اُجالا، مجھے معاف کر دو۔ مَیں تمہارے لئے کچھ نہیں کرسکتا۔ تم مجھے بھول کر اپنی زندگی میں آگے بڑھ جانا۔ اُجالا کی آنکھوں سے آنسو بہنے لگے.... نم آواز میں اُجالا نے کہا عجیب بات ہے نا، زین! جس شخص نے مجھے زندگی بھر ساتھ دینے کے خواب دکھائے، آج وہی مجھے اکیلے جینے کا مشورہ دے رہا ہے۔ تم تو مجھے چھوڑ کر چلے جاؤ گے، مگر میں ان وعدوں کا کیا کروں جو تم نے میرے دل میں زندہ کئے تھے؟ تمہارے لئے شاید یہ ایک رشتے کا اختتام ہے، مگر میرے لئے یہ برسوں کے اعتبار کا ٹوٹنا ہے....

زین خاموش رہا.... اور کچھ دیر میں فون منقطع ہوگیا....

اُجالا کے ہاتھ سے موبائل گرگیا۔ جس شخص کے لئے وہ دنیا سے لڑنے کو تیار تھی، وہ اسے اپنے لئے ایک قدم بھی اٹھائے بغیر چھوڑ گیا تھا۔ اور آج پہلی بار اسے احساس ہوا کہ کسی پر اندھا اعتبار کرنے کی قیمت کبھی کبھی انسان اپنے سکون سے ادا کرتا ہے۔

اس پر گھبراہٹ طاری ہونے لگی۔ اس نے خود کو سنبھالنے کی کوشش کی اور اپنے والد کے کمرے کی طرف چلی گئی۔

والدین نے اپنی بیٹی کو اس حالت میں دیکھا تو پریشان ہوگئے۔

اُجالا روتے ہوئے انہیں سب کچھ بتا دیا۔

اس کے والدین نے اسے سنبھالا، اسے تسلی دی اور آرام کرنے کے لئے کہا۔

مگر اُجالا کے لئے سب کچھ اتنی آسانی سے ختم نہیں ہوا تھا۔

وہ کئی دن تک زین کو فون کرتی رہی۔

مگر جس اُجالا سے بات کرنے کے لئے کبھی زین بے چین رہتا تھا، آج وہ اس کی ایک کال بھی نہیں اٹھا رہا تھا۔

پھر ایک دن اُجالا کو معلوم ہوا کہ زین نے اسے ہر جگہ سے بلاک کر دیا ہے۔

اُجالا کے لئے خاص سے خاک ہونے کا یہ سفر بہت تکلیف دہ تھا۔

اس مرد نے اسے خاک کر دیا تھا جس نے کبھی اسے عزت کے مقام پر بٹھانے کا وعدہ کیا تھا۔

کچھ ہی دنوں میں اس کا چمکتا چہرہ مرجھا گیا۔ اس کی خاموشی اس کے والدین کے لئے سب سے بڑا درد بن گئی۔

ایک دن اُجالا اپنے کمرے میں خاموش بیٹھی خلا میں دیکھ رہی تھی۔

اس کے والد اس کے پاس آئے۔

انہوں نے محبت سے اس کے سَر پر ہاتھ رکھا اور کہا: ’’بیٹا! جو شخص تمہیں بیچ راستے میں چھوڑ کر جاسکتا ہے، وہ کبھی تمہارا حقیقی سہارا تھا ہی نہیں۔ شاید اللہ نے اسے تمہاری زندگی سے نکال کر تمہیں کسی بڑے نقصان سے بچا لیا ہے۔ جو تمہارا نہیں تھا، اس کے چلے جانے کا غم ضرور ہے، مگر اسے اپنی پوری زندگی کا اختتام مت سمجھو۔‘‘

اُجالا خاموشی سے سنتی رہی۔

اس کے والد نے کہا: ’’بیٹا، انسان کبھی کبھی کسی شخص کو اپنا نصیب سمجھ لیتا ہے، جبکہ اللہ نے اس کے لئے کچھ اور لکھ رکھا ہوتا ہے۔ تمہارے لئے بھی اللہ نے بہتر راستہ رکھا ہوگا۔ بس اپنے رب سے تعلق مت توڑنا۔‘‘

یہ الفاظ اُجالا کے دل میں اتر گئے۔

اس رات وہ بہت روئی۔

 

 

مگر اس بار اس کے آنسو صرف زین کے لئے نہیں تھے۔

وہ اپنے رب کے سامنے اپنے گزرے ہوئے وقت کا حساب بھی کر رہی تھی۔

اسے احساس ہوا کہ محبت نے اسے اندھا نہیں کیا تھا، بلکہ اس نے خود اپنی آنکھوں پر اعتبار کی پٹی باندھ لی تھی۔

اس نے اپنی غلطیوں کو پہچانا۔

اس نے جانا کہ محبت اپنی جگہ، مگر اپنی حدود، اپنی عزت اور خالق ِ کائنات کی رضا سے بڑھ کر کوئی رشتہ نہیں ہوتا....

کچھ دن اور گزرے۔

اُجالا نے خود کو دوبارہ سنبھالنا شروع کیا۔

اس نے زین کا انتظار کرنا چھوڑ دیا۔

اس نے پرانی گفتگوئیں مٹائیں، پرانی یادوں سے فاصلہ بنایا اور سب سے بڑھ کر اپنے دل کو اللہ کے قریب کرنا شروع کیا۔

جو وقت کبھی زین کے پیغام کے انتظار میں گزرتا تھا، اب وہی وقت قرآن پڑھنے، دعا کرنے، نماز میں دل لگانے اور اپنے مستقبل کے بارے میں سوچنے میں گزرنے لگا۔

زخم فوراً نہیں بھرے تھے۔

کبھی کبھی یاد پھر بھی آ جاتی تھی۔

مگر اب اُجالا ہر یاد کے ساتھ ٹوٹتی نہیں تھی۔

وہ خود سے کہتی: ’’جس چیز نے مجھے اللہ سے دور کیا، وہ میری منزل نہیں ہو سکتی۔ اور جس راستے پر چل کر میں اپنے رب کے قریب ہو جاؤں، شاید میری اصل منزل وہی ہے۔‘‘

وقت کے ساتھ اُجالا نے دوبارہ پڑھائی اور اپنے مستقبل پر توجہ دینا شروع کی۔ اس نے اپنے والدین کے چہروں پر دوبارہ مسکراہٹ لانے کی کوشش کی۔

وہ پہلے جیسی تو نہیں رہی تھی۔

وہ اس سے کہیں زیادہ سمجھدار ہو گئی تھی۔

اب وہ جانتی تھی کہ ہر قریب آنے والا شخص زندگی بھر کا ساتھی نہیں ہوتا، ہر خوبصورت وعدہ حقیقت نہیں بنتا اور ہر محبت نکاح کی منزل تک نہیں پہنچتی۔

کچھ لوگ ہماری زندگی میں سبق بن کر آتے ہیں۔ اور کچھ جدائیاں ہمیں ہمارے رب کے اور قریب کر دیتی ہیں۔

اُجالا نے زین کو معاف تو کر دیا، مگر اسے اپنی زندگی میں دوبارہ جگہ نہیں دی۔

کیونکہ بعض دروازے بند ہی رہیں تو انسان محفوظ رہتا ہے۔ اور شاید اُجالا کی زندگی کا سب سے خوبصورت موڑ وہ دن تھا جب اس نے زین کو نہیں، خود کو چن لیا۔

اس نے اپنے ماضی کو اپنی پہچان نہیں بننے دیا۔ اس نے اپنے زخموں کو اپنی کمزوری نہیں بلکہ اپنی طاقت بنا لیا۔

اور سب سے بڑھ کر، اس نے یہ سیکھ لیا کہ زندگی میں کسی انسان کو اتنا اختیار نہیں دینا چاہئے کہ اس کے آنے یا جانے سے انسان کا اللہ سے تعلق کمزور پڑ جائے۔

اُجالا نے ایک بار پھر زندگی کی طرف قدم بڑھایا۔ اس بار کسی کے وعدے کے سہارے نہیں، بلکہ اپنے رب پر بھروسے کے ساتھ۔ کیونکہ کبھی کبھی اللہ ہمیں کسی انسان سے اس لئے دور کرتا ہے کہ ہم دوبارہ اسی کی طرف لوٹ آئیں۔

اور اُجالا نے آخرکار سمجھ لیا تھا کہ زندگی کا سب سے خوبصورت اُجالا کسی انسان کے ساتھ سے نہیں، اللہ کے ساتھ سے آتا ہے۔

حدود ہمیں محبت سے دور نہیں کرتیں، حدود ہمیں غلط محبت سے محفوظ رکھتی ہیں....!