لیبر پارٹی کی شاندار فتح اورواضح اکثریت، وزیراعظم مودی نے مبارکباد پیش کی۔

آسٹریلیا کے وفاقی الیکشن میں  لیبر پارٹی نے تاریخی فتح حاصل کرتے ہوئے لگاتار دوسرا الیکشن جیت لیا ہے۔ اس طرح  آسٹریلوی وزیراعظم انتھونی البانیز نے دوسری مدت کے لیے بھی انتخابی معرکہ مار لیا ہے۔ البانیز کا مسلسل دوسری بار ۳؍ سالہ مدت کیلئے منتخب ہونا ۲۱؍ سال میں  پہلی بار ہوا ہے۔ اپوزیشن لیڈر نے انتخابی نتائج تسلیم کرتے ہوئے اپنی شکست کا اعتراف کیا ہے۔ انھوں نے کہا کہ ہم انتخابی مہم میں اتنی اچھی کارکردگی کا مظاہرہ نہیں کرسکے جتنی درکار تھی۔ البانیز کی اس کامیابی پر وزیراعظم مودی نے انہیں  فون کرکے مبارکباد پیش کی ہے۔ 
آسٹریلوی الیکشن کمیشن کے مطابق بائیں بازو کی حکمراں جماعت لیبر پارٹی نے۷۰؍ نشستیں حاصل کیں جب کہ قدامت پسند اپوزیشن اتحاد کو صرف۲۴؍ نشستیں ملیں۔ 
علاوہ ازیں ۱۳؍ نشستوں پر آزاد اور چھوٹی جماعتوں کے امیدوار کامیاب ہوئے۔ کچھ نتائج کا انتظار ہے۔ حکمراں جماعت کی نشستوں کی تعداد۷۶؍تک ہوسکتی ہے۔ البتہ اگر لیبر پارٹی دو یا زیادہ نشستیں کھو بیٹھتی ہے تو اسے اتحادی حکومت بنانا ہوگی۔ آسٹریلیا میں آخری بار کوئی اتحادی حکومت۲۰۱۰ء میں  بنی تھی۔ جس وقت یہ خبر لکھی جارہی ہے، البانیز نے واضح اکثریت ملنے کا اعلان کیا ہے۔ ان کے مد مقابل پیٹر ڈٹون پارلیمنٹ میں اپنی سیٹ بھی نہیں  بچا پائے۔ 
آسٹریلیا میں  ووٹنگ کے عمل کا آغاز ۲۲؍ اپریل کو ہوا جس میں  ۱۸؍ ملین رائے دہندگان میں سے ۸ء۵؍ نے اپنے حق رائے دہی کا استعمال کیا۔