وزیرِ اعظم نریندر مودی نے جمعرات کو ہندوستانی آرٹیفیشل انٹیلی جنس (اے آئی) اسٹارٹ اپ کے نمائندوں کے ساتھ گول میز اجلاس کی صدارت کی اور کہا کہ وہ ہندوستان کے مستقبل کے شریک تخلیق کار ہیں۔

وزیرِ اعظم نریندر مودی نے جمعرات کو ہندوستانی   آرٹیفیشل انٹیلی جنس (اے آئی) اسٹارٹ اپ کے نمائندوں کے ساتھ گول میز اجلاس کی صدارت کی اور کہا کہ وہ ہندوستان کے مستقبل کے شریک تخلیق کار ہیں۔ وزیر اعظم کے دفتر نے بتایا کہ یہ اجلاس پی ایم مودی کے رہائش گاہ پر منعقد ہوا۔اس اجلاس میں اگلے مہینے ملک میں ہونے والے انڈیا اے آئی امپیکٹ سمٹ ۲۰۲۶ءسے قبل اے آئی فار آل: گلوبل امپیکٹ چیلنج  کے لیے منتخب ۱۲؍ ہندوستانی اے آئی اسٹارٹ اپ نے حصہ لیا اور اپنے خیالات پیش کیے۔ 
یہ اسٹارٹ اپ مختلف شعبوں میں کام کر رہے ہیں، جن میں ہندوستانی زبانوں کے فاؤنڈیشن ماڈل، کثیر لسانی ایل ایل ایم، اسپیک ٹو ٹیکسٹ، ٹیکسٹ ٹو آڈیو اور ٹیکسٹ ٹو ویڈیو، ای کامرس، مارکیٹنگ اور ذاتی نوعیت کے مواد کی تخلیق کے لیے جنریٹو اے آئی کا استعمال کر کے  ۳؍ ڈی مواد، انجینئرنگ سیمولیشن، مواد کی تحقیق اور مختلف صنعتوں میں ڈیٹا پر مبنی فیصلہ سازی کے لیے جدید تجزیات، صحت کی دیکھ بھال میں تشخیص اور طبی تحقیق شامل ہیں۔ 
اے آئی اسٹارٹ اپ نے ہندوستان میں مصنوعی ذہانت کے ایکو سسٹم کو آگے بڑھانے کے لیے اپنی مضبوط وابستگی کا اظہار کیا۔ انہوں نے اے آئی کے شعبے کی تیز رفتار ترقی اور وسیع مستقبل کی صلاحیتوں پر روشنی ڈالتے ہوئے کہا کہ اے آئی کی جدت کا مرکز اب ہندوستان کی طرف منتقل ہو رہا ہے۔ اسٹارٹ اپ نمائندوں نے کہا کہ ہندوستان میں اے آئی کی ترقی کے لیے اب مضبوط اور موافق ماحول موجود ہے جس سے ملک  اے آئی کے عالمی نقشے پر مضبوطی سے قائم ہو گیا ہے۔ 

یہ بھی پڑھئے:عامر خان نے اپنے بھائی فیصل خان کے ساتھ ہونے والے جھگڑے پر اپنے درد کا اظہار کیا

اجلاس کے دوران وزیرِ اعظم نے سماج میں تبدیلی لانے میں مصنوعی ذہانت کی اہمیت پر زور دیا۔ انہوں نے کہا کہ ہندوستان اگلے  مہینے انڈیا اے آئی امپیکٹ سمٹ کی میزبانی کرے گا جس کے ذریعے ملک ٹیکنالوجی کے شعبے میں اہم کردار ادا کرے گا۔ انہوں نے زور دیا کہ ہندوستان مسلسل کوشش کر رہا ہے کہ اے آئی کا فائدہ اٹھا کر تبدیلی لائی جائے۔  وزیرِ اعظم نے کہا کہ اسٹارٹ اپ اور اے آئی کے کاروباری ہندوستان کے مستقبل کے شریک تخلیق کار ہیں اور ملک میں جدت اور بڑے پیمانے پر نفاذ دونوں کی بے پناہ صلاحیت موجود ہے۔ انہوں نے کہا کہ ہندوستان کو دنیا کے سامنے ایک منفرد اے آئی ماڈل پیش کرنا چاہیے جو میڈ ان انڈیا، میڈ فار دی ورلڈ کے جذبے کی نمائندگی کرے۔ پی ایم مودی نے کہا کہ ہندوستان پر دنیا کا اعتماد ہی ملک کی سب سے بڑی طاقت ہے۔ انہوں نے زور دیا کہ ہندوستانی اے آئی ماڈل اخلاقیات، غیر جانبدار، شفاف اور ڈیٹا پرائیویسی کے اصولوں پر مبنی ہوں۔ انہوں نے کہا کہ ہندوستانی اسٹارٹ اپ کو عالمی سطح پر قائدانہ کردار ادا کرنا چاہیے اور عالمی سطح پر سستی اے آئی، سب کی شمولیت والی اے آئی اور کفایتی جدت کو فروغ دینا چاہیے۔ انہوں نے مزید کہا کہ ہندوستانی اے آئی ماڈل منفرد ہونے چاہئے اور مقامی و سودیشی مواد اور علاقائی زبانوں کو فروغ دینا چاہیے۔ 

یہ بھی پڑھئے:وجے ہزارے ٹرافی: سرفراز خان نے ایک اوور میں ۳۰؍ رنز بنائے

اس اجلاس میں اوتار، بھارت جین، فریکٹل، جی اے این، جی این اے این آئی، انٹیلی ہیلتھ، سروم، شدھ اے آئی، ساکٹ اے آئی اور ٹیک مہندرا سمیت ہندوستانی  اے آئی اسٹارٹ اپ کے چیف ایگزیکٹوز، لیڈرز اور نمائندے شامل تھے۔  الیکٹرانکس اور انفارمیشن ٹیکنالوجی کے مرکزی وزیر اشونی وشنو اور مرکزی وزیرِ مملکت جتن پرساد نے بھی اجلاس میں حصہ لیا۔