اسمارٹ فون کو چارج کرنے کیلئے اب تک بازار میں مختلف طرح کے پاور بینک موجود ہیں مگر بلجیم کی کمپنی نے اس معاملے میں انوکھی پیش رفت کی ہے۔

اسمارٹ فون کو چارج کرنے کیلئے اب تک بازار میں مختلف طرح کے پاور بینک موجود ہیں مگر بلجیم کی کمپنی نے اس معاملے میں انوکھی پیش رفت کی ہے۔ اس کمپنی نے ایسا پاور بینک بنایاہے جو سائز میں تو چھوٹا ہے ہی مگر طاقتور ہے۔ اتنا ہی نہیں اس کی سب سے خاص بات یہ ہے کہ یہ پاور بینک سورج کی توانائی سے خود کو چارج کرلیتا ہے۔اس سولر پاور بینک کو’  سن سلائس ‘کا نام دیا گیا ہے۔چھوٹی جسامت کے باوجود یہ تمام روایتی شمسی چارجر کے مقابلے میں تین گنا تیزرفتار اور مؤثر ہے۔ اسے بنانے والی کمپنی کا دعویٰ ہے کہ یہ سولر پاور بینک  اسمارٹ فون کو۳؍ گھنٹے میںمکمل چارج کرسکتا ہے۔ اتنا ہی نہیں اس پاور بینک سےکسی بجلی کے بغیر جب چاہیں اور جہاں چاہیں اسمارٹ فون کو چارج کرسکتے ہیں۔ لہٰذا یہ  ایسے افراد کیلئے بہت مفید ثابت ہوگا جو ایسے علاقوں میں جارہے ہوں جہاں بجلی کی سہولت نہ ہو یا پھر بجلی کم وقت کے لئے دستیاب ہوتی ہو۔اس انوکھے  سولر چارجر پاوربینک میں۲ء۴؍ ایمپیئر بیٹری نصب ہے۔ اس طرح اتنی جسامت میں اس سے زیادہ بہترین شمسی پاور بینک شاید کوئی اور نہ ہوگا۔ یہ سولر چارجر تہہ در تہہ کھل کر ایک پٹے کی صورت اختیار کرلیتا ہے جس کے اندر لچکدار سولر پینل کھلتے چلے جاتے ہیں۔ بلجیم  کے دو انجینئرز نے اس پر غیرمعمولی کام کیا ہے اور تین سال کی مسلسل محنت کے بعد ایک نئی ٹیکنالوجی بنائی ہے جسے سن سلائس کا نام دیا گیا ہے۔ اس طرح روایتی شمسی چارجر سے یہ آلہ بہت آگے ہے۔ تجربہ گاہ میں آزمائش کے دوران اسے سے گو پرو، آئی فون، اینڈرائیڈ فون، جی پی ایس آلات اور چھوٹے دستی آلات چارج کئے گئے جس کے بہترین نتائج برآمد ہوئے ہیں۔دوسری اہم بات یہ ہے کہ یہ مکمل طور پر واٹر پروف اور ماحول دوست ہے۔ تاہم اس کی ڈیزائننگ کیلئے  مائیکروالیکٹرانکس کے کئی جدید تصورات سے مدد لی گئی ہے۔ تکنیکی تفصیلات کے مطابق اس پر نصب سولر پینل چار واٹ کے ہیں۔ بیٹری کی گنجائش۴؍ہزار ایم اے ایچ ہے۔ اس کا مجموعی وزن۲۲۰؍ گرام ہے اور ہر طرح کی کیبل فراہم کی جارہی ہے۔سن سلائس کی قیمت۹۹؍ یورو(کم و بیش ۸؍ہزار ۶۰۰؍روپے) ہے۔