اسکول سپرنٹنڈنٹ نے بلڈنگ کے ٹھیکیدار کو ہدایت دی کہ تمام سہولیات کے ساتھ اسکول کاکام جلدازجلدمکمل نہیں کیا گیا تو قانونی کارروائی کی جا ئیگی

 کے ایس آئی ٹی محکمہ کے اہلکاروں نے بھی دورہ کرکے اسکول کے حالات کا جائزہ لیا  ۔  نثار خان کا دعویٰ ہے کہ آرے کالونی میونسپل اسکول میںمنگل کو  اسکول کی ایڈمنسٹریٹیوآفیسر (اے او) نشا یادو، بیٹ آفیسر کلپنا اومبرے، اسکول پرنسپل اور اساتذہ کے علاوہ شکایت کنندہ اوگانے  ایک ساتھ اسکول کے اندر کا جائزہ لے کر تفصیلی بات چیت کی ۔ اس وقت اسکول میں طلبہ کی اچھی خاصی تعداد موجود تھی ۔ ایک سوال کے جواب میں نثار خان نے بتایا کہ سب کے سامنے اسکول کے تعمیراتی کا م کے ٹھیکیدار اور کو ہدایت دی گئی ہے کہ اگرکام وقت مقررہ پر پورا  نہیں کیا گیااور بہتر انداز میں تمام سہولیات مہیا نہیں کرائی گئی تو اس کے خلاف قانونی کارروائی کرنے کے علاوہ اس کے بل کی ادائیگی نہیں کی جائے گی اور اسے بلیک لسٹ کرانے کی  پوری کوشش کی جائے گی ۔ 
 یاد رہے کہ گزشتہ سنیچر کو انقلاب میںخبر شائع ہوئی تھی کہ آرے کالونی میونسپل اسکول  کے بیت الخلاء  اور باتھ  روم میں ۳؍  مہینے سے پانی نہ ہونے سے طلبہ پریشان ہیں ۔ اس کے علاوہ اسکول میں آلودہ پانی ، نالے اور گٹرو ں کے ٹوٹنے پر گندہ پانی اسکول کے احاطے میں پھیلنے سےتعفن پھیل رہا ہے ۔ ان تمام وجوہات کی وجہ سے  والدین نے دیوالی کی چھٹیوں کے بعد اپنے بچوں کو اسکول نہ بھیجنے کا فیصلہ کیا تھا ۔ اس اسکول میں ایک ہزار ۵۰۰؍ طلبہ زیر تعلیم ہیں ۔ بیٹ  افسرکے مطابق  بلڈنگ میں بڑے پیمانے پر مرمت کا کام  جاری  ہے جس کی وجہ سے اسکول کے ایک ۲؍ بیت الخلاء میں مرمت کے دوران جو کام ہوا ہے ، اس کی صفائی وغیرہ نہیں ہوسکی ہے ۔