میدان کے بعداب ممبرا کے بچوں نے کرکٹ کے میدان میں بھی ضلعی سطح پر لوہا منوایا ہے۔ بہترین کرکٹ کھیلنے پر یہاںکے ۳؍ بچوں کو ممبئی کرکٹ اسوسی ایشن (ایم سی اے) میں منتخب کر لیا گیا ہے

 میدان  کے بعداب ممبرا کے بچوں نے کرکٹ کے میدان میں بھی ضلعی سطح پر  لوہا منوایا ہے۔  بہترین کرکٹ کھیلنے پر یہاںکے ۳؍ بچوں کو ممبئی کرکٹ اسوسی ایشن (ایم سی اے) میں منتخب کر لیا گیا ہے۔  یہ بچے مولانا ابو الکلام آزاد اسٹیڈیم میں جاری اتحاد کرکٹ اکیڈمی   کے اراکین ہیں۔ حالانکہ ممبرا سے ۵؍ کرکٹرمنتخب ہو ئے تھے لیکن ۳؍ کا فائنل میں    انتخاب عمل میں آیا اور اب ان کی پریکٹس بھی شروع ہو گئی ہے۔
 اتحاد کرکٹ اکیڈمی کے کوچ رسال بیگ  (جوانجمن اسلام کے سابق کپتان   رہ چکے ہیں) سے رابطہ قائم کرنے پر انہوں نے بتایاکہ ان کی کرکٹ اکیڈمی کے جن بچوں کا ایم سی اے میں سلیکشن ہوا ہے، ان میں دانیال شریف صدیقی ( انڈر- ۱۴)،  شاہ محبوب عالم ( انڈر- ۱۶) اور ارقم انصاری امین انصاری( انڈر-  ۱۶) شامل ہیں ۔ دانیال بہتری بلے باز،شاہ محبوب دائیں بازو کے اسپنر  اور  ارقم بائیں ہاتھ کا اسپنر ہے۔ دانیال اس سے قبل بھی انڈر -۱۲؍ گروپ میں بھاسکر ٹرافی کیلئے منتخب ہو چکا ہے۔ محبوب  اور دانیال البرکات اسکول سے ، ارقم انجمن اسلام( ممبئی سی ایس ایم ٹی )    سے کرکٹ کھیلتے ہیں۔  ان کے علاوہ  دیگر ۲؍ کرکٹر امان شیخ  اور عدنان صدیقی  ابتدائی مرحلے میں منتخب ہوئے تھے لیکن ان کافائنل سلیکشن نہیں ہو سکا۔ 
 واضح رہے کہ ممبئی کرکٹ اسو سی ایشن کی جانب سے ۱۸؍  اور  ۱۹؍ اپریل کو ’ سمر وکیشن کیمپ  ۲۰۲۲ء‘ کا انعقاد ڈومبیولی میں  کے ڈی ایم سی اے گراؤنڈ  پرکیا گیا تھا۔ یہاںممبرا ، کلوا ، دیوا اور ٹھاکرلی اور اطراف کے علاقوں کے کرکٹروں میں سے بہترین  کرکٹ کھلاڑی کو منتخب کیا گیا ہے۔  اس کیمپ میں ۳؍ گروپ کے کرکٹروں کا انتخاب عمل میں آیا۔  ان  میں انڈر- ۱۴(بوائز)، انڈر- ۱۶(بوائز  ، گرلز) اور انڈر- ۱۹ (بوائز ، گرلز)شامل ہیں۔ اسی طرح کا سلیکشن ممبئی ، نوی ممبئی اور تھانے میں بھی ہو چکا ہے۔
 اتحاد کرکٹ اکیڈمی  کے کوچ کے بقول ’’ڈومبیولی میں  منتخب ہونے والے کھلاڑیوں کا ایک ماہ کا ٹریننگ کیمپ ہوگا  او ر اس کے بعد ڈومبیولی، ممبئی   اورتھانے کی ٹیموں میں آپس میں میچ ہوں گے اور  ان میں بہترین کارکردگی دکھانے والے ۱۶؍ کھلاڑیوں کو آل انڈیا ٹور کیلئے منتخب کیا جائے گا۔‘‘انہوںنے مزید بتایاکہ ’’مولانا ابوالکلام آزاد اسٹیڈیم میں اتحاد کرکٹ اکیڈمی کافی عرصے  سے جاری ہے جس کے سرپرست شمیم خان اور سیکریٹری ممتاز شاہ  ہیں۔ اکیڈمی کے تمام اراکین  انتھک محنت اور کاوشوں سے ممبرا کوسہ کے بچوں کی کرکٹ صلاحیت کو اجاگر کررہے ہیں۔ اس نمایاں کامیابی پر غیر سرکاری تنظیم ’یس وی کین ‘  نے بھی کھلاڑیوں اور کوچ کیلئے نیک خواہشات کا اظہار کیا ہے۔