یمن میں جاری حوثی گروپ اور سرکاری فوجوں کے مابین کشیدگی کے نتیجے میں ایک ہی دن میں ۱۴۰۰؍ خاندان بے گھر ہوگئے،تعز، الحدیدہ اور لحج میں بے گھر ہونے والے خاندانوں کی تعداد ستمبر کے آغاز سے اب تک۶۱۴۵؍ تک پہنچ گئی ہے۔

سرکاری خبر رساں ایجنسی سبا کی شائع کردہ ایک بیان کے مطابق، حکومت کے زیرِ انتظام ’’بے گھر افراد کے کیمپوں کے انتظام کے لیے ایگزیکٹو یونٹ‘‘ نے کہا کہ۸؍ ستمبر کو تعز، الحدیدہ اور لحج کے صوبوں میں۱۳۶۷؍ خاندان بے گھر ہوئے۔اس نئی بے دخلی کے ساتھ، تینوں صوبوں میں بے گھر ہونے والے خاندانوں کی کل تعداد ستمبر کے آغاز سے اب تک۶۱۴۵؍ تک پہنچ گئی ہے۔ایجنسی نے بے دخلی کی وجہ جاری فوجی کشیدگی اور شہریوں کی حفاظت کے بارے میں بڑھتی ہوئی تشویش کو قرار دیا۔اس نے کہا کہ فیلڈ ٹیمیں بے گھر خاندانوں کا اندراج، ان کے مقامات کی تصدیق اور ان کی انسانی ضروریات کا جائزہ لینے کا سلسلہ جاری رکھے ہوئے ہیں، ساتھ ہی مقامی حکام، امدادی تنظیموں اور شراکت داروں کے ساتھ ہم آہنگی کر رہی ہیں۔

یہ بھی پڑھئے: سعودی عرب کے متعدد شہروں پر حوثیوں کے حملے

بعدازاں یونٹ نے انسانی تنظیموں اور عطیہ دہندگان سے اپنی ردعمل کو بڑھانے کی اپیل کی، اور پناہ گاہ، خوراک، پانی، بنیادی سامان اور صحت کی خدمات کی بڑھتی ہوئی ضرورت اور مزید بے دخلی کے امکان سے خبردار کیا۔ واضح رہے کہ یہ بے دخلی ایسے وقت میں ہوئی ہے جب گزشتہ ہفتوں کے دوران یمنی سرکاری افواج اور حوثیوں کے درمیان متعدد محاذوں پر لڑائی شدت اختیار کر گئی ہے، خاص طور پر تعز، الجوف اور البیضا میں، جبکہ حوثی ٹھکانوں پر فضائی حملے بھی ہوئے ہیں۔بدھ کو سرکاری افواج اور حوثیوں کے درمیان تعز، البیضا، الضالع اور الحدیدہ میں بھی جھڑپوں کی اطلاع ملی، جبکہ حکومت نواز افواج نے باب المندب آبنائے کے قریب اسٹریٹجک مغربی ساحلی شہر مخا میں مزید کمک بھیجی۔

یہ بھی پڑھئے: حماس کے ۷؍ اکتوبر ۲۳ء حملے سے ۱۰؍ دن قبل یو اے ای نے نیتن یاہو کو خبردار کیا تھا: رپورٹ

ذہن نشین رہے کہ جب حوثیوں نے دارالحکومت صنعاء اور کئی صوبوں پر قبضہ کر لیا، جس کے نتیجے میں مارچ۲۰۱۵ء میں سعودی قیادت میں عرب اتحاد نے بین الاقوامی سطح پر تسلیم شدہ حکومت کی حمایت میں مداخلت کی تب سے  یمن خانہ جنگی میں مبتلا ہے۔