آسام کے وزیر اعلیٰ ہیمنت بسوا شرما اور ان کی اہلیہ کی مشترکہ دولت ۲۰۲۱ء کے مقابلے ۲۰۲۶ء میں بڑھ کر ۱۶ء۳۵؍ کروڑ روپے ہوگئی ہے۔

آسام کے وزیر اعلیٰ ہیمنت بسوا شرما اور ان کی اہلیہ رنکی بھویان شرما کی مجموعی دولت میں گزشتہ چند برسوں کے دوران نمایاں اضافہ ریکارڈ کیا گیا ہے۔ جمعہ کو داخل کیے گئے حلف نامے کے مطابق ۲۰۲۶ء میں دونوں کی مشترکہ دولت بڑھ کر ۱۶ء۳۵؍ کروڑ روپے ہو گئی ہے، جبکہ ۲۰۲۱ء میں یہ ۲۷ء۱۷؍ کروڑ روپے تھی۔ اس طرح پانچ برسوں میں ان کے اثاثوں میں تقریباً دوگنا اضافہ ہوا ہے۔ وزیر اعلیٰ نے یہ حلف نامہ آئندہ اسمبلی انتخابات کے لیے اپنے کاغذات نامزدگی کے ساتھ داخل کیا ہے، جہاں وہ جالکباری حلقہ سے انتخاب لڑ رہے ہیں۔ انتخابات ۹؍ اپریل کو ایک ہی مرحلے میں ہوں گے جبکہ ووٹوں کی گنتی ۴؍ مئی کو کی جائے گی۔ اس سے قبل ۲۰۱۶ء میں شرما خاندان کی مجموعی دولت تقریباً ۴ء۶؍ کروڑ روپے تھی، جو اس بات کی نشاندہی کرتی ہے کہ گزشتہ ایک دہائی میں ان کی مالی حیثیت میں مسلسل اضافہ ہوا ہے۔
حلف نامے کے مطابق، ہیمنت بسوا شرما کے پاس صرف منقولہ اثاثے ہیں جن کی مالیت ۲۰۲۶ء میں ۳۶ء۲؍ کروڑ روپے ہے، جبکہ ۲۰۲۱ء میں یہ ۷۲ء۱؍ کروڑ روپے تھی۔ اس کے برعکس، ان کی اہلیہ رنکی بھویان سرما کے پاس منقولہ اور غیر منقولہ دونوں قسم کے اثاثے موجود ہیں، جن کی مالیت ۲۰۲۶ء میں بڑھ کر ۷۹ء۳۲؍ کروڑ روپے ہو گئی ہے، جو ۲۰۲۱ء میں ۱۹ء۱۶؍ کروڑ روپے تھی۔ آمدنی کے لحاظ سے بھی دونوں کے درمیان نمایاں فرق دیکھا گیا ہے۔ مالی سال ۲۰۲۵ء میں وزیر اعلیٰ کی آمدنی ۲۹؍ لاکھ ۶۲؍ ہزار ۹۲۰؍ روپے رہی، جبکہ ان کی اہلیہ کی آمدنی ۴؍ کروڑ ۱۹؍ لاکھ ۲۵؍ ہزار روپے ریکارڈ کی گئی، جو ان کی سرمایہ کاری اور دیگر ذرائع آمدنی کی عکاسی کرتی ہے۔
شرما نے اپنے حلف نامے میں واضح کیا ہے کہ ان کے پاس بانڈز، ڈیبینچرز، شیئرز یا میوچوئل فنڈز میں کوئی سرمایہ کاری نہیں ہے۔ اس کے برعکس، ان کی اہلیہ کے پاس ۱۰ء۵؍ کروڑ روپے کی سرمایہ کاری موجود ہے، جبکہ ایک لائف انشورنس پالیسی بھی ہے جس کی مالیت ۷۷ء۱؍ کروڑ روپے ہے۔ نقدی اور بینک ذخائر کے حوالے سے، وزیر اعلیٰ کے پاس ۲۸ء۲؍ لاکھ روپے نقد اور چار بینک ڈپازٹس میں مجموعی طور پر ۶۸؍ لاکھ ۱۰؍ ہزار ۹۴۳؍ روپے موجود ہیں۔ دوسری طرف، ان کی اہلیہ کے پاس ۱۶ء۳؍ لاکھ روپے نقد اور ۷۴؍ لاکھ ۸۵؍ ہزار ۲۴۸؍ روپے کے بینک ڈپازٹس ہیں۔
واجبات کے ضمن میں، ہیمنت بسوا شرما نے ۹۵؍ لاکھ روپے کے قرض کا اعلان کیا ہے، جبکہ ان کی اہلیہ پر ۹۱ء۱۵؍ کروڑ روپے کے قرضے واجب الادا ہیں۔ حلف نامے کے مطابق، نہ وزیر اعلیٰ اور نہ ہی ان کی اہلیہ کے پاس کوئی زرعی زمین ہے۔ تاہم، رنکی بھویان سرما تین غیر زرعی جائیدادوں کی مالک ہیں، جن میں سے دو خریدی گئی ہیں جبکہ ایک وراثت میں ملی ہے۔ ان جائیدادوں کی مجموعی مارکیٹ ویلیو ۲۵ء۱۹؍ کروڑ روپے بتائی گئی ہے۔ یہ تفصیلات انتخابی شفافیت کے تحت سامنے آئی ہیں، جو امیدواروں کی مالی حالت کو عوام کے سامنے واضح کرنے کا ایک اہم ذریعہ سمجھی جاتی ہیں۔