یہاں راجیو گاندھی فلائی اوور پر ایک تیز رفتار اولا کار اور آٹو رکشا میں آمنے سامنے کی زوردار ٹکر ہو گئی۔ حادثے میں آٹو رکشا ڈرائیور اور ایک خاتون شدید زخمی ہوگئے جبکہ رکشا میں سوار خاتون کے ۳؍ کمسن بچوں کو کچھ نہیں ہوا۔

یہاں راجیو گاندھی فلائی اوور پر ایک تیز رفتار اولا کار اور آٹو رکشا میں آمنے سامنے کی زوردار ٹکر ہو گئی۔ حادثے میں آٹو رکشا ڈرائیور اور ایک خاتون شدید زخمی ہوگئے جبکہ رکشا میں سوار خاتون کے ۳؍ کمسن بچوں کو کچھ نہیں ہوا۔ 
 پولیس کے مطابق کومبڈ پاڑہ کی رہائشی تنوجا ارجنے اپنے ۳؍ بچوں کے ساتھ آٹو رکشا سے بھیونڈی روڈ ریلوے اسٹیشن جا رہی تھیں تاکہ پونے جانے والی ٹرین پکڑ سکیں۔ جب رکشا راجیو گاندھی فلائی اوور کے اوپر اے سی پی آفس کے سامنے پہنچا تو اسی دوران تھانے سے باغ ِفردوس کی سمت آ رہی ایک تیز رفتار اولا کار بےقابو ہو کر سامنے سے آٹو رکشا سے ٹکرا گئی۔ ٹکر اتنی شدید تھی کہ رکشے کا اگلا اور سائیڈ والا حصہ بری طرح سے تباہ ہوگیا۔ تصادم کے نتیجے میں رکشا ڈرائیور اور خاتون تنوجا ارجنے کو شدید چوٹیں آئیں جبکہ ان کے تینوں بچے خوف کے مارے چیخنے لگے لیکن خوش قسمتی سے انہیں کوئی زخم نہیں آیا۔ 
مقامی افراد نے فوری طور پر زخمیوں کو نکالا اور ایمبولنس کے ذریعے اندرا گاندھی میموریل سب ڈسٹرکٹ اسپتال منتقل کیا جہاں ڈاکٹروں نے ابتدائی طبی امداد فراہم کرنے کے بعد خاتون کو مزید علاج کیلئے ریفر کر دیا۔ ڈاکٹروں کے مطابق خاتون کے پیر اور کمر کی ہڈیوں میں فریکچر ہوا ہے جس کی وجہ سے وہ حرکت کرنے سے قاصر ہیں۔ 
واقعہ کی اطلاع ملتے ہی بھیونڈی شہر پولیس اسٹیشن کے افسران جائے حادثہ پر پہنچے، معائنہ اور پنچنامہ کرنے کے بعد کار اور رکشا دونوں کو قبضے میں لے کر تحقیقات شروع کر دی گئی ہے۔ پولیس ذرائع کے مطابق حادثہ تیز رفتاری اور لاپروائی سے ڈرائیونگ کے باعث پیش آیا۔