دنیا اور اسبابِ دنیا سے محبت کے سبب اللہ تعالیٰ سے جو غفلت  ہوتی ہے اس کا سب سے زیادہ مؤثر اور کارگر علاج انفاق فی سبیل اللہ ہے یعنی اللہ تعالیٰ کی راہ میں اپنا مال خرچ کرنا۔

یہ بات ملحوظ رہے کہ ہم نے انفاق فی سبیل اللہ کی اصطلاح استعمال کی ہے، زکوٰۃ کی اصطلاح نہیں استعمال کی۔ اس کی وجہ یہ ہے کہ تزکیۂ نفس اور احسان کے نقطۂ نظر سے دین میں جس چیز کی اہمیت ہے وہ انفاق کی ہے، صرف زکوٰۃ کی نہیں ہے۔ زکوٰۃ تو وہ کم سے کم مطالبہ ہے جو اسلام میں ایک صاحب ِمال سے کیا گیا ہے، اسلام کا اصلی مطالبہ تو انفاق کیلئے ہے جو سراً (ڈھکے چھپے انداز میں) بھی ہو، اعلانیہ بھی ، تنگی میں بھی ہو ، فراخی میں بھی ہو، دوست اور عزیز کیلئے بھی ہو اور مخالف اور دشمن کیلئے بھی۔

زکوٰۃ ادا کردینے سے آدمی ضرور بَری ہوجاتا ہے، لیکن جہاں تک اللہ تعالیٰ کے مطالبہ کا تعلق ہے وہ صرف زکوٰۃ ادا کردینے سے پورا نہیں ہوتا بلکہ یہ اس وقت پورا ہوتا ہے جب آدمی اپنی اور اپنے   اہل و عیال کی ناگزیر ضروریات کے سوا ہر مصرف سے اپنا مال بچا کر اس کو خدا کی راہ میں خرچ کرنے کے جتن کرے۔ جو شخص اس اہتمام سے اپنا مال خدا کی راہ میں خرچ کرتا ہے وہی درحقیقت انفاق کا اصلی حق ادا کرتا ہے اور وہی ہے جو اس زندگی میں روح کی بادشاہی کا جلوہ دیکھتا ہے اور آخرت میں اپنے رب کی خوشنودی کی جنت دیکھے گا۔  ذیل میں انفاق کی برکات یعنی فائدوں پر مختصراً گفتگو کی گئی ہے: 

انفاق کی سب سے بڑی برکت یہ ہے کہ یہ آدمی کے دل کو خدا کے ساتھ اس طرح جوڑ دیتا ہے کہ اس کے لئے خدا سے غافل رہنا ناممکن ہوجاتا ہے۔آدمی کو مال سے جو محبت ہے اس کا فطری نتیجہ یہ ہے کہ وہ جس جگہ اپنا مال رکھتا ہے یا جس کام میں بھی اپنا سرمایہ لگاتا ہے اسی جگہ یا اسی کام کے ساتھ اس کا دل بھی اٹکا رہتا ہے۔ اگر وہ اپنا مال کسی مخفی جگہ میں دفن کرتا ہے تو اس کا دل ہر وقت اسی گوشے اور اسی خرابے میں  رہتا ہے، اگر وہ کسی بینک میں رکھتا ہے تو اس بینک کے ساتھ اس کا دل بندھ جاتا ہے، اگر کسی کاروبار یا کسی کمپنی میں پیسہ لگاتا ہے تو رات دن اس کاروبار یا کمپنی کی فکر اس کے سر پر سوار رہتی ہے۔ الغرض جہاں آدمی اپنا سرمایہ لگاتا ہے، تجربہ گواہی دیتا ہے کہ وہیں اس کا دل بھی رہتا ہے۔ اس حقیقت کی روشنی میں دیکھئے تو واضح معلوم ہوجاتا ہے کہ جو شخص اپنا مال خدا کے راستے میں خرچ کرے گا اس کا دل بھی خدا ہی کے ساتھ رہے گا کیونکہ اس کا مال خدا ہی کے پاس ہے چنانچہ حضرت مسیح علیہ السلام کا ارشاد ہے کہ ’’تو اپنا مال اپنے خداوند کے پاس رکھ کیونکہ جہاں تیرا مال رہے گا وہیں تیرا دل بھی رہے گا۔‘‘

اس کی دوسری برکت یہ ہے کہ صاحب ِ انفاق کا اپنے معاشرے کے ساتھ بھی صحیح ربط قائم ہوجاتا ہے۔ غور کیجئے تو معلوم ہوگا کہ یہ چیز بھی کوئی معمولی چیز نہیں ہے بلکہ فلسفہ  ٔ شریعت کے اعتبار سے یہ دین کی دو بنیادوں میں سے دوسری ہے۔ ایک بندے کے صحیح بندہ بننے کے لئے دو چیزیں ضروری ہیں: ایک یہ کہ رب کے ساتھ اس کا تعلق بالکل ٹھیک ٹھیک قائم ہوجائے، دوسری یہ کہ خلق کے ساتھ وہ صحیح طور پر مربوط ہوجائے۔ پہلی چیز آدمی کو نماز سے حاصل ہوتی ہے اور دوسری چیز انفاق سے حاصل ہوتی ہے۔ چنانچہ یہی رمز ہے کہ نماز اور زکوٰۃ کا ذکر قرآن میں ساتھ ساتھ ہوا ہے اور سورۂ بقرہ کے شروع ہی میں نماز کے ساتھ جس دوسری چیز کا ذکر ہوا ہے وہ انفاق ہے، فرمایا گیا: ’’جو غیب پر ایمان لاتے ہیں، نماز قائم کرتے ہیں، جو رزق ہم نے اُن کو دیا ہے، اُس میں سے خرچ کرتے ہیں۔‘‘ (البقرہ:۲)

یہ دونوں چیزیں درحقیقت وہ دو بنیادیں ہیں جن پر خلق اور خالق کے ساتھ آدمی کے سارے تعلقات کی عمارت قائم ہوتی ہے۔ اس وجہ سے یوں سمجھنا چاہئے کہ انہی دو چیزوں پر درحقیقت پورے دین و شریعت کی عمارت قائم ہے۔ پچھلے مذاہب میں بھی تمام نیکیوں کی جڑ انہی دو چیزوں کو  قرار دیا گیا تھا۔ حضرت مسیح علیہ السلام سے ایک  مرتبہ ان کے ایک شاگرد نے پوچھا کہ تمام نیکیوں کی جڑ کیا ہے؟ انہوں نے فرمایا کہ تو تمام دل و جان سے اپنے خداوند سے محبت کر اور دوسری چیز یہ ہے کہ اپنے پڑوسی سے محبت کر۔ پھر فرمایا کہ انہی دو چیزوں پر تمام دین وشریعت قائم ہیں۔

پڑوسی سے محبت کا اولین تقاضا یہ ہے کہ آدمی اس کے لئے اپنا مال خرچ کرے ، اس کے دکھ درد میں اس کا شریک بنے اور اس کی مشکلات میں اس کا ہاتھ بٹائے۔