باسمہ تعالیٰ۔ ھوالموفق: صدقۂ  فطراور زکوٰۃ ومنت وغیرہ یہ صدقات واجبہ کہلاتے ہیں، ان کا مصرف مسلمان فقراءومساکین ہیں۔ ایک روایت میں ہے کہ زکوٰۃ مسلمان امراء سے لے کر غرباء پر صرف کی جائےگی اسی لئے احناف  کےمطابق زکوٰۃ صرف مسلم فقراء ومساکین کو دی جانی چاہئے۔ لیکن غیر مسلم حاجتمندوں کا تعاون بھی منع نہیں البتہ ان کے لئے  صدقاتِ غیرواجبہ کی  مد رکھی گئی ہے، ان کی ضروریات اس سے پوری کی جائیں گی لہٰذا بیوہ واقعی ضرورت مند ہے (اور ہے، جیسا کہ سوال میں کہا گیا ہے) تو صدقاتِ واجبہ کے علاوہ سے اس کا تعاون کیا جانا چاہئے۔  واللہ اعلم وعلمہ اتم

باسمہ تعالیٰ۔ ھوالموفق: ذبیحہ کے حلال ہونے کے لئے شرعاً کچھ شرائط کی پابندی ضروری ہے ورنہ ذبیحہ حلال نہ ہوگا۔ سب سے پہلے تو ذبح کرنے والا مسلمان ہو،عاقل بالغ یا ایسا قریب البلوغ لڑکا ہو جو امور ذبح سے واقف اور ذبح پر قادر ہو، ذبح میں جن رگوں کا کٹ جانا ضروری ہے وہ تمام یا ان میں سے اکثر کٹ جائیں، ذبح کرنے والا (شخص) جانور کو اللہ کے نام کے ساتھ (بسم اللہ پڑھ کر) ذبح کرے۔ یہ بھی اشد ضروری ہے کہ ذبح کرنے والا ہر جانور کو اللہ کے نام کے ساتھ ذبح کرے ،لہٰذا صرف ایک پر بسم اللہ پڑھ کر باقی کو یونہی ذبح کردینا صحیح نہیں۔  وہ ایک بھی ان میں مخلوط ہوگیا تو پورا کا پورا گوشت مشکوک بلکہ حرام قرار پائیگا اس لئے  جولوگ بھی ایسا کررہے ہیں انہیں اپنا طریقہ ٔ  کار بدل کر ہر مرغی کو بسم اللہ کے ساتھ ذبح کرنا چاہئے۔ واللہ اعلم وعلمہ اتم

 باسمہ تعالیٰ۔ ھوالموفق: اگر دونوں ایک ساتھ رہتے رہے ہیں یا تنہا ئی میں مل چکے ہوں تو شوہر کے ذمے کامل مہر کی ادائیگی ضروری ہوگی، ہاں نکاح کے بعد تنہائی  یعنی خلوت صحیحہ سے پہلے یہ وقوعہ پیش آیا توجو مہر مقرر ہواتھا اس کا نصف دینا ہوگا۔ اگر ازدواجی تعلقات اور خلوت کے بعد کی صورت ہے تو دودن میں واپس نہ آنے کی صورت میں دو طلاق واقع ہیں اور رجوع سے پہلے عدت گررجانے کی صورت میں شرعاً عورت مرد سے جدا ہوجائےگی البتہ  اگر دونوں ساتھ رہنا چاہیں تو دوبارہ نکاح ہوسکتا ہے مگر آئندہ ایک طلاق بھی دی تو رشتہ مکمل منقطع ہو جائےگا۔ عورت دوبارہ ساتھ رہنے کے لئے راضی نہ ہو تو اسے مجبور نہیں کیا جاسکتا، دوسرا نکاح دونوں کی رضا مندی ہی سے ہوسکتا ہے۔ خلوت سے پہلے یہ وقوعہ پیش آیا تو عورت پہلی ہی طلاق سے باین ہوجائیگی، اس صورت میں اس پر عدت بھی نہ ہوگی۔ واللہ اعلم وعلمہ اتم