مٹن قورمہ بنانے کی آسان ترکیب ملاحظہ کیجئے۔

درکار اجزاء: گوشت ایک کلو، پیاز ۳؍ عدد، دہی ایک کپ، ادرک لہسن کا پیسٹ ۲؍ بڑے چمچے، لال مرچ پاؤڈر ایک چھوٹا چمچہ، ہلدی پاؤڈر آدھا چھوٹا چمچہ، دھنیا پاؤڈر ۲؍ چھوٹے چمچے، زیرہ پاؤڈر اور گرم مسالہ پاؤڈر ایک، ایک چھوٹا چمچہ، نمک حسب ِ ذائقہ، بادام ۱۰؍ سے ۱۲؍ عدد (پیس کر پیسٹ بنا لیں)، گھی یا تیل آدھا کپ، پانی حسب ِ ضرورت، ثابت گرم مسالہ (دار چینی ایک ٹکڑا، لونگ ۴؍ سے ۵؍ عدد، بڑی الائچی ایک عدد، کالی مرچ ۶؍ سے ۸؍ عدد، تیز پتہ ایک عدد)۔
بنانے کا طریقہ: ایک دیگچی میں گھی یا تیل گرم کریں۔ اس میں کٹی ہوئی پیاز ڈال کر سنہری براؤن ہونے تک بھون لیں اور پھر نکال کر الگ رکھ دیں۔ اسی دیگچی میں ثابت گرم مسالہ ڈال کر ذرا دیر بھونیں۔ پھر ادرک لہسن کا پیسٹ ڈال کر خوشبو آنے تک بھونیں۔ اس میں گوشت ڈال کر بھونیں۔ جب گوشت کا رنگ تبدیل ہو جائے تو اس میں دہی، لال مرچ پاؤڈر، ہلدی پاؤڈر، دھنیا پاؤڈر، زیرہ پاؤڈر اور نمک ڈالیں۔ گوشت کو مزید بھوننے کے بعد، اس میں پانی ڈالیں اور ڈھکن لگا کر درمیانی آنچ پر گوشت گلنے تک پکائیں۔ جب گوشت نرم ہو جائے تو اس میں بادام کا پیسٹ اور فرائی کی ہوئی پیاز شامل کرکے ملا لیں۔ آخر میں گرم مسالہ پاؤڈر چھڑک کر چولہے کی آنچ ہلکی کرکے ۱۰؍ سے ۱۵؍ منٹ کیلئے دم پر رکھ دیں تاکہ تیل اوپر آجائے اور قورمہ مزید گاڑھا ہو جائے۔ تیار مٹن قورمہ کو نان کیساتھ گرم گرم پیش کریں۔