یہاں پانی کی قلت اور اس کی تقسیم کے تعلق سے میونسپل کارپوریشن اور کھونی گرام پنچایت کے درمیان تنازع سنگین رخ اختیار کرتا جا رہا ہے۔

یہاں پانی کی قلت اور اس کی تقسیم کے تعلق سے میونسپل کارپوریشن اور کھونی گرام پنچایت کے درمیان تنازع سنگین رخ اختیار کرتا جا رہا ہے۔ حالیہ واقعہ میں سابق ڈپٹی میئر عمران خان اور کھونی گرام پنچایت کے سرپنچ الطاف بالی کے درمیان تلخ کلامی بھی ہوئی۔ 
اطلاعات کے مطابق شہر کے بعض علاقوں اور کھاڑی پار واقع کھونی گرام پنچایت کو ایک ہی پائپ لائن کے ذریعے پانی فراہم کیا جاتا ہے۔ گرام پنچایت کا الزام ہے کہ دیہی علاقوں کے حصے کا پانی شہر میں غیرقانونی کنکشنز کے ذریعے استعمال کیا جا رہا ہے۔ اسی شکایت کے پیش نظر سرپنچ الطاف بالی اپنے ساتھیوں اور متعلقہ حکام کے ہمراہ پائپ لائن کی جانچ کیلئے موقع پر پہنچے، جہاں مبینہ طور پر کچھ غیرقانونی کنکشنز کی نشاندہی کے بعد انہیں منقطع کیا گیا۔ 

یہ بھی پڑھئے: میل گھاٹ میں بنیادی سہولیات کے فقدان کے سبب اموات پر عدالت برہم

دوسری جانب جیسے ہی اس کارروائی کی اطلاع ملی، سابق ڈپٹی میئر عمران خان، کارپوریٹر حسنین فاروقی اور دیگر نمائندے بڑی تعداد میں شہریوں کے ساتھ موقع پر پہنچ گئے۔ اس دوران دونوں فریقین کے درمیان شدید لفظی جھڑپ ہوئی اور ایک دوسرے پر الزامات کا تبادلہ کیا گیا۔ 
عمران خان نے موقف اختیار کیا کہ جن کنکشنز کو غیرقانونی قرار دیا جا رہا ہے وہ دراصل میونسپل کارپوریشن کی جانب سے باقاعدہ دئیے گئے ہیں اور انہیں کاٹنا شہریوں کے ساتھ ناانصافی ہے۔ دوسری طرف سرپنچ الطاف بالی نے الزام دہرایا کہ ان کے علاقے کیلئے مختص پانی میں مسلسل کمی کی جا رہی ہے اور غیرقانونی کنکشنز کے خلاف کارروائی ناگزیر ہے۔ انہوں نے واضح کیا کہ اگر یہ سلسلہ بند نہ ہوا تو وہ اعلیٰ حکام سے رجوع کریں گے اور مزید سخت اقدامات کیے جائیں گے۔ اس پورے معاملے پر میونسپل کارپوریشن کے واٹر سپلائی محکمہ کے ایگزیکٹو انجینئر سندیپ پٹناور نے وضاحت کرتے ہوئے کہا کہ ایک ہی پائپ لائن سے شہر اور دیہی علاقوں کو پانی فراہم کیا جاتا ہے اور جہاں کہیں بھی غیرقانونی کنکشنز پائے جائیں گے ان کے خلاف کارروائی جاری رکھی جائے گی۔