کورونا کے سبب اس سال عرس نہایت سادگی سے منایا جائے گا ، بھیڑ بھاڑ روکنے کیلئے صندل کا روایتی جلوس نہیں ہو گا

سر زمین خاندیش کے بزرگ  ولی اور ہندو مسلم اتحاد کی علامت حضرت پیر موسیٰ قادریؒ  کے سالانہ سہ روزہ  عرس کاآغاز ہو گیا ہے لیکن اس مرتبہ کورونا کے بڑھتے معاملات اور لاک ڈائون لگنے  کے اندیشوں کی وجہ سے یہ تقریب نہایت سادگی سے انجام دی جائے گی۔ عرس کا باقاعدہ آغاز جمعہ سے ہو چکا ہےلیکن کورونا کی پابندیوں کی وجہ سے ضلع کلکٹر نے درگاہ ٹرسٹ کو  باقاعدہ عرس منعقد کرنے کی اجازت نہیں دی ہے ۔
 چالیس گائوں کے تحصیل دارامول مورے کے دفتر میں سب ڈویژنل مجسٹریٹ لکشمی ستارکر نے درگاہ ٹرسٹ اور تلوار بھون کے ذمہ داران کے ساتھ ایک میٹنگ کی اور انہیں حکومت کی   ہدایات اور لاک ڈاؤن کی پابندیوں سے آگاہ کرواکے اپیل کی کہ اس مرتبہ عرس کو موخر رکھا جائے اور انتہائی سادگی کے ساتھ اسے منایا جائے۔ ضلع انتظامیہ کی اپیل پر درگاہ کمیٹی نے بھی ہامی بھری اور یہ پیغام دینے کی کوشش کی کہ اس وباء سے لڑنے  میں  بابا کے عقیدت مند بھی حکومت اور انتظامیہ کے ساتھ ہیں۔ بھیڑ نہ ہو  اس بات کو یقینی بنانے کیلئے روایتی طور پر صندل اور تلوار کا جلوس نہیں نکالا جائے گا ۔درگاہ ٹرسٹ کے سیکریٹری جمیل مجاور کے مطابق منتخب افراد ہی صندل اور تلوار کے جلوس میں شامل ہوں گے۔ 
 واضح رہے حضرت پیر موسیٰ قادریؒ کا صندل شہر کی رتھ گلی جامع مسجد  سے برآمد ہو تا ہےاور دوسرے روز رتھ گلی پرانی میونسپل بلدیہ عمارت کے پاس سے جلوس تلوار برآمد ہوتا ہے ۔جو شہر کی مختلف شاہراہوں سے گزرکر دیر رات  حضرت  کے آستانے پر پہنچتا ہے ۔جمعہ کو عرس کا آغاز ہوتے ہی چالیس گاؤں زون کے ڈی وائے ایس پی کیلاش گائوڑے کے ہمراہ سٹی پولیس اسٹیشن انچارج وجے ٹھاکر واڑ اور ان کی ٹیم نے وہاں کا دورہ کیا جبکہ چالیس گاؤں بلدیہ کے محکمہ صاف صفائی کی ٹیم نے بھی  درگاہ کا جائزہ لیا ۔