انفاق کی چوتھی برکت یہ ہے کہ اس سے آدمی کے مال میں برکت ہوتی ہے۔ قرآن مجید میں اس برکت کی مثال اس طرح بیان فرمائی گئی ہے:  ’’جو لوگ اﷲ کی راہ میں اپنے مال خرچ کرتے ہیں ان کی مثال (اس) دانے کی سی ہے جس سے سات بالیاں اگیں (اور پھر) ہر بالی میں سو دانے ہوں (یعنی سات سو گنا اجر پاتے ہیں)، اور اﷲ جس کے لئے چاہتا ہے (اس سے بھی) اضافہ فرما دیتا ہے، اور اﷲ بڑی وسعت والا خوب جاننے والا ہے۔‘‘ (البقرہ:۲۶۱)

دوسری جگہ فرمایا گیا ہے:

’’اور اﷲ سود کو مٹاتا ہے (یعنی سودی مال سے برکت کو ختم کرتا ہے) اور صدقات کو بڑھاتا ہے (یعنی صدقہ کے ذریعے مال کی برکت کو زیادہ کرتا ہے)۔‘‘ (البقرہ:۲۷۶)

یہ برکت آخرت میں جو ظاہر ہوگی وہ تو ہوگی ہی، اس دنیا میں بھی اس شخص کے مال میں برکت ہوتی ہے جو خدا کی راہ میں اپنا مال خرچ کرتا ہے۔ اس کی وجہ یہ ہے کہ خدا کے بے شمار بندے جو اس کے مال سے فائدہ اٹھاتے ہیں، اس کیلئے دعا کرتے ہیں۔ یہ دعا کرنے والے بالعموم اہل حاجت ہوتے ہیں جو اپنی حاجتمندی کے سبب اس بات کے مستحق اور حقدار ہوتے ہیں کہ اللہ تعالیٰ ان کی دعا قبول فرمائے بلکہ بعض روایات سے تو یہ بھی معلوم ہوتا ہے کہ ایسے شخص کے لئے خدا کے فرشتے بھی برکت کی دعا کرتے ہیں۔ 

اس موضوع پر ایک حدیث کا ترجمہ ملاحظہ ہو:

’’حضرت ابوہریرہؓ سے روایت ہے کہ حضورؐ نے ارشاد فرمایا کہ بندوں پر کوئی صبح بھی نہیں آتی ہے مگر دو فرشتے اترے ہیں، ایک  یہ دعا کرتا  ہے کہ اے اللہ تو اپنی راہ میں مال خرچ کرنے والے کو اس کا بدل عطا فرما، اور دوسرا یہ دعا کرتا ہے کہ تو بخیل کو بربادی اور نقصان عطا فرما۔‘‘ (متفق علیہ)

لیکن یہ یاد رکھنا چاہئے کہ برکت کے معنی یہ نہیں ہیں کہ خدا کی راہ میں خرچ کرنے والے کی تجوریاں بھر جاتی ہیں یا اس کے بینک بیلنس میں اضافہ ہوجاتا ہے یا اس کی املاک و جائیداد کی تعداد کہیں سے کہیں جا پہنچتی ہے بلکہ برکت کا مفہوم یہ ہے کہ مال کا جو حقیقی فائدہ اور نفع ہے، جس مقدار میں وہ حاصل کرتا ہے اس کے مقابل میں دوسرے حاصل نہیں کرپاتے۔ خلق خدا کی جو خدمت اس کے مال سے انجام پاتی ہے، دوسروں  کے مال سے انجام نہیں پاتی۔ معاشرہ  اور تمدن کی اصلاح و ترقی میں جو حصہ اس کے مال کا ہوتا ہے ، دوسروں کے مال کا نہیں ہوتا۔ خدا کی خوشنودی کا جو لازوال خزانہ وہ اپنے مال کے بدلے میں حاصل کرلیتا ہے ، دوسرے اس سے محروم رہتے ہیں۔ خلق خدا کے دلوں میں عزت اور محبت کا جو مقام اسے ملتا ہے ، روپے کو گن گن کر رکھنے والے اور کوٹھیوں اور کاروں کے مالک اس کا تصور بھی نہیں کرسکتے۔ پھر سب سے بڑی بات یہ ہے کہ جو فراغِ خاطر، جو سکونِ قلب، جو اعتماد علی اللہ، جو قلبی مسرت اور دل اور روح کی جو بادشاہی اس کو حاصل ہوتی ہے،  دنیا کے بڑے بڑے بادشاہوں کو کبھی خواب میں بھی وہ چیز ملنا تو دور، نظر بھی نہیں آتی۔

اس برکت کی ایک وجہ یہ بھی ہے کہ انفاق کرنے والے کا مال چونکہ دوسروں کے دبائے ہوئے حقوق کی فاسد ملاوٹ سے پاک ہوتا ہے اس وجہ سے صالح بیج کی طرح اس کی قوت ِنشوونما میں بڑا اضافہ ہوجاتا ہے۔ اللہ تعالیٰ اس کی قدر و قیمت کو مضاعف کردیتا ہے اور ان آفتوں سے وہ محفوظ ہوجاتا ہے جو آفتیں اندر اندر ان مالوں کو چٹ کرتی یا تلف کرتی رہتی ہیں  جن کے اندر دوسروں  کے حقوق کی آلائشیں ملی ہوئی ہوتی ہیں۔

انفاق کی یہ برکتیں نہایت واضح الفاظ میں قرآن اور حدیث میں بیان ہوئی ہیں اور ہر شخص اپنے ذاتی تجربے سے بھی ان کی صحت و صداقت کا اندازہ کرسکتا ہے۔ لیکن اگر انفاق کرنے والا کچھ باتوں کا خیال نہ رکھے اور اپنے انفاق کو پوری احتیاط کے ساتھ ان سے بچانے کی کوشش نہ کرے تو پھر اس کے انفاق کی ساری برکت برباد ہو کے رہ جاتی ہے اور وہ ان فوائد میں سے کوئی ایک فائدہ بھی حاصل نہیں کرپاتا جن کی طرف مذکورہ سطور میں اشارہ کیا گیا  ہے ۔ 

بہت سے لوگ خدا کی راہ میں خرچ تو کرتے ہیں لیکن دل کی فیاضی اور ولولہ اور حوصلہ کے ساتھ نہیں بلکہ ان کے پیش نظر صرف ایک مطالبہ کو کسی نہ کسی طرح پورا کردینا ہوتا ہے۔ جس بے دلی، بددلی اور افسردگی  کے ساتھ  وہ حکومت کاعائد کردہ کوئی ٹیکس ادا کردیتے ہیں اسی بددلی اور افسردگی کے ساتھ کسی دینی و مذہبی کام کے لئے بھی کچھ مال وہ نکال دیتے ہیں۔ اس اکراہ اور تنگ دلی  کے سبب اللہ کی راہ میں کچھ خرچ کرتے وقت ان کی خواہش اور کوشش ہر پہلو سے یہ ہوتی ہے کہ خدا کی راہ میں وہ چیز دیں جس کا دینا ان کے دل پر گراں نہ گزرے، جو ان کی ضرورت سے بالکل فاضل ہو یا جس سے کم از کم ان کو کوئی بڑا فائدہ اٹھا سکنے کی توقع نہ ہو۔ اگر قربانی کریں گے تو ایسے جانور کی جو کم قیمت اور بے حیثیت ہو، صدقہ کریں گے تو ایسے مال کا جو انہیں خود قبول کرنا پڑے تو اس کو دیکھ کر ٹھٹھک جائینگے اور اگر کسی قومی یا مذہبی مقصد کے لئے اپنی کوئی چیز الگ کریں گے تو وہ ایسی چیز ہوگی جس کی فائدہ بخشی کی صلاحیت اب ختم ہورہی ہو۔

اس طرح کا انفاق نہ صرف یہ کہ کوئی خیر و برکت نہیں پیدا کرتا بلکہ وہ سرے سے اللہ کے ہاں شرف ِ قبولیت ہی نہیں پاتا۔ انفاق کے موجب ِ خیر و برکت ہونے کیلئے سب سے پہلی چیز آدمی کے دل کی آمادگی اور تیاری ہے۔ جو انفاق دل کی آمادگی کے ساتھ نہ کیا جائے وہ خدا کے ہاں قبول ہی نہیں ہوتا تو اس میں خیر و برکت کیا ہوگی؟

یہ آمادگی اور تیاری اس تصورکو بیدار رکھنے سے پیدا ہوتی ہے کہ خدا یا اس کا کوئی کام ہمارا یا ہمارے مال کا محتاج نہیں ہے بلکہ ہم خود ہر لمحہ اس کی عنایت و مہربانی کے محتاج ہیں۔ یہ محض اس کی طرف سے ہمارا ایک امتحان ہے کہ وہ اپنے ایک ہاتھ سے ہمیں بخشتا ہے اور دوسرا کسی سائل یا مانگنے والے کی طرف سے  بڑھاتا ہے تاکہ دیکھے کہ ہم اسی کا بخشا ہوا مال خود اسی کو دیتے ہوئے کیا رویہ اختیار کرتے ہیں۔ فیاضی اور حوصلہ کے ساتھ دیتے ہیں یا تنگ دلی اور ترش روئی کے ساتھ۔ جو لوگ اس  آزمائش سے آگاہ ہیں وہ انفاق  کے ہرموقع کو خدا کی رضاجوئی کا ایک مغتنم (جو غنیمت ہو) موقع سمجھتے ہیں اور اس  کی راہ میں اپنے مال و متاع کا وہ حصہ پیش کرتے ہیں جو انہیں خود محبوب ہوتا  ہے۔محبوب اور پسندیدہ چیز خرچ کرنے ہی سے اللہ تعالیٰ کی اطاعت ، فرمانبرداری اور وفاداری کا حق ادا ہوتا ہے۔ جو لوگ محض زبانی جمع خرچ سے اللہ تعالیٰ کی وفاداری کا حق ادا کرنا چاہتے ہیں، ان کے بارے میں قرآن مجید کا یہ ارشاد ہے:

’’تم ہرگز نیکی کو نہیں پہنچ سکو گے جب تک تم (اللہ کی راہ میں) اپنی محبوب چیزوں میں سے خرچ نہ کرو۔‘‘ (آل عمران:۹۲)

جو لوگ خدا کی راہ میں اپنا ناپسندیدہ یا غلط راہوں سے آیا ہوا مال دے کر خدا کو ٹالنے کی خواہش رکھتے ہیں، ان کے بارے میں قرآن کا یہ ارشاد ہے:

’’اے ایمان والو! ان پاکیزہ کمائیوں میں سے اور اس میں سے جو ہم نے تمہارے لئے زمین سے نکالا ہے (اﷲ کی راہ میں) خرچ کیا کرو اور اس میں سے گندے مال کو (اﷲ کی راہ میں) خرچ کرنے کا ارادہ مت کرو کہ (اگر وہی تمہیں دیا جائے تو) تم خود اسے ہرگز نہ لو سوائے اس کے کہ تم اس میں چشم پوشی کر لو، اور جان لو کہ بیشک اﷲ بے نیاز لائقِ ہر حمد ہے۔‘‘ (البقرہ: ۲۶۷)