اسپین میں اسرائیلی حملوں میں جاں بحق ہونے والی ۵؍ سالہ فلسطینی بچی ہند رجب کی یاد میں بارسلونا کے ساحل پر اس کا بڑا پورٹریٹ بنایا گیا جس کے ساتھ ’’فری غزہ چلڈرن‘‘ کا پیغام بھی نمایاں تھا۔ یہ علامتی اقدام غزہ میں بچوں کی اموات، انسانی بحران اور انصاف کے مطالبے کو عالمی سطح پر اجاگر کرنے کی کوشش ہے۔

اسرائیلی حملوں میں جاں بحق ہونے والی ۵؍ سالہ فلسطینی بچی ہند رجب کی یاد میں بارسلونا کے ساحل پر دلوں کو چھو لینے والا ایک بڑا اور پُرکشش پورٹریٹ بنایا جس نے دیکھنے والوں کو جذباتی طور پر جھنجھوڑ کر رکھ دیا۔ ریت پر بنایا گیا یہ پورٹریٹ ہند رجب کی معصومیت کو نمایاں کرتا ہے، جو جنوری ۲۰۲۴ء میں اسرائیلی حملے کے سبب غزہ میں جاں بحق ہوگئی تھیں۔ اسی پورٹریٹ کے قریب بڑے الفاظ میں Free Gaza’s Children(فری غزہ چلڈرن)تحریر کیا گیا، جو غزہ کے بچوں کے لیے آزادی، تحفظ اور انصاف کے مطالبے کی علامت ہے۔ واضح رہے کہ ہند رجب کی موت کو دوسال پورے ہوگئے ہیں۔

 

 

 

 

 

View this post on Instagram

 

 

 

 

 

 

 

 

 

 

 

A post shared by Inquilab - انقلاب (@theinquilab.in)

یہ پورٹریٹ فضائی زاویے سے واضح طور پر دکھائی دیتا ہے اور اس کا مقصد صرف ایک یادگار تخلیق کرنا نہیں بلکہ غزہ میں جاری انسانی بحران کو ظاہر کرکے عالمی برادری کا ضمیر جگانا ہے۔ منتظمین کے مطابق، ہند رجب کا چہرہ اس لئے منتخب کیا گیا کیونکہ وہ غزہ میں شہید ہونے والے ہزاروں بچوں کی نمائندہ علامت بن چکی ہے۔ اسرائیلی حملے کے دوران ہند رجب کے مدد کے فون کال کی ریکارڈنگ نے دنیا بھر میں لوگوں کو ہلا کر رکھ دیا تھا اور اسی واقعے نے بچوں کی حفاظت کے مسئلے کو عالمی سطح پر نمایاں کیا۔ ساحل پر بنایا گیا یہ پورٹریٹ ایک خاموش مگر طاقتور احتجاج ہے۔ اس میں نہ نعرے ہیں اور نہ ہی سیاسی علامتیں، بلکہ ایک معصوم بچی کا چہرہ ہے جو جنگ، تشدد اور بے بسی کی کہانی سناتا ہے۔ فن اور احتجاج کے اس امتزاج کے ذریعے منتظمین یہ پیغام دینا چاہتے ہیں کہ غزہ میں ہونے والی تباہی کے اصل متاثرین بچے ہیں، جن کا کوئی سیاسی یا عسکری کردار نہیں۔ اس موقع پر ہند رجب کی والدہ نے لوگوں سے خطاب بھی کیا۔

یہ بھی پڑھئے: یورپی یونین نے ایران کی اسلامی انقلابی گارڈ کو دہشت گرد تنظیم قرار دیا

عینی شاہدین کے مطابق، ساحل پر موجود افراد پورٹریٹ کو دیکھ کر رک گئے، تصاویر بنائیں اور کئی لوگ خاموشی سے خراجِ عقیدت پیش کرتے نظر آئے۔ سوشل میڈیا پر بھی ہند رجب کے اس پورٹریٹ کی تصاویر تیزی سے پھیلیں، جہاں صارفین نے غزہ کے بچوں کے لیے فوری جنگ بندی، انسانی امداد اور بین الاقوامی انصاف کا مطالبہ دہرایا۔ انسانی حقوق کے کارکنوں کا کہنا ہے کہ اس طرح کے پورٹریٹس اور علامتی اقدامات رائے عامہ پر گہرا اثر ڈالتے ہیں، کیونکہ یہ اعداد و شمار کے بجائے انسانی چہروں کو سامنے لاتے ہیں۔ ہند رجب کا پورٹریٹ اس حقیقت کی یاد دہانی ہے کہ غزہ میں جاری تنازع صرف سیاسی یا عسکری مسئلہ نہیں بلکہ ایک سنگین انسانی المیہ ہے۔ اسپین میں ساحل پر بنایا گیا یہ پورٹریٹ ایک واضح پیغام دیتا ہے کہ ہند رجب کو فراموش نہیں کیا گیا، اور نہ ہی غزہ کے دیگر بچوں کی قربانیوں کو نظرانداز کیا جا سکتا ہے۔ یہ اقدام عالمی برادری سے مطالبہ کرتا ہے کہ بچوں کے تحفظ کو ترجیح دی جائے، انسانی قوانین کا احترام کیا جائے اور ایسے واقعات کے ذمہ داران کا احتساب یقینی بنایا جائے۔