان کے مُدعا کی بخوبی وضاحت کرتی ہیں:
’’جان لو کہ اللہ کے سوا کوئی معبود نہیں۔ اپنے گناہوں کی بخشش مانگو اور مومنین اور مومنات کے گناہوں کی بھی۔‘‘ ( سورہ محمد: ۱۹) 
اللہ تعالیٰ نے نبی اکرمؐ کو سب سے پہلے حصولِ علم کا حکم دیاہے اور اس کے بعد استغفار کی تاکید کی ہے، جو کہ ایک عمل ہے۔ اور یہاں خطاب اگرچہ رسولؐ اللہ سے ہے، مگرساری اُمت اس خطاب میں شامل ہے۔ دوسری دلیل اللہ تعالیٰ کا یہ ارشاد ہے:’’یقیناً اللہ کے بندوں میں اس کی خشیت رکھنے والے وہی ہیں جو علم رکھتے ہوں۔‘‘ (سورہ فاطر:۲۸)
وہ علم ہی ہے جو ایک انسان میں اللہ کے حضور جواب دہی کے احساس کی صفت کو پروان چڑھاتا ہے اور اس کی وجہ سے آدمی عمل پر آمادہ ہوجاتاہے۔  احادیث میں سے ایک یہ ہے: 
’’اللہ تعالیٰ جس کے ساتھ بھلائی کرنا چاہتا ہے،  اسے دین کی گہری سمجھ عطا فرماتاہے۔ ‘‘ (صحیح بخاری مع فتح الباری)
اس کی وجہ یہ ہے کہ جب وہ دین کو درست طور پر سمجھے گا تو عمل بھی کرے گا اور صحیح عمل کرے گا۔ قرآن کی سب سے پہلی وحی جو نازل ہوئی وہ اقرأ تھی [یعنی پڑھئے] اور قرأت علم کی کنجی ہے۔ عمل کے احکام اس کے بعد نازل ہوئے، جیسے: 
’’اے چادر اوڑھنے والے، اُٹھو اور (لوگوں کو اللہ کا) ڈر سناؤ، اور اپنے رب کی بڑائی (اور عظمت) بیان کرو،   اور اپنا دامن صاف رکھو۔ ‘‘ (سورہ المدثر:  ۱-۴) 
علم ایک ترازو ہے: پھر علم اس وجہ سے بھی عمل پر مقدم ہے کہ یہ اعتقادات میں حق اور باطل کے درمیان، اقوال اور اعمال و معیارات میں صحیح اور غلط کے درمیان، سنت اور بدعت کے درمیان، صحیح اور فاسد کے درمیان، حلال اور حرام کے درمیان، اچھے اور بُرے کے درمیان، مقبول اور نامقبول کے درمیان اور اہم اور کم اہم یا غیر اہم کے درمیان تمیز کرتاہے۔ 
علم کے بغیر عمل کا نقصان: جس مسئلہ کے بارے میں ہم گفتگو کررہے ہیں، اس کی اصل بنیاد بھی علم ہی پر ہے۔ اسی کے ذریعے ہمیں معلوم ہوتاہے کہ کس کا حق مقدم ہے اور کس کو مؤخر کیاجاسکتاہے۔ اگر ہمیں اس چیز کا علم نہ ہو تو پھر ہم اندھیرے میں تیر چلائیں گے۔ 
خلیفۂ راشد عمر بن عبدالعزیزؒ نے ایک موقع پر یہ خوبصورت بات کہی:  ’’جو شخص علم کے بغیر عمل کرے گا وہ اصلاح سے زیادہ فساد کرے گا۔‘‘ (جامع بیان العلم وفضلہ، ابن عبد البر)
علم کے بغیر عمل کرنے والا ایسا ہے جیسے غلط راستے پر چلنے والا۔ جو شخص علم کے بغیر عمل کرتاہے وہ اصلاح سے زیادہ فساد کرتا ہے۔ لہٰذا علم کی طلب اتنی رکھو کہ اس کی بنا پر عبادت کو نقصان نہ ہو اور اس حد تک عبادت کرو جو علم کے لئے مضر نہ ہو۔ 
قیادت اور علم: قرآن کریم کے مطابق ہر قسم کی قیادت کیلئے علم شرط ہے، خواہ وہ سیاسی و انتظامی قیادت ہو، جیسے یوسف علیہ السلام کی قیادت پرشاہِ مصر نے کہا: ’’ اب آپ ہمارے ہاں قدر ومنزلت رکھتے ہیں اور ہمیں آپ کی امانت پر پورا بھروسا ہے۔ ‘‘ (سورہ یوسف: ۵۴)
اس پر یوسف علیہ السلام نے فرمایا تھا:  ’’ملک کے خزانے میرے سپرد کردیجیے، میں حفاظت کرنے والا بھی ہوں اور [ان معاملات کا] علم بھی رکھتاہوں۔ ‘‘ (سورہ یوسف:۵۵)
یہاں یوسف ؑنے اپنی خاص اہلیتوںکے بارے میں بتایا جو آپؑ کو اس عظیم کام کااہل ثابت کررہی تھیں، جس میں اس دور کے مطابق مالی اور اقتصادی امور، زراعت، منصوبہ بندی اور رسد کے انتظامات شامل تھے۔ 
’’اور [ان معاملات کا] علم بھی رکھتاہوں۔ ‘‘ سے مراد وہ قابلیت ہے جو دو اُمور کی تھی: ایک حفاظت یعنی امانت، اور دوسرا علم۔ یہاں علم سے مراد تجربہ اور کافی معلومات ہیں۔
یہ دونوں صفات سورۂ قصص میں شعیب علیہ السلام کی بیٹی کی زبان سے نکلی ہوئی صفات کے مطابق ہیں، جو اس نے موسیٰ علیہ السلام کو بطور ملازم رکھنے کے لئے اپنے والدمحترم کو بتائی تھیں: