جمعیۃ علماء ہند کی جانب سے بلا تفریق مذہب و ملت مددو تعاون کرنے پر سکھ برادری نے خراج تحسین پیش کیا۔

 پنجاب کے سیلاب متاثرہ علاقوں کے تباہ حال افراد کی مدد کیلئے جمعیۃ علماء سمیت مسلم تنظیمیں وا دارےبھی سرگرم ہیں۔  جمعیۃ علماء ہند کے صدر مولانا محمود اسعد مدنی کی ہدایت پر بدھ کو جمعیۃ ریلیف سینٹر لدھیانہ سے تقریباً ۵۰؍ لاکھ روپے مالیت کے امدادی سامان پر مشتمل۳۰؍ ٹرکوں کا قافلہ پنجاب کے سیلاب متاثرہ اضلاع کی جانب روانہ کیا گیا۔
 اس قافلے کی قیادت جمعیۃ علماء ہریانہ، پنجاب و ہماچل پردیش کے ناظم اعلیٰ مولانا محمد یحییٰ کریمی نے کی، جو سلطان پور لودھی، کپور تھلہ، اجنالہ، ترنتارن، فاضلکہ، گرداسپور، فیروزپور، لدھیانہ اور دیگر متاثرہ علاقوں کیلئے  روانہ ہوا۔روانگی کے موقع پر جمعیۃ علماء کے مرکزی و مقامی ذمہ داران کے ساتھ پنجاب حکومت کے وزیر، دیگر سرکردہ سماجی و سیاسی لیڈران اور بڑی تعداد میں سکھ بھائی بھی شریک ہوئے۔  مقامی سکھ برادری نے جمعیۃ علماء ہند کے خدمت خلق کے جذبے کو بھرپور خراج تحسین پیش کرتے ہوئے کہا کہ ’جب ہم سفید و کالے دھاری والے جھنڈے کو دیکھتے ہیں تو یہ سمجھ جاتے ہیں کہ یہ قافلہ ہماری مدد اور دوستی کے لیے آیا ہے۔‘اس موقع پر مولانا محمد یحییٰ کریمی نے صدر جمعیت علماء ہند مولانا محمود اسعد مدنی کا پیغام پڑھ کر سنایا۔ مولانا مدنی نےکہا کہ’’ جمعیۃ علماء ہند بلاتفریق مذہب و ملت، انسانیت کی خدمت کو اپنا فریضہ سمجھتی ہے۔ ہم اپنے سکھ بھائیوں کے ساتھ اس مصیبت کی گھڑی میں کھڑے ہیں۔ اصل مدد کرنے والا تو ہمارا خالق ہے، ہم تو بس اس کے بندے ہیں۔‘‘مولانا مدنی نے کہا کہ ہماری اپیل پر اہل میوات، مغربی یوپی، گجرات سمیت پورے ملک کے لوگوں نے دل کھول کر تعاون کیا۔ سکھ بھائی دنیا بھر میں انسانیت کی خدمت کے لیے مشہور ہیں اور جو دوسروں کی مدد کرتا ہے رب بھی اس کی مدد کے لیے اپنے نیک بندوں کو بھیجتا ہے۔مولانا یحییٰ کریمی نے بتایا کہ جمعیت علماء  کی پوری ٹیم پنجاب میں امدادی کاموں میں سرگرم ہے۔