اسٹرابیری فِلڈ کیک بنانے کی آسان ترکیب ملاحظہ کیجئے۔

درکار اجزاء:
ڈو کیلئے: میدہ ۱۵۰؍ گرام، بیکنگ پاؤڈر آدھا چھوٹا چمچہ، چینی ۱۵۰؍ گرام، مکھن ۵۰؍ گرام، انڈے ۵؍ عدد، ونیلا ایسنس ۲؍ قطرے۔
فلنگ کیلئے: اسٹرابیری ایک پاؤ، دودھ ۲۵۰؍ ملی لیٹر، کسٹرڈ پاؤڈر ۲؍ بڑے چمچے، چینی ۳؍ سے ۴؍ بڑے چمچے، کریم ۲۸۰؍ گرام، اسٹرابیری جیم ۴؍ سے ۵؍ بڑے چمچے، پانی ۲؍ بڑے چمچے۔
آئسنگ کیلئے: آئسنگ شوگر ۱۵۰؍ گرام، اسٹرابیری جیم (نیم گرم ) ۲؍ بڑے چمچے۔
بنانے کا طریقہ: ڈو بنانے کیلئے اَوَن گرم کریں۔ اس کیلئے ایک چوکور پین لیں۔ اس کی بیس کو بیکنگ شیٹ سے کور کرکے شیٹ کو گریس کریں اور پھر اس پر تھوڑا سا میدہ چھڑک دیں۔ اب انڈوں کی زردی اور سفیدی الگ الگ کر لیں۔ پھر ایک پیالے میں زردی، چینی اور ونیلا ایسنس ڈال کر ہینڈ مکسر سے اتنا پھینٹیں کہ وہ کریم جیسا بن جائے۔ ساتھ ہی دوسرے پیالے میں سفیدی کو مکسر کی مدد سے اتنا پھینٹیں کہ وہ گاڑھی ہو جائے۔ اب زردی والے مکسچر کے اندر بیکنگ پاؤڈر ملا میدے کو تھوڑا تھوڑا کرکے ڈالیں اور اسے مکسچر کے اندر فولڈ کرتے جائیں۔ مکس نہیں کرنا بلکہ میدہ اور زردی والا مکسچر ایک دوسرے میں الٹنا پلٹنا ہے تاکہ ہوا اندر ہی رہے۔ اب آخر میں اس مکسچر میں سفیدی والا مکسچر بھی ڈال دیں اور اسے بھی الٹ پلٹ کریں۔ اب اس مکسچر کو کیک ٹن میں ڈال کر اوپر سے لیول کرلیں اور اَوَن میں ۳۰؍ سے ۳۵؍ منٹ تک یا جب تک وہ اندر سے ٹھیک سے پک نہیں جاتا تب تک بیک کریں۔ اب اس کیک کو ٹھنڈا اور سخت ہونے کیلئے رکھ دیں یا فریج میں رکھ دیں۔ فلنگ کیلئے، پہلے اسٹرابیری کے چند ٹکڑے سجانے کیلئے الگ رکھ دیں اور باقی اسٹرابیریز کو سلائسز میں کاٹ لیں۔ دودھ میں چینی اور کسٹرڈ پاؤڈر ملا کر اسے پکائیں اور جب مناسب حد تک گاڑھا ہو جائے تو چولہا بند کر دیں۔ اب اس میں کریم شامل کرکے مکس کریں تاکہ کسٹرڈ اور کریم بالکل یکجان ہو جائیں۔ اسٹرابیری جیم میں پانی ملا دیں اور اَوَن میں ہلکا سا گرم کر لیں۔ اب کیک کو پین سے باہر نکالیں اور پین کو اندر سے کلنگ فلم سے کور کر دیں۔ اب کیک کو دو حصوں میں کاٹ لیں۔ دونوں حصوں کی کٹی ہوئی سائڈوں پر جیم لگائیں۔ اوپر والا حصہ پین کے اندر رکھیں۔ اس پر کسٹرڈ پھیلا کر اسٹرابیریز کی تہہ لگا دیں۔ اب کیک کا نیچے والا حصہ اس پر رکھ دیں۔ اس کیک پین کو ایک سے دو گھنٹے کیلئے فریج میں رکھ دیں تاکہ فلنگ اچھی طرح جم جائے۔ آئسنگ کیلئے اسٹرابیری جیم اور چینی کو مکس کر لیں۔ اب کیک کو پین میں سے احتیاط سے نکال کر سرونگ پلیٹ میں ایسے رکھیں کہ نیچے والا حصہ اوپر کی طرف آئے۔ اس پر آئسنگ پھیلا دیں اور ایک طرف رکھی اسٹرابیریز کو کاٹ کر کیک پر سجا دیں۔ لیجئے مزیدار اسٹرابیری فِلڈ کیک تیار ہے۔