ریاستہائے متحدہ کے محکمہ زراعت کا کہنا ہے کہ جب اُبلے ہوئے انڈوں کو صحیح طریقے سے رکھا جائے تو وہ ۷؍ دن تک کھانے کے قابل رہتے ہیں۔ اُبلے ہوئے انڈوں کو فریج میں رکھنے کا طریقہ بتایا جا رہا ہے۔ اس طریقے سے آپ انہیں ۷؍ دنوں تک محفوظ رکھ سکتی ہیں۔ تصویر: آئی این این

انڈے اُبالنے کے بعد انہیں فوراً ٹھنڈے پانی میں ڈال دیں تاکہ وہ ٹھنڈے ہوجائیں۔

جب انڈے ٹھنڈے ہوجائیں تو انہیں کپڑے سے خشک کرلیں۔

اب انڈوں کو فریج میں رکھ سکتے ہیں۔ اگر آپ انہیں جلدی فریج میں رکھ دیں تو یہ خراب بیکٹیریا کے رابطے میں آنے سے بچ جاتے ہیں۔ دراصل جب ابلے ہوئے انڈوں کو ۴؍ ڈگری سے کم درجہ حرارت پر رکھا جاتا ہے تو بیکٹیریا آہستہ آہستہ بڑھتے ہیں۔

ابلے ہوئے انڈوں کو کمرے کے درجہ حرارت پر زیادہ سے زیادہ ۲؍ گھنٹے تک رہنے دیں۔ اس کے بعد انہیں فریج میں رکھ دیں۔

آپ انڈوں کو ایئر ٹائٹ کنٹینر میں بند کرکے رکھ سکتی ہیں۔ اس کے علاوہ انہیں دروازے میں نہ رکھیں بلکہ اندرونی شیلف میں رکھیں۔ اس سے ان کا درجہ حرارت ایک جیسا رہے گا۔ جبکہ انہیں فریج کے دروازوں پر رکھنے سے ان کا درجہ حرارت بار بار تبدیل ہو سکتا ہے۔

دھیان رہے کہ فریج میں انڈوں کو چھلکے سمیت رکھنا ہے۔ بغیر چھلکے کے انڈے جلد خراب ہوسکتے ہیں۔

ابلے ہوئے انڈوں کو فریج میں رکھنے سے آپ کو ناگوار بوٗ آتی ہے جس کی وجہ ہائیڈروجن سلفائیڈ ہے۔ یہ گیس انڈے کو ابالنے پر بھی بنتی ہے لیکن وہ کسی بھی طرح سے نقصان دہ نہیں ہے۔

اُبلے ہوئے انڈوں کو فریزر میں نہ رکھیں۔ ایسا کرنے سے وہ سخت ہو جائیں گے اور ان کا ذائقہ بھی بگڑ ہوسکتا ہے۔

اگر انڈے کا چھلکا چپچپا ہوگیا ہے یا اس کا رنگ بدل گیا ہے تو سمجھ لیں کہ انڈا خراب ہوگیا ہے۔