اتر پردیش کابینہ کے ایک اہم اجلاس میں منگل کو ریاست کی ترقی، تعلیم، صحت اور بنیادی ڈھانچے کو فروغ دینے کے ۲۲؍ اہم تجاویز کو منظوری دے دی گئی۔ اجلاس میں تقسیم ہند کے دوران پاکستان سے ہجرت کرکے آنے والوں کی شہریت سے متعلق اہلیت طے کرنے، بنگلہ دیش سے آئے بے گھر ہندو بنگالی خاندانوں کی بازآبادکاری کیلئے لیز رینٹ اور پٹے کا فارمیٹ منظور کرنے جیسے بڑے فیصلے شامل ہیں۔ اس کے علاوہ مدرسوں سے متعلق تنخواہ تقسیم ایکٹ کو منسوخ کر دیا گیا ہے، جبکہ شکشا متروں کے بڑھائے گئے اعزازیہ کو رواں ماہ سے ادا کرنے کا بھی اعلان کیا گیا ہے۔

 

 

 

کابینہ اجلاس کی صدارت وزیر اعلیٰ یوگی آدتیہ ناتھ نے کی۔تقسیم ہند کے دوران پاکستان سے ہجرت کرکے آنے والے خاندانوں کی شہریت کے تحت لکھیم پورکھیری میں ۲۳۵۰؍، پیلی بھیت میں تقریباً۴؍ ہزار، بجنور کے  ۱۸؍ مواضعات میں ۳۸۵۶؍ اوررامپور کے ۱۶؍ گاؤں میں ۲۱۷۴؍خاندانوں کو شہریت کیلئے اہل قرار دینے کی راہ ہموار ہوگی۔اسی طرح بنگلہ دیش سے بے گھر ہوکر آنے والے ہندو بنگالی خاندانوں کی بازآبادکاری کیلئے بھی اہم فیصلہ کیا گیا۔ کانپور دیہات میں ان خاندانوں کو بسانے کیلئے لیز رینٹ اور پٹے کے فارمیٹ کو منظوری دی گئی ہے۔

 

 

یوگی کابینہ نے مدرسوں کے اساتذہ و ملازمین کیلئے اکھلیش حکومت کے دور میں منظور شدہ ’تنخواہ تقسیم ایکٹ ۲۰۱۶‘  کو منسوخ کر دیا ہے۔ یہ بل اُس وقت کے گورنر رام نائک کی جانب سےصدرِ جمہوریہ کو بھیج دیا گیا تھا، جہاں سے کچھ دنوں کے بعدچند اعتراضات کے ساتھ واپس آگیا تھا۔ مدرسہ تنظیموں کا کہنا ہے کہ مذکورہ بل کو ختم کرنے کے بجائے اس میں ترمیم کرکے دوبارہ منظور کرایا جانا چاہئے تھا لیکن یوگی حکومت نے ایسا نہیں کیا۔