تعلیم کا بنیادی مقصد طلبہ کی جسمانی، فکری، سماجی، اخلاقی و روحانی نشوونما ہے۔ اس ہمہ جہت نشوونما میں اگرچہ اور بہت سے عوامل کارفرما ہوتے ہیں لیکن  اس پورے عمل میں سب سے اہم اور کلیدی کردار استاد کا ہوتا ہے  جو اپنی محنت،  اخلاص اور لگن سے طلبہ کی  ذہنی و نفسیاتی صلاحیتوں کو جلا بخشتا ہے، ان کی مخفی صلاحیتوں کو اجاگر کرکے انہیں  پروان چڑھاتا ہے۔

تعلیم کا بنیادی مقصد طلبہ کی جسمانی، فکری، سماجی، اخلاقی و روحانی نشوونما ہے۔ اس ہمہ جہت نشوونما میں اگرچہ اور بہت سے عوامل کارفرما ہوتے ہیں لیکن  اس پورے عمل میں سب سے اہم اور کلیدی کردار استاد کا ہوتا ہے  جو اپنی محنت،  اخلاص اور لگن سے طلبہ کی  ذہنی و نفسیاتی صلاحیتوں کو جلا بخشتا ہے، ان کی مخفی صلاحیتوں کو اجاگر کرکے انہیں  پروان چڑھاتا ہے تاکہ وہ اپنی اصل صلاحیت کی شناخت کرکے سماج میں اپنا حقیقی کردار ادا کرسکیں، انہیں سماجی و معاشرتی ذمہ داریوں اور حقوق و  فرائض  سے بھی  آگاہ کرتا ہے  تاکہ وہ ایک صالح ، متوازن اور صحت مند معاشرہ کی تشکیل  میں  موثر کردار ادا کر سکیں۔ 

سوال یہ ہے کہ  وہ بنیادی صلاحیتیں اور ذمہ داریاں کیا ہیں جو ایک استاد کو مثالی  اور کامیاب بناتی ہیں؟ اس تعلق سے   ہر معلم کو چاہئے کہ وہ  اس کا جواب معلم ِ انسانیت محمدؐ  کی ذات ِ مبارکہ  اور آپؐ  کی تعلیمات میں تلاش کرے، آپؐ کو آئیڈیل تسلیم کرکے آپؐ کی تعلیمات سے تدریسی و تعلیمی اصول و ضوابط، اوصاف اورطریقہ ہائے  تدریس  اخذکرے کیونکہ آپؐ بحیثیت ِ معلم ساری انسانیت کے لئے رہبر و راہنما ہیں۔ آپؐ منصب نبوت پر فائز  ہونے کے ساتھ ساتھ ایک عظیم معلم و  مربی  بھی ہیں جس کے بارے میں خود آپؐ نے اپنی زبان مبارک سے ارشاد فرمایا کہ’’مجھے معلم بنا کر مبعوث کیا گیا ہے۔‘‘ 

یہ بھی پڑھئے:جتنا آپ سوچتے ہیں ChatGPT اس سے کم پانی استعمال کرتا ہے: سیم آلٹ مین کا دعویٰ

بحیثیت معلم آپؐ کی شخصیت مبارکہ اور آپؐ کی تعلیمات کا جائزہ لیا جائے اور تعلیمی و تدریسی عمل اور اس کے بنیادی مقاصد کو سامنے رکھا جائے تو استاد کے اندر مطلوب صلاحیتوں اور ذمہ داریوں کو بنیادی طور پر دو حصوں میں تقسیم کیا جاسکتا ہے۔ ایک وہ جن کا تعلق تدریس سے ہے ، دوسرے وہ جن کا تعلق معلم کی شخصیت سے ہے  جنہیں اخلاقی ذمہ داریاں کہا جاسکتا ہے۔ مؤثر تعلیم و تدریس کے لئے ضروری ہے کہ یہ دونوں پہلو استاد کی شخصیت میں  متوازن طور پر جلوہ گر ہوں۔

تدریسی صلاحیتیں 

سب  سے  پہلی  اور بنیادی چیز جو  تدریس کیلئے ضروری ہے وہ یہ  ہے کہ استادکو اس مضمون پر مکمل دسترس حاصل ہو جس کی وہ تعلیم دے رہا ہے، زیر ِ درس مضمون کا وسیع مطالعہ اور اس کا گہرا ادراک ہو؛ تاکہ طلبہ کو ان کی ذہنی سطح کے لحاظ سے مختلف طریقوں سے سمجھا سکے اور ان کی جانب سے ہونے والے کسی بھی قسم کے سوالات و اعتراضات کے، ذہن نشین ہونے والے اطمینان بخش جواب دے سکے۔ اس کے بر عکس، اگر مدرس کا مطالعہ محدود ہے اور تصورِ مضمون واضح نہیں ہے تو وہ طلبہ کو مطمئن کرنے سے قاصر رہے گا۔ مزید برآں، اس مضمون کی  تعلیم کیلئے مناسب طریقہ تدریس سے بھی  پوری طرح آشنا ہو کیونکہ ہر مضمون کی فطرت و نوعیت کے  پیش نظر  اس کیلئے ایک مخصوص  طریقہ تدریس  ناگزیر ہوتا ہے ۔  آپؐ جس مضمون کا درس صحابہ کرام کو دیتے اس پر کامل دسترس رکھتے تھے اور مضمون و مواد کی فطرت و نوعیت کے اعتبار سے موزوں طریقہ تعلیم کا انتخاب بھی کیا کرتے تھے۔ یہی وجہ ہے کہ آپؐ کی تعلیم میں طریقہ تعلیم کا تنوع  پایا جاتا ہے ۔ کبھی آپؐ نے موقع محل کے اعتبار سے پہلے سوال قائم کیا تاکہ ذہن میں تجسس پیدا ہو جائے، پھر مسئلہ کو سمجھایا تو کبھی آپؐ نے تشبیہ دے کر مسئلہ کو واضح کیا اور کبھی قصہ سنا کر تربیت فرمائی۔ 

   مضمون میں مہارت  و دسترس تعلیم و تربیت  کا پہلا تقاضا ہے لیکن محض علمی  دسترس کامیاب  تدریس کیلئے کافی نہیں۔ استاد کے اندر اس مضمون کو طلبہ تک منتقل کرنے کی صلاحیت بھی ہونی چاہئے۔ استاد ابلاغ و ترسیل کے اصولوں سے واقف ہو،  زبان و بیان پر اس طرح قدرت حاصل ہو کہ طلبہ کی ذہنی سطح  و علمی استعداد کے اعتبار سے گفتگو کرسکے؛ کیونکہ استاد خواہ کتنا ہی باصلاحیت  ہو اگر علمی مواد کو موثر، منظم اور سلیقہ مند انداز سے پیش نہ کرسکے تو اس کا درس  موثر اور دلنشیں نہ ہوسکے گا؛ کیونکہ معلم کااندازِ گفتگو، الفاظ کا انتخاب، آواز کا زیر و بم، حرکات و سکنات، چہرے کے تاثرات اور اشاروں کا درست استعمال بھی تدریس کو مؤثر اور دل نشیں بنانے میں  نمایاں کردار ادا کرتے ہیں۔ آپؐ اس طرح جامع، صاف اور واضح انداز میں گفتگو فرماتے اور اندازِ تکلم ایسا دلنشیں ہوتا تھا کہ ہر ایک کو اچھی طرح سمجھ میں آجاتا تھا جیسا کہ حضرت عائشہ صدیقہ ؓبیان فرماتی ہیں کہ اللہ کے رسولؐ کی گفتگو تم لوگوں کی طرح لگاتار جلدی جلدی نہیں ہوتی تھی بلکہ آپؐ واضح اور صاف صاف گفتگو فرماتے، جو بھی آپؐ  کے حضور بیٹھا ہوتا اس گفتگو کو یاد کر لیتا تھا۔ (ترمذی) 

یہ بھی پڑھئے:فتاوے: تقسیم پہ رضامندی کے بعد انکار، مسافر امام کی اقتداء، ایئر فون لگاکر نماز پڑھنا