سعدیہ آج کالج سے گھر پیدل چل کر آئی تھی اور کافی تھک گئی تھی۔ اس لئےگھر پہنچتے ہی بیگ ٹیبل پر رکھا اور خاموشی سے صوفے پر لیٹ گئی۔ اس کی بڑی بہن شازیہ کو اسے یوں خاموش دیکھ کر تشویش ہوی تو بالآخر اس نے پوچھ ہی لیا ’’کیا ہوا سعدیہ؟ سب خیریت تو ہیں۔‘‘ آج اتنی خاموش نظر آرہی ہو۔ کیا بات ہے۔‘‘ سعدیہ نے بیزاری سے کہا ’’کچھ نہیں آپی.... وہ بس چھوٹ جانے کی وجہ سے پیدل چل کر آ رہی ہوں اس لئے تھک گئی ہوں۔‘‘ سعدیہ اکثر کالج سے آتے ہی سارے دن کے واقعات گھر میں سب کو سناتی پھرتی۔ ایک منٹ بھی خاموش نہ بیٹھتی۔ آج اسے اس طرح خاموش دیکھ شازیہ کو عجیب سا لگا تھا۔ سعدیہ گھر میں سب سے چھوٹی ہونے کے باعث ہر ایک کی لاڈلی اور چہیتی تھی۔ اس کی ہر بات مان لی جاتی۔

سعدیہ کافی ذہین اور سمجھدار تھی۔ اسے پڑھائی سے بہت لگاؤ تھا۔ وہ اعلیٰ تعلیم حاصل کرنا چاہتی تھی۔ کچھ بن کر اپنے والدین کا سہارا بننا چاہتی تھی۔ اس نے جو برے حالات گزارے ہیں اسے بدلنا چاہتی تھی۔ اپنی آنکھوں میں اس نے کچھ خواب سجائے تھے اور ان خوابوں کی تکمیل کے لئے وہ مسلسل محنت اور جدوجہد کرتی رہتی۔ اس کے والد مرزا صاحب ایک کمپنی میں ملازمت کرتے تھے۔ تنخواہ معمولی تھی۔ گھر کے اخراجات مشکل سے پورے ہو پاتے تھے۔ سعدیہ سے بڑی دو بہنیں اور تھیں، ثانیہ اور شازیہ۔ ثانیہ کی شادی ہوچکی تھی اور وہ بیرون ملک رہائش پذیر تھی۔ معمولی تنخواہ میں تعلیم کا بوجھ اٹھا پانا مشکل تھا اس لئے شازیہ نے تعلیم ترک کرکے گھریلو ذمہ داریاں سنبھال لیں۔ گھر کے مالی حالات کے پیش نظر اعلیٰ تعلیم کی ضد نہ کی۔ لیکن سعدیہ اعلیٰ تعلیم حاصل کرنے کے لئے بضد تھی۔ اس نے ٹیوشن کے ذریعے اپنے تعلیمی اخراجات کو پورا کرنے کا فیصلہ کیا۔ اس لئے اسے اجازت مل گئی۔ سعدیہ نے اپنے والد پر بوجھ نہ ڈالا بلکہ اپنے سارے اخراجات خود اٹھاتی۔ اس کی والدہ رفیعہ بیگم نہایت ہی سمجھدار، شکر گزار اور صابر خاتون تھیں۔ کبھی کسی بات کا شکوہ نہ کرتیں۔ جو کچھ ہوتا اسی میں گزر بسر کر لیتیں اور اپنی بیٹیوں کو بھی یہی نصیحت کرتی رہتیں۔

کچھ ماہ گزرے تھے کہ شازیہ کے لئے ایک اچھا خاصا رشتہ آگیا اور اسے بھی جلد رخصت کر دیا گیا۔ والدین جلد از جلد اپنے فرض کی ادائیگی چاہتے تھے۔ سعدیہ پڑھائی بھی کرتی اور اپنی والدہ کا ہاتھ بھی بٹاتی تھی۔ یوں ہی دن گزرتے گئے اور بالآخر سعدیہ اپنے فائنل ایئر میں پہنچ گئی۔ اب اسے اپنی منزل قریب اور خواب پورا ہوتا ہوا معلوم ہونے لگا۔ لیکن قسمت کو کچھ اور ہی منظور تھا۔ ابھی فائنل ایئر میں پہنچے اسے چھ ماہ ہی گزرے تھے کہ اس کے لئے ایک نہایت ہی اچھا رشتہ آگیا۔ اس کے والدین راضی تھے۔ انکار کی کوئی گنجائش ہی نہ تھی۔ لڑکا نہایت ہی خوبصورت، اعلیٰ تعلیم یافتہ اور اونچے گھرانے سے تھا۔ اس کے آگے پیچھے کوئی نہ تھا۔ والدہ بچپن میں ہی اسے چھوڑ کر چلی گئی تھی۔ اس کے بابا نے ہی اس کی پرورش و تربیت کی تھی۔ اور اسے اس مقام تک پہنچایا تھا۔ اس کے بابا ہی اس کے سب کچھ تھے۔ اسے اپنے بابا بہت عزیز تھے لیکن مختصر علالت کے بعد وہ بھی انتقال کرگئے اور فہد کی ذمہ داری اپنے قریبی دوست منظور علی کو دے گئے۔ منظور علی انکل کے علاوہ فہد کا کوئی نہ تھا۔

یہ خبر جب رفیعہ بیگم نے اپنی بیٹی سعدیہ کو سنائی تو اس کے پیروں تلے زمین کھسک گئی۔ وہ ابھی شادی کے لئے تیار نہ تھی۔ اسے اپنا کریئر بنانا تھا۔ اپنے خوابوں کو پورا کرنا تھا۔ والدہ نے اسے بہت سمجھانے کی کوشش کی کہ ایسے رشتے بار بار نہیں اتے۔ اور سب سے بڑی بات انہوں نے جہیز کی کوئی مانگ نہ کی۔ سعدیہ سمجھدار تھی وہ اپنے والدین کو تکلیف میں نہیں دیکھنا چاہتی تھی اس لئے والدین کے اصرار پر وہ خوشی خوشی راضی ہوگئی۔ والدین نے خوش ہو کر اسے بہت سی دعاؤں سے نوازا۔

والدہ نے اسے تسلی دیتے ہوئے کہا کہ ’’بیٹا! جو والدین کی بات مانتے ہیں، ان کا مان رکھتے ہیں وہ کبھی نقصان نہیں اٹھاتے۔‘‘ اسے اپنا خواب مکمل نہ ہونے کا غم تھا۔ ورنہ وہ والدین کی مرضی میں راضی تھی۔

ز ز ز

اب سعدیہ کی شادی ہوچکی تھی اور وہ اپنے گھر آچکی تھی۔ ابھی شادی کو ایک ماہ ہی گزرا تھا کہ اسے فہد کی رویے ناگریز لگنے لگے۔ وہ ہر چھوٹی چھوٹی بات پر غصہ کرتا اور چیختا چلّاتا۔ سعدیہ اس سے جب بھی کسی موضوع پر بات کر تی تو وہ طرح طرح کے ہزاروں سوال کرتا۔ نہ ڈھنگ سے جواب دیتا نہ ہی سیدھے منہ بات کرتا۔ ایسا لگتا جیسے اس کے نزدیک میری کوئی اہمیت ہی نہ ہو، مجھ پر اعتبار ہی نہ ہو۔ سعدیہ کو اس کی باتوں سے یوں محسوس ہوتا جیسے اسے عورت ذات پر اعتماد، یقین و بھروسہ نہ ہو۔ اسے ہر عورت بے وفا اور خود غرض معلوم ہوتی۔ سعدیہ اسے سمجھانے کی کوشش کرتی لیکن وہ سمجھنے کو تیار نہ تھا۔ اسے فہد سے ایسی امید نہ تھی۔ پہلے پہلے تو وہ خاموش رہی لیکن روز روز کی بحث سے وہ بیزار آچکی تھی۔

وہ ابھی انہی سوچوں میں گم تھی کہ رفیعہ بیگم کا فون آگیا۔ دعا سلام و خیر خیریت دریا فت کرنے کے بعد سعدیہ نے انہیں سارا ماجرہ سنایا۔ ساری بات سننے کے بعد انہوں نے سعدیہ کو صبر و شکر کی تلقین کی۔ اور کہاکہ ’’ایک دوسرے کو سمجھنے میں وقت لگتا ہے، ہر ایک کو پہلے تکلیف اٹھانی ہی پڑتی ہے بعد میں راحت ملتی ہے۔ ہر وقت کے شکوے اچھے نہیں ہوتے بیٹا۔ اسے سمجھنے کی کوشش کرو اور اپنے مسائل حل کرو۔‘‘

امی کی کہی باتوں کو وہ سنجیدگی سے سوچنے لگی۔ اور وجہ تلاش کرنے لگی کہ آخر کیا بات ہے جو فہد کا ہر وقت موڑ آف ہوتا ہے۔ ہر وقت غصہ کرتا رہتا ہے۔ اس نے کئی مرتبہ باتوں باتوں میں فہد سے معلوم کرنے کی کوشش کی لیکن نا کام رہی۔ بارہا کوششوں کے باوجود نا کامی ہاتھ لگنے پر وہ اندر ہی اندر ٹوٹ چکی تھی۔ بکھر سی گئی تھی۔ اسے کچھ سمجھ نہیں آرہا تھا کہ کیا کِیا جائے۔ آخرکار تھک ہار کر اپنے دونوں ہاتھ اٹھائے، رب کی بارگاہ میں گڑگڑا کر دعائیں کرنے لگیں ’’اے اللہ تو سب کے دلوں کا حال بہتر جانتا ہے۔ میرے حق میں جو بہتر ہے وہ معاملہ فرما۔‘‘ آنکھوں سے آنسو جاری تھے اور رب سے باتیں۔ کب وقت بیتا اسے پتہ ہی نہ چلا۔

دوسرے روز فہد آفس کے لئے نکل ہی رہا تھا کہ اسے کچھ یاد آیا وہ جھٹ اپنے کمرے میں گیا۔ اور فائل ڈھونڈنے لگا لیکن فائل ندارد۔ فائل اپنی جگہ نہ پا کر وہ ہنگامہ برپا کرنے لگا اور سعدیہ کو ڈانٹ ڈپٹ کی۔ سارا گھر سر پہ اٹھا لیا۔ اسی بات پر دونوں کی آپس میں پھر بحث و تکرار ہوئی۔