واعظ کی اپنی نصیحت اور روایات کی بھر مار سے بوجھل درس اگر محض نکتہ آفرینیوں کا مجموعہ بن جائے، تو ایسے دروس کے ذریعے عوام الناس کی بڑی تعداد کو قرآن سے جوڑنامشکل ہوجاتا ہے۔

اللہ نے قرآن کو آسان بنایا ہے: (القمر:۱۷)، البتہ قرآن اپنی تفہیم کے لئے انسانوں سے غور وفکر اور تدبر کا تقاضا کرتا ہے: ’’کیا وہ قرآن پر غور نہیں کرتے یا ان کے دلوں پر تالے چڑھے ہوئے ہیں ؟‘‘ (محمد:۲۴)
عام طور پر غوروتدبر دماغ کا کام تصور کیا جاتا ہے، لیکن اس آیت سے قرآن پر غوروفکر دل اور دماغ کی یکجائی کے بغیر ممکن نہیں ۔ قرآن کے مطابق حقیقی اندھا وہ نہیں جو آنکھوں کی بینائی سے محروم ہے بلکہ وہ ہے جس کا دل اندھا ہو چکا ہے: ’’حقیقت یہ ہے کہ آنکھیں اندھی نہیں ہوتی ہیں ، یہ سینوں میں موجود دل ہیں جو اندھے ہو جاتے ہیں ۔‘‘(الحج :۴۶)
اس آیت میں دل کا مقام بھی بتا دیا گیا ہے، جو سر نہیں ، سینہ ہے۔ قرآن مجید میں قلب کا لفظ محض خون کی پمپنگ مشین کے لئے نہیں ، عقل و ہوش اور جذبات کے متوازن وسیلے کے لئے استعمال ہوا ہے۔
اس حقیقت کے پیش نظر لازم ہے کہ بار بار تلاوت کرکے قرآن کے اسلوب کو اپنے اندر جذب کیا جائے اور قرآن کا درس قرآنی اسلوب ہی میں دیا جائے۔ یہ بات کہنے کی ضرورت اس لئے محسوس ہو رہی ہے کہ ہمارے ہاں درسِ قرآن تو بہت ہوتے ہیں ، مگر اکثر دروس میں قرآن سے اخذ شدہ قرآنی اسلوب کم ہی نظر آتا ہے۔ واعظ کی اپنی نصیحت اور روایات کی بھر مار سے بوجھل درس اگر محض نکتہ آفرینیوں کا مجموعہ بن جائے، تو ایسے دروس کے ذریعے عوام الناس کی بڑی تعداد کو قرآن سے نہیں جوڑا جا سکتا۔
قرآن کے اسلوبِ درس کے ضمن میں ذیل میں چند نکات پیش ہیں :
 دل و دماغ کو اپیل
 قرآن مجید پر گفتگو ہو یا تقریر، وہ دانشورانہ لیکچر بن کر نہیں رہ جانا چاہئے، کیونکہ قرآن کا مجموعی انداز خطیبانہ اور واعظانہ ہے۔ خطیب جہاں عقلی دلائل سے عقل و شعور کو اپیل کرتا ہے، وہاں دل میں جذبات کو چھیڑ کر انسانوں کو عمل پر آمادہ بھی کرتا ہے۔
قرآن نے اپنے موقف کو مدُلّل کرنے کے لئے عقلی دلائل بھی دیے ہیں اور نقلی دلائل بھی۔ یہ دلائل وہ ہیں جن کو ہر دور، ہر جگہ اور ہر علمی سطح کا انسان سمجھنے کے قابل ہے۔ جیسے: حضرت یوسفؑ کا اپنے قید کےساتھیوں سے سوال:’’اے زنداں کے ساتھیو، تم خود ہی سوچو کہ بہت سے متفرق رب بہتر ہیں یا وہ ایک اللہ جو سب غالب ہے؟ ‘‘ (یوسف:۳۹) ، ’’اگرآسمان وزمین میں ایک اللہ کے سوا دوسرے خدا بھی ہوتے تو ان دونوں کا نظام بگڑ جاتا۔‘‘(الانبیاء:۲۲)
یہ دونوں دلائل اتنے سادہ اور عام فہم ہیں کہ ایک اعلیٰ تعلیم یافتہ ہویا بالکل اَن پڑھ، وہ بھی توحید کا اقرار کئے بغیر نہیں رہ سکتا۔ اسی طرح آخرت کے انعقاد اور عدالت الٰہی کےقیام پر اس دلیل کا کوئی ایک بھی انکار نہیں کر سکتا:’’کیا ہم فرماں برداروں کا حال مجرموں کا سا کر دیں ؟ تم لوگوں کو کیا ہو گیا ہے، تم کیسے حکم لگاتے ہو؟ ‘‘ (القلم: ۳۵-۳۶)، ’’ کیا علم والے اور بے علم برابر ہو سکتے ہیں ؟‘‘(الزمر:۹)
بہت سی طبیعتیں عقلی دلائل کی طرف تو رجحان نہیں رکھتیں ، لیکن تاریخی مقامات و قصص سے عبرت پکڑتی ہیں ، گویا انھیں نقلی دلائل متاثر کرتے ہیں ۔ چنانچہ قرآن میں حضرت آدمؑ اور ابلیس، ہابیل و قابیل، طوفانِ نوح، عاد و ثمود کی تباہی، ابراہیمؑ و اسماعیلؑ کی سرگزشت، قومِ لوط پر عذاب، موسٰی و فرعون کا معرکہ، موسٰی و خضر ؑکا مکالمہ، بنی اسرائیل کا طرزِ عمل، اصحابِ کہف،ذوالقرنین، اصحاب الاخدود اور اصحاب الفیل کے عبرت آموز واقعات بیان ہوئے ہیں جن سے عرب مانوس تھے۔ اہل عرب نے یا تو ان مقات و کھنڈرات کو دیکھا ہوا تھا، یا وہ جن قوموں سے میل جول رکھتے تھے، ان کے ہاں یہ واقعات زبان زدِ عام تھے۔
اس لئے درس دیتے وقت شرکا کے مشاہدے کا بھی لحاظ رکھنا ہوگا۔ سائنسی اکتشافات اور فلسفیانہ استدلال، سامعین کو قرآن سے جوڑنے کے بجائے دُور کرنے کا باعث بنتا ہے۔
 آیات کی تکرار
تعلیم و تربیت کرنا دنیا میں سب سے مشکل کام ہے۔ انسان ایک جذبات رکھنے والی مخلوق ہے جو کبھی نصیحت کی طرف مائل ہوتی ہے تو کبھی پندو نصائح سے بیزار دکھائی دیتی ہے۔ کبھی غم کی تصویر ہے تو کبھی مجسم خوشی۔ یہی وجہ ہے کہ تعلیم وتربیت کا ایک ہی لگابندھا طریقِ کار ہرانسان کے لئے کارگر نہیں ہو سکتا۔ اس لئے ضروری ہے کہ تعلیم کایہ عمل ایک خشک مشق نہ بننے پائے۔ قرآن حکیم کا مقصد تعلیم اور تزکیہ و تربیت ہے، اس لئے اس کا طرزِ بیان کسی طرزِ تحریر کے بجائے خطیبانہ، واعظانہ اور معلّمانہ ہے، فرمایا:
’’ہم نے اس قرآن میں لوگوں کو مثالیں بدل بدل کر سمجھایا ہے۔‘‘ (الکہف:۵۴)
قرآن کے بنیادی موضوعات توحید، رسالت اور آخرت بار بار بیان ہوئے ہیں ، عموماً ایک موضوع کی تکرار اور تعلیم و تدریس کا ایک ہی انداز سامعین اور قارئین کے لئے اکتاہٹ کا باعث بنتا ہے۔ اس لئے قرآن ایک ہی موضوع کو سمجھانے کے لئے اس کے مختلف پہلوئوں کو مختلف مقامات پر مختلف انداز میں بیان کرتا ہے۔ جیسا کہ فرمایا:’’دیکھو! ہم کس طرح بار بار مختلف طریقوں سے اپنی آیات ان کے سامنے پیش کررہے ہیں تاکہ یہ حقیقت کو سمجھ لیں ۔‘‘ (الانعام:۶۵)
تکرار سے یہ امر واضح ہوتا ہے کہ اللہ کے نزدیک تصریف ِ آیات کس قدر ضروری ہے۔ ایک مدرس کے لئے ضروری ہے کہ ہرمرتبہ نئے ڈھنگ اور آہنگ کے ساتھ درس کو ترتیب دے۔ یعنی نئی مثالوں ، نئے واقعات اور دلائل سے اپنی گفتگو کو مزین کرے اور زبان و بیان کی ایسی یکسانیت سے بچنے کی کوشش کرے جو اس کے سامعین میں اکتاہٹ پیدا کرنے کا باعث بن سکتی ہو۔
سوال اُٹھانا
 کبھی قرآن انسان کو تدبّر پر یوں اُبھارتا ہے اور کبھی انسان کو چونکانے کا یہ انداز ہے:’’اور تم کیا جانتے ہو کہ وہ جزا کا دن کیا ہے؟ ہاں ، تمہیں کیا خبر کہ وہ جزا کا دن کیا ہے؟ ‘‘ (الانفطار: ۱۷۔۱۸) اور کبھی ’’عظیم حادثہ! کیا ہے وہ عظیم حادثہ؟ تم کیا جانو کہ وہ عظیم حادثہ کیا ہے؟ ‘‘ (القارعہ:۱۔۳) کبھی ایک ہی مضمون کے فہم کے لئے مختلف مثالیں بیان کرتا ہے۔ کبھی انسانی عقل کو اس طرح بھی اپیل کرتا ہے:’’کیا ہم اطاعت گزاروں اور مجرموں کو برابر کر دیں گے؟ تمہیں کیا ہو گیا ہے کہ تم ایسے فیصلے کرتے ہو؟‘‘ (القلم: ۳۵-۳۶) فرمایا: ’’کیا علم والے اور بے علم برابر ہو سکتے ہیں ؟‘‘ (الزمر:۹)
کبھی انسانی فطرت میں برائی کے لئے موجود کراہت کو یوں انگیخت دیتا ہے کہ غیبت کے گھنائونے پن کو نمایاں کرنے کے لئے یہ سوال سب کے سامنے رکھتا ہے:
’’کیا تمہارے اندر کوئی ایسا بھی ہے جو اپنے مردہ بھائی کا گوشت کھانا پسند کرے؟‘‘ (الحجرات:۱۲)
ایک اچھے معلّم و مربیّ کا یہی طریقہ ہے کہ وہ محض نصیحت اور زجرو توبیخ ہی نہ کرے بلکہ انسانی طبیعت میں برائی سے نفرت اور نیکی کی طرف رغبت کا جو جذبہ موجود ہے، اسے بھی اُبھارے۔
 صفاتِ الٰہی کی تکرار
قرآن میں جہاں بھی نیکی کا حکم دیا گیا ہے یا برائی سے منع کیا گیا ہے، وہاں ساتھ ہی اس کی مناسبت سے صفات الٰہی کا ذکر بھی ضرور موجود ہے، تاکہ انسان اپنے آپ کو ان صفات کے آئینے میں دیکھ کر اللہ کی قدرت اور اپنی پوزیشن کا تعین کرے۔ قرآن میں معاشرت ومعیشت کا کوئی بھی قانون بیان کیا گیا ہے تو اسے محض قانون کی کتاب کی طرح خشک انداز میں شق وار بیان نہیں کیا، بلکہ انسانوں کو تقویٰ اختیار کرنے اور احسان کی روش اپنانے کی نصیحت بھی کی گئی ہے۔
سورۃ النساء آیت۳۴ ؍میں جہاں یہ بیان ہوا کہ ’’مرد عورتوں پر نگران ہیں ‘‘وہاں ساتھ مردوں کو یہ یاد دہانی کرا دی گئی کہ تمہیں اگر عورتوں پر بالادست اور صاحب ِاختیار بنایا گیا ہے، تو اپنے اختیارات استعمال کرتے ہوئے اپنے اوپر اپنے رب کی پکڑ کا بھی دھیان رکھنا کہ وہ تم سے بھی زیادہ بالادست ہے۔
 ترغیب و ترہیب
قرآن میں قَدْ اَفْلَحَ الْمُوْمِنُوْنَ کہنے کے ساتھ مومنوں کی چیدہ چیدہ صفات کا تذکرہ کیا گیا۔ سورۂ فرقان میں عبادالرحمٰن کی صفات کا بیان بھی شوق انگیز ہے۔
یہ بیان کیا گیا کہ رحمٰن کے بندے تو ان ان صفات کے حامل ہوتے ہیں ، تاکہ ہر انسان اپنے کردار کا خود جائزہ لے کہ وہ رحمٰن کا بندہ کہلانے کا حق دار ہے یا شیطان کابندہ کہلانے کا سزاوار؟
قرآنی تربیت کا ایک انداز یہ بھی ہے کہ وہ ہر لمحہ فرد میں اُمید اور خوف کی کیفیت کو اس طرح قائم رکھتا ہے کہ انسان نہ تو خدا کی گرفت سے بے خوف ہو سکے اور نہ اس کی رحمت و مغفرت سے مایوس ہو جائے۔ چنانچہ جہاں اس نے عذابِ جہنم کا ذکر کیا ہے ساتھ ہی جنت کی بشارت اور اس کی نعمتوں کا تفصیلی تذکرہ بھی کیا ہے۔
 قرآن میں بنیادی انسانی اخلاقیات کو اُبھار کر بھی اسلامی عقائد و اصولوں کی افادیت اور فرضیت کی طرف متوجہ کیا گیا ہے۔ جیسے سورۃ الماعون میں یوم جزا کو جھٹلانے والے کی اس بدخلقی کا ذکر ہے کہ وہ نہ تو یتیم کو کھانا کھلانے کی ترغیب دیتا ہے اور نہ روزمرہ کے استعمال کی چھوٹی موٹی اشیا عاریتاً کسی کو برتنے کے لئے دیتاہے۔ کبھی ان کے سامنے دو قسم کے کردار رکھ کر خود ان میں سے اپنے لئے کسی کردار کا انتخاب کرنے کا راستہ دکھایا گیا ہے۔ جیسے سورئہ بقرہ کی آیت۲۰۴؍ سے ۲۰۷؍ میں پہلے باتوں سے دل موہ لینے والے ایک دنیا پرست انسان کا ذکر ہے۔ پھر اس کے برعکس ایک کردار ایسے شخص کا ہے جو محض رضائے الٰہی کے حصول کے لئے اپنی جان تک کودائو پر لگائے رکھتا ہے۔ 

قرآن کریم کا ایک اسلوب یہ ہے کہ وہ اپنے بیان میں اپنے مدعا و مقصد پر مرکوز (Focus) رہتا ہے۔ اس سےمتعلقہ ثانوی درجے کی باتوں کو اہمیت نہیں دیتا۔ سورۂ کہف میں زندگی بعد ازموت کے وقوع کو ثابت کرنے کیلئے اللہ تعالیٰ نے اصحاب کہف کا واقعہ بیان کیا۔ تورات اور اسرائیلی روایات کے زیر اثر عیسائیوں میں اور ہمارے ہاں بھی اس بات پر بحث ملتی ہے کہ ان کی تعداد کتنی تھی؟ قرآن نے اس بحث کا ذکر کیا ہے:
’’کچھ لوگ کہیں گے کہ وہ تین تھے اور چوتھا ان کا کتا تھا اور کچھ دوسرے کہہ دیں گے کہ پانچ تھے اور چھٹا اُن کا کتا تھا یہ سب بے تکی ہانکتے ہیں کچھ اور لوگ کہتے ہیں کہ سات تھے اور آٹھواں اُن کا کتا تھا کہو، میرا رب ہی بہتر جانتا ہے کہ وہ کتنے تھے۔‘‘ (الکہف:۲۲)
آیت کی تفسیر میں مولانا مودودی لکھتے ہیں : ’’مطلب یہ کہ اصل چیز ان کی تعداد نہیں ہے بلکہ اصل چیز وہ سبق ہیں جو اس قصے سے ملتے ہیں ۔ اس سے یہ سبق ملتا ہے کہ ایک سچے مومن کو کسی حال میں حق سے منہ موڑنے اور باطل کے سامنے سرجھکانے کے لئے تیار نہ ہونا چاہئے۔ اس سے یہ سبق ملتا ہے کہ مومن کا اعتماد اسبابِ دنیا پر نہیں بلکہ اللہ پر ہونا چاہئے۔ ان سے توجہ ہٹا کر اس کھوج میں لگ جانا کہ اصحابِ کہف کتنے تھے اور کتنے نہ تھے اور ان کے نام کیا کیا تھے اور ان کا کتا کس رنگ کا تھا؟ یہ ان لوگوں کا کام ہے جو مغز کو چھوڑ کر چھلکوں سے دلچسپی رکھتے ہیں ۔ اس لئے اللہ تعالیٰ نے نبیؐ کو اور آپؐ کے واسطے سے اہل ایمان کو یہ تعلیم دی کہ اگر دوسرے لوگ اس طرح کی غیر متعلق بحثیں چھیڑیں بھی تو تم ان میں نہ الجھو، نہ ایسے سوالات کی تحقیق میں اپنا وقت ضائع کرو۔ اپنی توجہ صرف کام کی بات پر مرکوز رکھو۔ یہی وجہ ہے کہ اللہ نے خود ان کی صحیح تعداد بیان نہیں فرمائی تاکہ شوقِ فضول رکھنے والوں کو غذا نہ ملے۔‘‘ (تفہیم القرآن ج۳،ص۲۰)۔ اسی طرح اللہ نے آدمؑ کو فرمایا: ’’اس درخت کے قریب نہ جانا ورنہ ظالموں میں شمار ہو گے۔‘‘ (البقرۃ:۳۵)
اب یہ درخت کون سا تھا؟ اسرائیلی روایات کے زیر اثر ہمارے ہاں اس پر بحثیں ہوئیں کہ گندم کا تھا یا انجیر یا کوئی اور۔ لیکن اللہ نے آدمؑ کو آزمانے اور یہ دکھانے کے لئے کہ شیطان اسے کس کس طریقے سے بہکائے گا، ایک درخت کو مقرر کر دیا۔ اب اس سے کیا فرق پڑتا ہے کہ وہ کون سا درخت ہے؟ لہٰذا، قرآن اور صحیح احادیث میں اس درخت کے نام کی کوئی بحث نہیں ملتی۔
امثال اور واقعات
قرآن کے اسلوب کی ایک اور خوبی یہ ہے کہ اس میں اگرچہ عقائد و نظریات کے برحق ہونے پر استدلال کیا گیا ہے مگر اس کا طرز استدلال فلسفیوں کی طرح محض تجریدی نہیں بلکہ تمثیلی اور واقعاتی ہے۔ اللہ نے بات سمجھانے کے لئے مکھی، مچھر، مکڑی جیسی معمولی اور حقیر سمجھی جانے والی مخلوق کی مثالیں دی ہیں ۔ شہد کی مکھی، گھوڑوں ، خچروں اور گدھوں کی سواریوں کو ربّ نے کس طرح انسانی خدمت میں لگایا ہوا ہے، اس کا ذکر کیا ہے۔
سورج، چاند، ستاروں ، شجرو حجر اور سمندروں کو کس طرح انسان کے لئے مسخر کر دیا ہے؟ جب کہ اپنے اچھے اعمال کو شرک کے ذریعے گدلا کر دینے والے کو اس عورت سے تشبیہ دی ہے جو محنت سے کاتے ہوئے سوت کو خود ہی ضائع کر دیتی ہے۔ موقف کو مدلل کرنے کے لئے انبیاء ؑ اور ان کی مخاطب اقوام کے مکالمے اور واقعات بیان کئے ہیں ۔ اس لئے قرآن کی طرف بلانے والے کے لئے ضروری ہے کہ وہ اپنے درس میں محض عقلی و فکری دلائل ہی نہ دے بلکہ اپنے استدلال کو مثالوں ، تاریخی واقعات اور روز مرہ زندگی کے ہلکے پھلکے واقعات سے مزین کرے۔ اس لئے کہ ہر دور کا انسان قصے کہانیوں سے دلچسپی رکھتا ہے اور واقعات سے سبق حاصل کرتا ہے۔
 فکر آخرت کی عملی ترجیح
قرآن کے بیان کردہ عقائد کی منطقی ترتیب میں اوّلین عقیدۂ توحید پر ایمان ہے مگر عملی اعتبار سے عقیدۂ آخرت کی غیر معمولی اہمیت ہے کیونکہ کسی سزا کے خوف اور اجر کی اُمید کے بغیر حق پرستی مشکل ہے۔ نزولِ قرآن کے ابتدائی دور کی سورتوں میں توحید سے زیادہ عقیدۂ آخرت یعنی قیامت، حشرونشر، میزان اور جنت و دوزخ کا ذکر زیادہ غالب ہے۔ مکی دور کی ابتدائی سورتیں جو کہ زیادہ تر اٹھائیسویں ، انتیسویں اور تیسویں پارے میں ہیں ، وہ ملاحظہ کی جا سکتی ہیں ۔ اس لئے ایک مدرس اگر شرک آلودہ لوگوں کو سچا توحید پرست بنانا چاہتا ہے تو پہلےمرحلے میں اسے ان لوگوں میں فکر ِ آخرت کا احساس جگانا ہوگا کیونکہ انکارِ توحید کی اصل اور بنیادی وجہ انکارِ آخرت ہی ہے۔
اخلاقیات اور سماجی اقدار کا احیاء
ہمارے ہاں درس و تبلیغ میں اکثر احکامِ شرعی کے بیان میں فقہی پہلو غالب آجاتا ہے، جب کہ قرآن نے اپنے نزول کے ابتدائی تیرہ سال میں شرعی پابندیوں کی بات نہیں کی۔ زور ِتاکید زیادہ تر اخلاقیات اور انسانی و سماجی اقدار کو اُجاگر کرنے پر رہا۔ معاشرے کے کمزور طبقات یعنی یتیموں ، مسکینوں ، غلاموں ، مسافروں سے ہمدردی، سچائی، امانت، سخاوت، پابندیٔ عہد، والدین اور رشتہ داروں سے حُسنِ سلوک کی تاکید جابجا نظر آتی ہے:
’’تم نے دیکھا اس شخص کو جو آخرت کی جزا و سزا کو جھٹلاتا ہے؟ وہی تو ہے جو یتیم کو دھکے دیتا ہے اور مسکین کا کھانا دینے پر نہیں اُکساتا۔‘‘ 
(الماعون: ۱-۳) 
’’اور جب وہ اُس کو آزمائش میں ڈالتا ہے اور اُس کا رزق اُس پر تنگ کر دیتا ہے تو وہ کہتا ہے کہ میرے رب نے مجھے ذلیل کر دیا، ہرگز نہیں ، بلکہ تم یتیم کی تکریم نہیں کرتے اور مسکین کو کھانا کھلانے پر ایک دوسرے کو نہیں ابھارتے اور میراث کا سارا مال سمیٹ کر کھا جاتے ہو اور مال کی محبت میں بری طرح گرفتار ہو۔‘‘ (الفجر: ۱۶-۲۰) 
جب اہل جنت دوزخیوں سے پوچھیں گے کہ تمہیں کیا چیز دوزخ میں لے گئی تو اس کی ایک وجہ یہ بیان کریں گے: ’’اور ہم مسکین کو کھانا نہیں کھلاتے تھے۔‘‘ (المدثر:۴۴) 
یتیم و مسکین کے صرف کھانے پینے کی ہی ضرورت کو پورا کرنا کافی نہیں ، انسان ہونے کے ناطے وہ عزت و تکریم کے بھی مستحق ہیں ۔ عموماً کمزوروں کو دینے والے ان کی بے توقیری کر رہے ہوتے ہیں ۔ قرآن کریم نے اسے انسان کی ایک بڑی خامی بتایا ہے۔
یتیم اور ضرورت مند سائل کی عزّتِ نفس کے خیال رکھنے کی ہدایت نزول قرآن کے ابتدائی دنوں سے آپؐ کو کی جارہی تھی، فرمایا: ’’پس یتیم پر سختی نہ کرو اور سائل کو نہ جھڑکو۔‘‘ (الضحیٰ: ۹-۱۰)
ایسا صدقہ جس میں ضرورتمند کو ذہنی اذیت دی جائے، اس سے تو نہ دینا بہتر ہے۔ فرمایا:
’’ایک میٹھا بول اور (ضرورتمند کی کسی ناگوار بات پر) چشم پوشی اس خیرات سے بہتر ہے جس کے پیچھے دُکھ ہو۔‘‘(البقرۃ:۲۶۳) 
 مذکورہ چند نکات سے واضح ہوتا ہے کہ درس قرآن کا فریضہ انجام دینے والوں کا، ا سلوب قرآن پر خصوصی توجہ دینا ازحد ضروری ہے۔