آگ کی لپٹیں اتنی بھیانک تھیں کہ اسکی زد میں آکر۲؍پان اسٹال ،چائے کی ٹپری،ایک کنٹینر، چھوٹی بولیرو ٹیمپو اور ۲؍ موٹر سائیکلیں بھی خاک ہوگئیں
EPAPER
Updated: March 20, 2024, 11:22 PM IST | Khalid Abdul Qayyum Ansari | Mumbai
آگ کی لپٹیں اتنی بھیانک تھیں کہ اسکی زد میں آکر۲؍پان اسٹال ،چائے کی ٹپری،ایک کنٹینر، چھوٹی بولیرو ٹیمپو اور ۲؍ موٹر سائیکلیں بھی خاک ہوگئیں
شہر سے متصل گودام کے علاقے دپوڈا میں واقع ایک بھنگار کے گودام میں منگل کی نصف شب بھیانک آتشزدگی سے لاکھوں روپے کی املاک خاکستر ہوگئیں۔ آگ اس قدر شدید تھی کہ چند ہی لمحوں میں اس نے پڑوس کے۳؍ گودام، پان کی ۲؍ اور چائے کی ایک ٹپری کے ساتھ ہی سڑک پر کھڑی گاڑیوں کو اپنی زد میں لے لیا۔اس بھیانک آگ پر قابو پانے کے لئے فائر بریگیڈ کے جوانوں نے ۶؍ گھنٹوں تک مشقت کی ۔
اطلاع کے مطابق منگل کو نصف شب تقریباً سوا بارہ بجے ول گرام پنچایت حدود میں واقع داپوڑہ میں شاہراہ پر واقع ایک بھنگار کے گودام میں آگ لگ گئی۔گودام میں دھاگے سے بنی اشیاء، پلائی ووڈ ،و پاور لوم سے نکلنے والا لوچن، نلی، کارٹون و دوسری چیزوں سے بھرا ہونے کے سبب آگ تیزی سے پھیل کر پڑوس کے گودام تک پہنچ گئی۔یہ گودام بھی بھنگار سے بھرا ہوا تھا۔جس کے سبب آگ نے ان گوداموں کو بھی تیزی سے اپنی لپیٹ میںلے لیا۔تند شعلوں کی لپٹوں سے گودام کے قریب ایک چائے کی دکان اور ۲؍ پان ٹپریاں بھی جل گئیں۔آگ کی شدت کا اندازہ اس بات سے لگایا جا سکتا ہے کہ سڑک پر کھڑی ایک کنٹینر، ایک چھوٹی بولیرو ٹیمپو اور ۲؍موٹر سائیکلیں بھی جل کر تباہ ہوگئیں۔آتشزدگی کی اطلاع ملتے ہی بھیونڈی میونسپل کارپوریشن کی فائر بریگیڈ کی گاڑیاں موقع پر پہنچیں اور آگ کو بجھانے میں گھنٹوں مصروف رہیں۔تاہم علاقے میں پانی کی قلت کے سبب جوانوں کو آگ پر قابو پانے میں دشواریوں کا سامنا کرنا پڑا۔ بتایاگیا کہ فائر بریگیڈ عملہ صبح ۶؍بجے آگ کو قابو میں کرسکا۔ آتشزدگی کی وجہ تاحال معلوم نہیں ہوسکی ہے۔اس حادثے میں کسی جانی نقصان کی اطلاع نہیںہے ، لیکن لاکھوں روپے مالیت کی املاک جل کر خاکستر ہوگئی ہیں۔ نارپولی پولیس نے آتشزدگی کا کیس درج کر کے تفتیش شروع کر دی ہے۔آگ شدید ہونے کی وجہ سے پولیس نے حفاظت کے پیش نظر اس شاہراہ پر صبح۶؍ بجے تک گاڑیوں کے نقل و حرکت پر پابندی عائد کردی تھی۔جس کی وجہ سے شاہراہ پر زبردست ٹریفک جام ہوگیا تھا۔