الیکشن کمیشن پورے ملک میں ایک خصوصی نظر ثانی اسپیشلل انٹینسیو ریویزن(ایس آئی آر)کرا رہی ہے۔دعویٰ کیا جا رہا ہے کہ جمہوریت کے سب سے بڑے تہوار انتخابات کو زیادہ شفاف بنانے کیلئے یہ عمل ضروری ہے۔لیکن ا س عمل پر اپوزیشن پارٹیاں سوال اٹھا رہی ہیں اور عام لوگ بھی کئی دشواریوں کا سامنا کر رہے ہیں۔تاہم ان سب کے درمیان ہم اُن بی ایل اوز کو پوری طرح نظر انداز کر رہے ہیں جو اس مہم(عمل) میں سب سے اہم اور فعال کردار اداکر رہے ہیں۔ یہ بی ایل اوز گھر گھر جاکر دستاویز جمع کر رہے ہیں اور ووٹر لسٹ کو درست اوراپڈیٹ کرنے میں لگے ہوئے ہیں۔انہیں حقیقی طور پر جمہوریت کااصل سپاہی کہا جا سکتا ہے۔

ایس آئی آر میں لگے بی ایل اوز اس وقت پریشان ہیں، دباؤ میں ہیں اور ڈر کے سائے میں جی رہے ہیں اور کئی نے اپنی جان گنوا دی ہے۔اسی طرح اور دباؤ کو سمجھنے کےلئے اخبار نے کچھ بی ایل اوز سے بات چیت کی۔یہ سبھی بی ایل اوز فی الحال کسی نا کسی اسکول میں ٹیچریا پھر شکشک متر کے طور پر ملازمت کر رہے ہیں۔ 

ان میں سے کئی تو ایسے ہیں جو کئی انتخابات دیکھ چکے ہیں ،جنہوںنے ہر بار بغیر سوال کئے حکومت کے احکام پر عمل کیا ہے لیکن اس بار زمینی سطح پر بدنظمی ایسی ہے کہ یہ ٹیچرز بھی پریشان ہوچکے ہیں۔ایک طرف ایس آئی آر کے عمل میں کئی چیلنج کا سامنا کرنا پڑ رہا ہے تو دوسری جانب افسران کے ذریعے اس عمل کو کم سے کم وقت میں مکمل کرنے کیلئے دباؤ بنایا جا رہا ہے۔ایک بی ایل او نے دعویٰ کیا کہ انہیں ٹارگیٹ پورا نہ کرنے پر ایف آئی آر کی دھمکی دی گئی ہے۔اگر کوئی شخص اپنے ضروری دستاویز نہیں جمع کر سکتا ہے تب بھی بی ایل اوزکو ہی مورد الزام ٹھہرایا جا رہا ہے۔اگر کسی گھر کا فرد خود ووٹر لسٹ میں نام درج کروانا نہیں چاہتا تب بھی ا س بارے میں بی ایل اوز سے سوال پوچھے جا رہے ہیں۔یہ کوئی ایک ریاست کی بات نہیں ہے ۔بات چاہے ملک کی سب سے بڑی ریاست اتر پردیش کی ہو،مغربی بنگال کی ہو یا پھر آندھرا پردیش کی۔ صرف ریاست بدل رہی ہے لیکن یہاں کے تمام بی ایل اوز کو درپیش مسائل ایک طرح کے ہیں۔

مدھیہ پردیش میں ۲؍بی ایل اوز کی ہارٹ اٹیک سے موت ہوئی ہے ،مغربی بنگال میں ایک خاتون بی ایل او نے خودکشی جیسا انتہائی قدم اٹھایا۔بنگال  ہی کے ’ندیا‘ میں ایک بی ایل او کی لاش گھر کی چھت سے لٹکی ہوئی ملی ہے۔جےپور میں ٹرین کے آگے چھلانگ لگاکر ایک بی ایل او نے اپنی جان دی ہے۔گجرات میں بھی ۴؍بی ایل اوز نے اس دنیا کو الوداع کہہ چکے ہیں۔اب ان اموات پر حکومت کے پاس کوئی صفائی نہیں ہے۔آسانی سے کہا جا رہا ہے کہ پرانی بیماری کی وجہ سے جان گئی ہے لیکن انہی مرنے والوں کے اہل خانہ چیخ چیخ کر بتا رہے ہیں کہ ایس آر آئی کا دباؤ اور افسران کی دھمکی کی وجہ سے یہ بی ایل او زپریشان تھے۔

اس تنازع پر ایک خاتون بی ایل کہتی ہیںکہ’’میں خود ایس آئی آر عمل میں شامل ہوں،کئی لوگوں کے گھر جا چکی ہوں۔کئی دقتوں کا سامنا کرنا پڑ رہا ہے،جن علاقوں میں میں جا رہی ہوں وہاں کئی لوگوں نے اپنے فارم تک نہیں بھرے ہیں۔یہ سبھی اپنی کوئی جانکاری دینا نہیں چاہتے۔ انہیں سمجھانا پڑ رہا ہے کہ آخر کیوں حکومت یہ سب کر رہی ہے۔اس کے علاوہ جب ہم یہ سارا ڈیٹا آن لائن ایپ پر اپلوڈ کرتے ہیں تو وہ کام نہیں کرتا۔اب اگرایپ کام نہیں کر رہا ہے تو اس میں ہماری کیا غلطی ہے لیکن سوال ہم سے کئے جا رہے ہیں۔ ڈیڈ لائن دے دی جاتی ہے اور بس کسی بھی قیمت پر کام مکمل کرنا ہے۔‘‘

افسران کے رویے سے ناراض ایک دیگر بی ایل او بتاتی ہیں کہ ابھی تک ہم کلیکشن کا ہی کام کر رہے ہیں۔گاؤں گاؤں جاکر ڈیٹا اکٹھا کرناہے لیکن لوگ بالکل بھی ہمارے ساتھ تعاون نہیں کر رہے ہیں۔ان میں اس ایس آئی آر کے تعلق سےاتنا تذبذب اورشک و شبہ ہے کہ ان کیلئے سمجھنا اور ہمارے لئے انہیں سمجھانا مشکل ہورہا ہے۔اس کے باوجود ہم اپنی جانب سے صد فیصد کوشش کر رہے ہیں۔ہم تو حکومت کی اس پہل کو اپنا پورا تعاون دے رہے ہیں لیکن افسران ہم سے ٹھیک طریقے سے بات بھی نہیں کررہے ہیں اوپر سے ،دھمکی دیں تو واقعی بہت برا لگتا ہے۔ 

ایک اور بی ایل او سے جب بات کی گئی تو پتہ چلا کہ ایس آئی آر عمل میں خواتین کو ووٹر لسٹ میں شامل کرنا ایک الگ طرح کا چیلنج ہے۔ان کے مطابق جو خواتین شادی کرکے اپنے مائکے سے دوسری جگہ آئی ہیں ان کا ڈیٹا کیسےووٹر لسٹ میں شامل کیا جائے اس میں کافی دقت آرہی ہے۔اس بارے میں بی ایل او کہتے ہیں کہ جو عورتیںشادی کرکےدوسری پنچایت میں آتی ہیں ان کا اس ایس آئی آر کے عمل میں فارم نہیں بھرا جا رہا ہے۔جو خواتین تھوڑا بہت پڑھی لکھی ہیں یا جنہیں جانکاری ہے وہ تو آن لائن جاکر ایک لنک پر کلک کرکےسارا کام کر لیتی ہیں لیکن یہ کام سبھی کو نہیں آتا۔