اڈیالہ جیل پر دہشت گردانہ حملے کا اندیشہ، تمام قیدیوں سے ملاقاتوں پر ۲؍ ہفتوں کی پابندی لگادی گئی۔

پاکستان کے صوبہ پنجاب کے محکمۂ داخلہ اڈیالہ جیل میں دہشت گردانہ حملے کا اندیشہ ظاہر کرتے ہوئے ہر قسم کے دوروں، ملاقاتوں اور انٹرویوز پر پابندی عائد کر دی ہے۔ نوٹیفکیشن کے مطابق اڈیالہ جیل میں پابندی سیکوریٹی الرٹ کی وجہ سے لگائی گئی، جیل احاطے کے باہر خاردار تار بھی نصب کردیا گیاہے۔ جیل احاطے میں ہر شخص کی جامہ تلاشی لی جائے گی اور جیل احاطے کے اندر اور اردگرد کلیئرنس آپریشن کیا جائےگا۔ 
پابندی کا اطلاق یہاں  قید پی ٹی آئی کے بانی عمران خان پر بھی ہوگا۔ ذرائع کے مطابق عمران خان سے ملاقات پر پابندی کا فیصلہ محکمۂ داخلہ پنجاب نے کیا ہے۔ جیل انتظامیہ نے منگل اور جمعرات کا دن ملاقاتوں کیلئے مختص کر رکھا ہے مگر منگل کو ملاقات کی اجازت نہیں دی گئی۔ پاکستان تحریک انصاف (پی ٹی آئی) کے چیئرمین بیرسٹر گوہر نے اس پابندی پر برہمی کا اظہار کرتےہوئے کہا ہے کہ عمران خان کی جان کو خطر ہ لاحق ہے، فوراً ملاقات کی اجازت دی جائے۔ میڈیا سے گفتگو کرتے ہوئے چیئرمین تحریک انصاف بیرسٹر گوہر نے اس بات پر حیرت کااظہار کیا ہے کہ اچانک ملاقات بند کردی گئی ہے۔