ٹورنٹو بلیوجیز کے کھلاڑی نے مسلمانوں کے خلاف نفرت انگیز مواد شیئر کرنے پر افسوس ظاہر کیا، کہا کہ ان کی پوسٹوں سے لوگوں کو تکلیف پہنچی اور یہ ان کے اپنے عقائد کی بھی عکاسی نہیں کرتی؛ کلب کے صدر بھی مسلم برادری سے معافی مانگ چکے ہیں۔

امریکی بیس بال ٹیم ٹورنٹو بلیوجیز کے وینزویلا سے تعلق رکھنے والے کھلاڑی انتھونی سانتاندر نے سوشل میڈیا پر اسلام اور مسلمانوں کے خلاف نفرت انگیز مواد شیئر کرنے پر معافی مانگ لی ہے۔ انہوں نے اعتراف کیا کہ ان کی پوسٹوں سے مسلم برادری کو تکلیف پہنچی اور انہیں عوامی سطح پر اپنی آواز اور اثر و رسوخ کی ذمہ داری کا زیادہ احساس ہونا چاہیے تھا۔ سانتاندر نے یقین دلایا کہ آئندہ وہ ایسا مواد شیئر کرنے سے گریز کریں گے جو کسی مذہب یا برادری کے خلاف نفرت، امتیاز یا تشدد کو فروغ دیتا ہو۔ ۳۲؍ سالہ کھلاڑی نے جمعہ ۱۳؍ نومبر کو انسٹاگرام پر جاری بیان میں کہا، ’’اپنی حالیہ سوشل میڈیا پوسٹوں پر غور کرنے اور ان لوگوں سے گفتگو کرنے کے بعد جن پر میں اعتماد کرتا ہوں اور جن کا احترام کرتا ہوں، مجھے احساس ہوا ہے کہ مجھے اپنے پلیٹ فارم پر کوئی چیز شیئر کرنے سے پہلے زیادہ سوچنا چاہیے تھا۔ مجھے اندازہ ہے کہ اس مواد سے لوگوں کو تکلیف پہنچی، جس کے لیے میں دل سے معذرت خواہ ہوں۔ مجھے یہ سمجھنا چاہیے تھا کہ عوامی سطح پر آواز رکھنے کے ساتھ ذمہ داری بھی وابستہ ہوتی ہے۔‘‘

Anthony Santander has issued an apology on his Instagram after he recently shared Islamophobic posts. #BlueJays https://t.co/MF662IlhcT

— Keegan Matheson (@KeeganMatheson) November 13, 2026

انہوں نے اپنے بیان میں مذہبی عقیدے کا حوالہ دیتے ہوئے مزید کہا، ’’ایک صاحبِ ایمان شخص کی حیثیت سے میرا یقین ہے کہ ہر انسان عزت اور احترام کے ساتھ برتاؤ کا مستحق ہے، خواہ اس کا مذہب، پس منظر یا عقیدہ کچھ بھی ہو۔ جن لوگوں کو میری پوسٹوں سے تکلیف پہنچی، ان کی بات سننے کے بعد مجھے احساس ہوا کہ جو مواد میں نے شیئر کیا وہ میرے اپنے عقائد اور اصولوں کے بھی خلاف تھا۔‘‘ انہوں نے مسلم برادری کے تئیں احترام کا اظہار کرتے ہوئے کہا کہ ہر مذہب اور پس منظر سے تعلق رکھنے والے افراد کی عزت اور آزادی کا احترام کیا جانا چاہیے۔ واضح رہے کہ یہ تنازع ۴؍ نومبر کو اس وقت شروع ہوا تھا جب سانتاندر نے اپنے انسٹاگرام اکاؤنٹ پر مسلمانوں کے خلاف دو پوسٹس شیئر کیں۔ ان میں ایک ویڈیو میں ایک عیسائی مبلغ مسلمانوں کے بارے میں توہین آمیز باتیں کرتے ہوئے یہ دعویٰ کررہا تھا کہ ’’کوئی مہربان مسلمان نہیں ہوتا۔‘‘ دوسری پوسٹ میں امریکی ریاست مشی گن سے سینیٹ کے لیے منتخب ہونے والے عبد السید کی تصویر کے ساتھ یہ پیغام دیا گیا تھا کہ ’’امریکہ نے گزشتہ رات شریعت کے حق میں ووٹ دیا ہے۔‘‘ سانتاندر نے یہ مواد اگلی صبح اپنے اکاؤنٹ سے ہٹادیا تھا، لیکن اس وقت تک یہ معاملہ خاصی توجہ حاصل کرچکا تھا۔ 

یہ بھی پڑھئے: کیلیفورنیا: فلسطینی نژاد امریکی طالب علم کا اسکول پر مقدمہ، استاد پر ’دہشت گرد‘ کہنے کا الزام

عبد السید کی کامیابی امریکی سیاست میں تاریخی اہمیت رکھتی ہے۔ وہ مشی گن سے امریکی سینیٹ کے لیے منتخب ہونے والے پہلے مسلمان امریکی ہیں۔ ان کے والدین مصر سے ہجرت کرکے امریکہ آئے تھے۔ انتخابی مہم کے دوران بھی انہیں اسلام مخالف بیانات اور تنقید کا سامنا کرنا پڑا تھا۔ سانتاندر کی پوسٹوں میں ان کی انتخابی کامیابی کو شریعت کے نفاذ سے جوڑنے پر اعتراض کیا گیا کہ ایک مسلمان امیدوار کی کامیابی کو اس کے مذہب کی بنیاد پر خوف پھیلانے کے لیے استعمال کیا جارہا ہے۔ سانتاندر کی معافی سے ایک دن پہلے ٹورنٹو بلیوجیز کے صدر اور چیف ایگزیکٹیو مارک شیپائرو نے بھی مسلم برادری اور ٹیم کے شائقین سے معذرت کی تھی۔ انہوں نے بتایا کہ ٹیم کے نمائندوں نے ٹورنٹو کی مسلم برادری کے رہنماؤں سے ملاقات کی، جنہوں نے ان پوسٹوں سے پہنچنے والی تکلیف اور نقصان کے بارے میں آگاہ کیا۔ شیپائرو نے کہا، ’’ان کی بات سننے اور ان سے سیکھنے کا موقع ہمارے لیے اہم تھا اور اس نے ایک تنظیم کی حیثیت سے ہمارے عقائد اور اقدار کو مزید مستحکم کیا ہے۔ ہم اسلاموفوبیا اور ہر طرح کی نفرت کی مذمت کرتے ہیں۔‘‘ انہوں نے مزید کہا کہ بلیوجیز مسلم برادری اور اپنے شائقین سے ان پوسٹوں کے باعث ہونے والی تکلیف پر دلی معذرت خواہ ہے اور آئندہ بھی تمام طرح کی نفرت کے خلاف کمیونٹی رہنماؤں کے ساتھ مل کر کام کرے گی۔ ٹیم نے اس سے پہلے بھی واضح کیا تھا کہ بیس بال سب کے لیے ہے اور کسی ایک کھلاڑی کے ذاتی تبصرے پوری تنظیم کی اقدار کی نمائندگی نہیں کرتے۔ 

یہ بھی پڑھئے: غزہ: خیمہ میں ۹؍ ماہ کا ’کنعان‘ سردی سے ٹھٹھر کر جاں بحق

ٹیم کے جنرل منیجر راس ایٹکنز نے بھی لاس ویگاس میں میجر لیگ بیس بال کے سالانہ جنرل منیجرز اجلاس کے دوران اس معاملے پر ناراضی ظاہر کی تھی۔ انہوں نے کہا تھا، ’’سانتاندر کے یہ تبصرے کرنے پر میری مایوسی کی شدت بیان کرنے کے لیے واقعی الفاظ نہیں ہیں۔ میں نے براہِ راست ان کے سامنے بھی اپنی مایوسی کا اظہار کیا ہے۔‘‘ جب ان سے پوچھا گیا کہ کیا کھلاڑی کو اس معاملے پر عوامی سطح پر وضاحت یا معافی پیش کرنی چاہیے تو انہوں نے بتایا کہ انہوں نے سانتاندر کو ایسا کرنے کا مشورہ دیا ہے۔ اس کے بعد کھلاڑی نے اپنا بیان جاری کیا۔ سانتاندر نے جنوری ۲۰۲۵ء میں ٹورنٹو بلیوجیز کے ساتھ ۵؍ برس کیلئے ۹؍ کروڑ ۲۵؍ لاکھ ڈالر کا معاہدہ کیا تھا۔ اس سے پہلے وہ ۲۰۱۷ء سے ۲۰۲۴ء تک بالٹی مور اوریولز کی نمائندگی کرتے رہے تھے۔ تاہم کندھے کی چوٹ اور اس کی سرجری کے باعث وہ ۲۰۲۶ء کا پورا سیزن نہیں کھیل سکے۔ ٹیم کی جانب سے ان کے خلاف کسی تادیبی کارروائی کا فیصلہ سامنے نہیں آیا ہے۔ سانتاندر نے اپنے معافی نامے کے اختتام پر کہا کہ اس تجربے سے انہوں نے یہ سیکھا ہے کہ ان کی کسی بھی پوسٹ یا بیان سے نفرت، امتیاز یا تشدد کی حمایت کا تاثر نہیں ملنا چاہیے۔ انہوں نے کہا کہ وہ آئندہ اپنی بات اور سوشل میڈیا پر شیئر کیے جانے والے مواد کے انتخاب میں زیادہ احتیاط برتیں گے۔ یوں یہ معاملہ صرف ایک کھلاڑی کی سوشل میڈیا پوسٹوں تک محدود نہیں رہا بلکہ اس نے کھیلوں کی دنیا میں مذہبی رواداری، کھلاڑیوں کی عوامی ذمہ داری اور مختلف برادریوں کے احترام سے متعلق بحث کو بھی دوبارہ نمایاں کردیا ہے۔