فوجی سربراہ نے کہاکہ سخت ترین موسمی صورتحال اور دیگر چیلنجوں کے باوجود فوجی جوان اپنی خدمات خوش اسلوبی کے ساتھ انجام دے رہے ہیں جس کی وجہ سے امن قائم ہے

 فوجی سربراہ جنرل منوج پانڈے نے سنیچر کوراجوری میں لائن آف کنٹرول کے اگلے علاقوں کا دورہ کرکےسخت ترین موسمی حالات میں فوجی جوانوں کی بے لوث خدمات اور حوصلے کی سراہنا کی۔معلوم ہوا ہے کہ فوجی سربراہ نے اگلی چوکیوں کا دورہ کیا او روہاں پر فوج کی تیاریوں کا جائزہ لیا۔دفاعی ترجمان نے بتایا کہ فوجی سربراہ جنرل منوج پانڈے نے ایل او سی پر فوج کے سینئر  افسروں کے ساتھ گفت وشنید کی۔ سرحد پر تعینات اہلکاروں سے بات چیت کے دوران فوجی سربراہ نے کہاکہ سخت ترین موسمی صورتحال اور دیگر چیلنجوں کے باوجود فوجی جوان اپنی خدمات خوش اسلوبی کے ساتھ انجام دے رہے ہیں۔انہوں نے بتایا کہ فوج کی کوششوں کے نتیجے میں ہی لائن آف کنٹرول پر اس وقت امن و امان قائم ہے۔
 فوجی سربراہ نے سرحد پر تعینات جوانوں کو بتایا کہ امن دشن عناصر کے منصوبوں کو ناکام بنانے کی خاطر سرحد پر مزید چوکسی برتنے کی ضرورت ہے۔اس سے قبل آرمی چیف کو فوج کے سینئر افسروں نے سرحدوں کی صورتحال کے بارے میں بریفنگ دی۔فوجی کمانڈر کو مخالفین کے چیلنجز کا مقابلہ کرنے کے لئے کئے جانے والے اقدامات کے بارے میں بھی جانکاری فراہم کی گئی۔ذرائع نے بتایا کہ آرمی چیف نے فوج کے سینئر افسروں کے ساتھ میٹنگ کی اور لائن آف کنٹرول پر قائم مستحکم دراندازی مخالف گرڈ کی  ستائش کی۔دفاعی ذرائع نے بتایا کہ فوجی سربراہ منوج پانڈے نے ایل او سی پر جنگ بندی معاہدہ کی پاسداری کیلئے فوج کے نظم و ضبط کی داد دی۔معلوم ہوا ہے کہ آرمی چیف نے راجوری میں ایل او سی کے نزدیک اگلی چوکیوں کا دورہ کرنے کے موقع پر وہاں پر تعینات جوانوں کے ساتھ گفتگو کی۔انہوں نے افسروں کو ہدایت دی کہ ملک دشمن عناصر کے منصوبوں کو ناکام بنانے کی خاطر سرحدوں پر مزید چوکسی بڑھانے کی ضرورت ہے۔
پونچھ میں ایل او سی کے نزدیک دھماکہ، فوجی پورٹر زخمی
 جموں وکشمیر کے پونچھ میں ایل او سی کے نزدیک زور دار دھماکہ ہوا جس کے نتیجے میں فوجی پورٹر شدید طورپر زخمی ہوا ہے۔  یہ دھماکہ ایسے وقت میں ہوا جبکہ آرمی چیف جنرل منوج پانڈے راجوری میں ایل او سی کا جائزہ لے رہے تھے ۔اطلاعات کے مطابق سنیچرکو پونچھ میں ایل او سی کے نزدیک بارودی سرنگ کا ایک زور دار دھماکہ ہوا جس کے نتیجے میں فوجی پورٹر جس کی شناخت مختیار احمد کے بطور ہوئی ہے شدید طورپر زخمی ہوا۔  زخمی فوجی پورٹر کو علاج کیلئے سب ضلع اسپتال منڈی منتقل کیا گیا ۔فوجی ذرائع نے اسکی تصدیق کرتے ہوئے بتایا کہ دھماکہ کیسے اور کن حالات میں ہوا اس کی تحقیقات شروع کی گئی ہے۔