آسٹریلیا کے وزیراعظم انتھونی البانیز نے بونڈئی بیچ پر حملہ آور کو پکڑنے والے احمد الاحمد کی اسپتال میں عیادت کی۔ اس مسلم شخص نے سڈنی کے مشہور بونڈئی ساحل پر دہشت گردانہ حملے کے دوران دیگر بے گناہوں کی جان بچانے کیلئے اپنی جان خطرے میں ڈالی تھی اور جراتمندی کے ساتھ ایک دہشت گرد کو پکڑنے میں کامیاب رہا۔  آسٹریلوی وزیراعظم نے احمد الاحمد کی عیادت کی اور جلد صحت یابی کیلئے نیک خواہشات کا اظہار کرتے ہوئے ان کی بہادری کو سراہا اور انہیں حقیقی ہیرو قرار دیا۔ 

واضح رہے کہ پھل فروش احمد الاحمد بونڈئی ساحل پر حملے کے وقت اپنے دوست کے ساتھ کافی پینے آئے تھے کہ اچانک حملہ ہوتے دیکھ کر وہاں پارک کی گئی گاڑیوں کے پیچھے چھپے اور موقع ملتے ہی ایک حملہ آور کو دبوچ لیا۔ اس دوران وہ دو گولیاں لگنے سے زخمی بھی ہوئے تھے، جنہیں فوری طور پر اسپتال منتقل کیا گیا تھا، جہاں سرجری کرکے ان کے جسم سے دو گولیاں نکال دی گئیں اور ڈاکٹروں کے مطابق اب ان کی حالت تسلی بخش ہے۔  دہشت گردانہ حملے میں۱۶؍ افراد اپنی جان سے گئے جبکہ۴۲؍ زخمی ہوئے۔ اس دوران ایک دہشت گرد مارا گیا اور دو پولیس اہلکار بھی زخمی ہوئے۔ احمد الاحمد اپنے اس کارنامے کے بعد دنیا بھر میں چھائے ہوئے ہیں اور سربراہان مملکت سمیت اقوام عالم ان کی بہادری کو سراہتے ہوئے انہیں ہیرو کا خطاب دے رہے ہیں۔